പരസ്പര സമ്മതത്തോടെ ലൈംഗികബന്ധത്തില്‍ ഏര്‍പ്പെടുന്നതിനുള്ള കുറഞ്ഞപ്രായം 18ല്‍ നിന്നും 16 വയസായി കുറയ്ക്കണമെന്ന് കേന്ദ്ര സര്‍ക്കാരിനോട് അഭ്യര്‍ത്ഥനയുമായി മദ്ധ്യപ്രദേശ് ഹൈക്കോടതി. കൗമാരക്കാരായ ആണ്‍കുട്ടികളോട് ചെയ്യുന്ന അനീതിയ്ക്ക് പരിഹാരം കാണാനാണിതെന്ന് മദ്ധ്യപ്രദേശ് ഹൈക്കോടതിയിലെ ജസ്റ്റിസ് ദീപക് കുമാര്‍ അഗര്‍വാള്‍ നിരീക്ഷിച്ചു. 14 വയസിനോടടുത്താണ് പ്രായപൂര്‍ത്തിയാകുന്നത്.

സമൂഹമാദ്ധ്യമ ബോധവല്‍ക്കരണവും ഇന്റര്‍നെറ്റ് കണക്ടിവിറ്റിയും എളുപ്പമായ ഈ കാലത്ത് 18 വയസിന് താഴെയുള്ള ആണ്‍കുട്ടികളും പെണ്‍കുട്ടികളും പരസ്പര സമ്മതത്തോടെ ലൈംഗികബന്ധത്തിലേര്‍പ്പെടാറുണ്ട്. ഈ സാഹചര്യത്തിലാണ് ഉഭയ സമ്മതപ്രകാരമുള്ള ലൈംഗികബന്ധത്തില്‍ ഏര്‍പ്പെടുന്നതിനുള്ള കുറഞ്ഞപ്രായം 16 ആക്കണമെന്ന് കോടതി അഭ്യര്‍ത്ഥിച്ചത്.

ക്രിമിനല്‍ നിയമത്തില്‍ 2013ല്‍ കൊണ്ടുവന്ന ഭേദഗതിയിലാണ് പരസ്പര സമ്മതത്തോടെ ലൈംഗികബന്ധത്തിന് കുറഞ്ഞപ്രായം 16ല്‍ നിന്ന് 18 ആയി ഉയര്‍ത്തിയത്. 18 ആയി പ്രായം ഉയര്‍ത്തിയത് കാരണം ഈ പ്രായത്തിലുള്ള കുട്ടികളെ ക്രിമിനലായി സമൂഹം കാണുകയും അത് ആണ്‍കുട്ടികളില്‍ നീതിനിഷേധത്തിന് കാരണമാകുകയും ചെയ്യും. മുന്‍പ് മദ്രാസ് ഹൈക്കോടതിയും ഇതേ ആവശ്യം കേന്ദ്രസര്‍ക്കാരിനോട് നടത്തിയെങ്കിലും ഇത്തരത്തിലൊരു നിര്‍ദ്ദേശം പരിഗണനയിലില്ലെന്നാണ് കേന്ദ്രം പാര്‍ലമെന്റില്‍ അറിയിച്ചത്.