കല്ക്കരിപാടം അഴിമതി; നിര്ണായക ഫയലുകള് കാണാതായതിനെ ചെല്ലി പാര്ലമെന്റില് പ്രതിപക്ഷ ബഹളം; ഇരുസഭകളും നിര്ത്തിവെച്ചു
കല്ക്കരിപാടം അനുവദിച്ചതു സംബന്ധിച്ച നിര്ണായക ഫയലുകള് കാണാതായതിനെ ചെല്ലി പാര്ലമെന്റില് പ്രതിപക്ഷ ബഹളം. ഇതിനെ തുടര്ന്ന് സഭാ നടപടികള് നിര്ത്തിവെച്ചു. പിന്നീട് ചേര്ന്നപ്പോഴും ബഹളം തുടര്ന്നതോടെ സഭ ഇന്നത്തേക്ക് പിരിയുകയായിരുന്നു.
1993 മുതല് 2004വരെയുള്ള കല്ക്കരിപ്പാടം അഴിമതിയുമായി ബന്ധപ്പെട്ട ഫയലുകളാണ് കാണാതായത്. വിഷയത്തില് പ്രധാനമന്ത്രി പ്രസ്താവന നടത്തണമെന്ന് ആവശ്യപ്പെട്ടായിരുന്നു ബിജെപി അംഗങ്ങള് ബഹളമുണ്ടാക്കിയത്. എന്നാല് ആവശ്യം നിരസിച്ച സര്ക്കാര് വകുപ്പുമന്ത്രി പ്രസ്താവന നടത്തുമെന്ന് വ്യക്തമാക്കി. തുടര്ന്ന് രാജ്യസഭയില് പ്രസ്താവന നടത്തിയ കല്ക്കരി വകുപ്പ് മന്ത്രി ശ്രീപ്രകാശ് ജയ്സ്വാള് തനിക്കെതിരെ ഉയര്ന്ന ആരോപണങ്ങളില് കുറ്റക്കാരനെന്ന് തെളിഞ്ഞാല് എന്തു ശിക്ഷയും ഏറ്റുവാങ്ങാന് തയാറാണെന്ന് അറിയിച്ചു. ഫയലുകള് കാണാതായതിനെക്കുറിച്ച് എല്ലാതരത്തിലുള്ള അന്വേഷണവും നടത്താന് തയ്യാറാണെന്നും ജയ്സ്വാള് രാജ്യസഭയില് പറഞ്ഞു. കൂടാതെ ഇതിനെക്കുറിച്ച് അന്വേഷിക്കാന് മന്ത്രിതല സമിതിയെ നിയോഗിച്ചിട്ടുണ്ടെന്നും അദ്ദേഹം വ്യക്തമാക്കി. 769 ഫയലുകള് സി.ബി.ഐയ്ക്ക് കൈമാറിയിട്ടുണ്ടെന്നും മന്ത്രി പറഞ്ഞു.
എന്നാല് വിശദീകരണത്തില് പ്രതിപക്ഷം തൃപ്തരായില്ല. ഫയലുകള് കാണാതായതല്ലെന്നും കാണാതാക്കിയതാണെന്നുമായിരുന്നു രാജ്യസഭാ പ്രതിപക്ഷ നേതാവ് അരുണ് ജെയ്റ്റ്ലി നല്കിയ മറുപടി. വിഷയത്തില് പ്രധാനമന്ത്രി പ്രസ്താവന നടത്തണമെന്ന ആവശ്യത്തില് നിന്ന് പിന്നോട്ടില്ലെന്നും അദ്ദേഹം വ്യക്തമാക്കി. തുടര്ന്ന് സഭ നിര്ത്തിവെക്കുകയായിരുന്നു. പ്രധാനമന്ത്രി മന്മോഹന് സിംഗ് കല്ക്കരി വകുപ്പ് മന്ത്രിയായിരുന്ന കാലയളവിലെ ഫയലുകളാണ് കാണാതായത്. ലോക്സഭയിലും സമാനമായ പ്രതിഷേധമുണ്ടായി. സവാള വിലവര്ധനയില് ഇടതുപക്ഷവും തെലുങ്കാന വിഷയത്തില് ടിഡിപിയും പ്രതിഷേധിച്ചു.
രാജീവ് ഗാന്ധിയുടെ ജന്മദിനമായ ഇന്ന് ഭക്ഷ്യസുരക്ഷാ ബില് ലോക്സഭയില് പാസാക്കാനായിരുന്നു കോണ്ഗ്രസ്സിന്റെ ശ്രമം. എന്നാല് ഒരു ബില്ലും പാസാക്കാന് അനുവദിക്കില്ലെന്നും, ഭക്ഷ്യ സുരക്ഷാ ബില്ലില് വിശദമായ ചര്ച്ചവേണമെന്നും പ്രതിപക്ഷം വ്യക്തമാക്കിയതോടെ കോണ്ഗ്രസ് പ്രതീക്ഷകള്ക്ക് തിരിച്ചടിയായി.
https://www.facebook.com/Malayalivartha