തെലുങ്കാന വിഷയത്തില്‍ സഭയില്‍ പ്രതിഷേധിച്ച എം.പിമാരെ സസ്‌പെന്‍ഡ്‌ ചെയ്യണമെന്ന്‌ ആവശ്യപ്പെട്ട്‌ സര്‍ക്കാര്‍ പ്രമേയം
തെലുങ്കാന വിഷയത്തില്‍ പാര്‍ലമെന്റില്‍ തുടര്‍ച്ചയായി പ്രതിഷേധിച്ച 11 എം.പിമാരെ സസ്‌പെന്‍ഡ്‌ ചെയ്യണമെന്ന്‌ ആവശ്യപ്പെട്ട്‌ ലോക്‌സഭയില്‍ സര്‍ക്കാര്‍ പ്രമേയം അവതരിപ്പിച്ചു. കോണ്‍ഗ്രസ്‌ പ്രതിനിധികളായ ഏഴ്‌ എംപിമാരെയും തെലുങ്കുദേശം പാര്‍ട്ടിയിലെ നാല്‌ അംഗങ്ങളെയും സസ്‌പെന്‍ഡ്‌ ചെയ്യണമെന്ന പ്രമേയമാണ്‌ കേന്ദ്രമന്ത്രി കമല്‍നാഥ്‌ അവതരിപ്പിച്ചത്‌.
തീര ആന്ധ്രാ മേഖലയിലെയും റായലസീമയിലെയും എംപിമാരാണ്‌ ഇവര്‍. എന്നാല്‍ പ്രമേയത്തെ പിന്തുണയ്‌ക്കില്ലെന്ന്‌ ബിജെപി വ്യക്തമാക്കി. തെലങ്കാന സംസ്ഥാന രൂപീകരണത്തെ അനുകൂലിക്കുന്നുണ്ടെങ്കിലും എംപിമാര്‍ക്കെതിരേ തിടുക്കത്തില്‍ കൈക്കൊള്ളുന്ന അച്ചടക്ക നടപടി അംഗീകരിക്കാനില്ലെന്ന നിലപാടായിരുന്നു ബിജെപിയുടേത്‌. ഇക്കാര്യം ലോക്‌സഭാ പ്രതിപക്ഷ നേതാവ്‌ സുഷമാ സ്വരാജ്‌ സഭയെ അറിയിക്കുകയും ചെയ്‌തു. സര്‍ക്കാര്‍ പ്രമേയം വോട്ടെടുപ്പിനിടണമെന്നും ബിജെപി ആവശ്യപ്പെട്ടു.
ഇതിനിടെ നീതി നടപ്പാക്കണമെന്ന്‌ ആവശ്യപ്പെട്ട്‌ സഭയുടെ നടുത്തളത്തിലേക്ക്‌ ഇറങ്ങിയ ആന്ധ്ര എംപിമാര്‍ സ്‌പീക്കറുടെ ടേബിളിലെ മൈക്ക്‌ തട്ടിപ്പറിക്കാനും ശ്രമം നടത്തി. ഇതോടെ സഭ ബഹളത്തില്‍ മുങ്ങുകയും ഇന്നത്തേക്ക്‌ പിരിയുകയുമായിരുന്നു.
https://www.facebook.com/Malayalivartha
