കൈക്കൂലി ആരോപണം ; മന്ത്രിയെ മിനിറ്റുവച്ച് തെറിപ്പിച്ച് കേജരിവാള് വീണ്ടും കേന്ദ്രത്തെ ഞെട്ടിച്ചു
കൈക്കൂലി വാങ്ങിയതായി ആരോപണമുയര്ന്ന മന്ത്രിയെ നിമിഷങ്ങള്ക്കുള്ളില് പുറത്താക്കി വീണ്ടും കേജരിവാള് കൈയ്യടി നേടി. ഡല്ഹി രാഷ്ട്രീയ നേതൃത്വം ഞെട്ടലോടെയാണ് ഈ വാര്ത്ത കേട്ടത്. ഭക്ഷ്യപൊതുവിതരണ, പരിസ്ഥിതി മന്ത്രി അസിം അഹമദ് ഖാനെയാണു പുറത്താക്കിയത്. വാര്ത്താ സമ്മേളനത്തില് നാടകീയമായിട്ടായിരുന്നു പുറത്താക്കല് പ്രഖ്യാപനം.
ഇന്നലെ വൈകിട്ടു നാലിനു സെക്രട്ടേറിയറ്റില് വിളിച്ചുചേര്ത്ത വാര്ത്താസമ്മേളനത്തിലായിരുന്നു കേജ്രിവാളിന്റെ അപ്രതീക്ഷിത നീക്കം. വ്യാഴാഴ്ച രാത്രിയാണ് അസിം അഹമദ് ഖാനെതിരെയുള്ള പരാതി ലഭിച്ചതെന്നു കേജ്രിവാള് പറഞ്ഞു. അഹമദ് ഖാന്റെ മണ്ഡലമായ മാതിയ മഹലില് നിന്നുള്ള വ്യവസായിയാണു മന്ത്രി കൈക്കൂലി ചോദിക്കുന്നതിന്റെ തെളിവടങ്ങിയ ഓഡിയോ സിഡി കേജ്രിവാളിനു നല്കിയത്. ഒരു മണിക്കൂര് ദൈര്ഘ്യമുള്ള സിഡി കേജ്രിവാളും ഉപമുഖ്യമന്ത്രി മനീഷ് സിസോദിയയും പരിശോധിച്ചു. സിഡിയുടെ ആധികാരികതയെക്കുറിച്ചു പ്രാഥമിക അന്വേഷണവും നടത്തി. ഇതിന്റെ അടിസ്ഥാനത്തില് അസിം അഹമദ് ഖാനെ വിളിച്ചുവരുത്തി ചോദ്യം ചെയ്തപ്പോള് അദ്ദേഹം കുറ്റം സമ്മതിച്ചതായി സര്ക്കാര് വൃത്തങ്ങള് അറിയിച്ചു. ഇതിനെ തുടര്ന്നാണു വാര്ത്താ സമ്മേളനം വിളിച്ചുകൂട്ടി പുറത്താക്കല് പ്രഖ്യാപിച്ചത്.
ആരോപണത്തെക്കുറിച്ചു സിബിഐ അന്വേഷണത്തിനു ശുപാര്ശ ചെയ്തു. സിബിഐ അന്വേഷണം കഴിയുന്നതുവരെയാണു മന്ത്രിയെ മാറ്റിനിര്ത്തുന്നത്. ബല്ലിമാരന് എംഎല്എ ഇമ്രാന് ഹുസൈന് പുതിയ മന്ത്രിയാകും. കേന്ദ്രമന്ത്രി സുഷമ സ്വരാജിനും ബിജെപിയുടെ രണ്ടു മുഖ്യമന്ത്രിമാര്ക്കുമെതിരെ ആരോപണം നിലനില്ക്കേ, ശക്തമായ രാഷ്ട്രീയസന്ദേശം കൂടി നല്കുന്നതാണു നടപടി. ഡല്ഹി സര്ക്കാരുമായി നിരന്തരം ഏറ്റുമുട്ടുന്ന ബിജെപിയെ ഇതു തല്ക്കാലത്തേക്കെങ്കിലും പ്രതിരോധത്തിലാക്കും. മന്ത്രിമാര്ക്കും എംഎല്എമാര്ക്കുമെതിരെ ഉയര്ന്ന ആരോപണങ്ങള് കാരണം ഇടിവുതട്ടിയ എഎപിയുടെ അഴിമതിവിരുദ്ധ പ്രതിച്ഛായ വീണ്ടെടുക്കുക കൂടിയാണു നടപടിയുടെ ലക്ഷ്യം.
മധ്യപ്രദേശ് മുഖ്യമന്ത്രി ശിവ്രാജ് സിങ് ചൗഹാനും രാജസ്ഥാന് മുഖ്യമന്ത്രി വസുന്ധര രാജെ സിന്ധ്യയ്ക്കുമെതിരെ നടപടിയെടുക്കാന് അദ്ദേഹം ബിജെപിയെ വെല്ലുവിളിച്ചു. രണ്ടാം ആം ആദ്മി സര്ക്കാര് അധികാരമേറ്റ് ഒന്പതു മാസത്തിനിടെ പുറത്താകുന്ന രണ്ടാമത്തെ മന്ത്രിയാണ് അസിം. വ്യാജ ബിരുദക്കേസില് അറസ്റ്റിലായതിനെ തുടര്ന്നു നേരത്തേ ജിതേന്ദര് തോമര് രാജിവച്ചിരുന്നു. അഴിമതി ആരോപണങ്ങളുടെ പേരില് ഏറ്റവും വേഗത്തില് നടപടിയെടുക്കുന്ന മുഖ്യന് എന്ന ഖ്യാതി കേജരിവാളിന് സ്വന്തം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
