ട്രെയിനുകളില്‍ നിലവില്‍ എസി സ്ലീപ്പര്‍ ക്ലാസുകളിലെ യാത്രക്കാര്‍ക്ക് മാത്രമാണ് ഭക്ഷണം നല്‍കുന്ന സര്‍വീസുകള്‍ ലഭിക്കുന്നത്. എന്നാല്‍ ഇപ്പോഴിതാ ജനറല്‍ കോച്ചുകളിലെ യാത്രക്കാര്‍ക്ക് മിതമായ നിരക്കില്‍ ആരോഗ്യകരവും വൃത്തിയുള്ളതുമായ ഭക്ഷണം നല്‍കാന്‍ 'എക്കണോമി മീല്‍' പദ്ധതിയുമായി എത്തിയിരിക്കുകയാണ് ഇന്ത്യന്‍ റെയില്‍വേ.

എഫ് ആന്‍ഡ് ബി സേവനം വിപുലീകരിക്കുന്നതിന്റെ ഭാഗമായുള്ള പദ്ധതി പരീക്ഷണാടിസ്ഥാനത്തില്‍ തുടങ്ങിയതായും റെയില്‍വേ അറിയിച്ചു. പ്ലാറ്റ്‌ഫോമുകളില്‍ ജനറല്‍ കോച്ചുകള്‍ക്ക് സമീപം വരുന്ന രീതിയില്‍ സേവന കൌണ്ടറുകള്‍ സ്ഥാപിക്കും. ഇത് വഴിയാകും ആദ്യ ഘട്ടത്തില്‍ ഭക്ഷണ വിതരണം നടത്തുക. എക്കണോമി മീല്‍സ്,സ്‌നാക്‌സ്(കോംബോ) എന്നിവയുടെ മെനുവും റെയില്‍വേ പുറത്തുവിട്ടു.

ഈ പുതിയ സംവിധാനത്തിന് കീഴില്‍, പാസഞ്ചര്‍ ട്രെയിനുകളിലും സെക്കന്‍ഡ് ക്ലാസ് കോച്ചുകളിലും യാത്ര ചെയ്യുന്നവര്‍ക്ക് 20 രൂപയ്ക്ക് എക്കണോമി മീല്‍ ലഭിക്കും. കൂടാതെ, 200 മില്ലി വെള്ളം 3 രൂപയ്ക്ക് ലഭിക്കും. ആവശ്യമില്ലെങ്കില്‍ കുപ്പി വെള്ളത്തിന് 20 രൂപ ചെലവഴിക്കേണ്ടി വരില്ലെന്ന് ചുരുക്കം. ഉദയ്പൂര്‍, അജ്മീര്‍, അബു റോഡ് സ്‌റ്റേഷനുകളിലാണ് നോര്‍ത്ത് വെസ്‌റ്റേണ്‍ റെയില്‍വേ പരീക്ഷണാര്‍ത്ഥം നടപ്പിലാക്കിയത്.

20 രൂപ വിലയുള്ള 'എക്കണോമി മീല്‍' ഏഴ് പൂരി, ഉരുളക്കിഴങ്ങ് കറി, അച്ചാര്‍ എന്നിവ ഉണ്ടാകും. രണ്ടാമത്തെ വിഭാഗമായ 50 രൂപയുടെ കോംബോയില്‍ കൂടുതല്‍ വിഭവങ്ങള്‍ ഉള്‍പ്പെടുത്തിയിട്ടുണ്ട്. ചോറ് , രാജ്മ, ഛോലെ, കിച്ചടി കുല്‍ച, ഭട്ടൂരെ, പാവ്ഭാജി, മസാല ദോശ എന്നിവ ഓപ്ഷനുകളായി ഉണ്ടാകും.

ദീര്‍ഘദൂര ട്രെയിന്‍ യാത്രകളില്‍ ജനറല്‍ ക്ലാസ് കോച്ചുകളിലെ യാത്രക്കാര്‍ നേരിടുന്ന പ്രശ്‌നങ്ങള്‍ പരിഹരിക്കാനാണ് റെയില്‍വേ ലക്ഷ്യമിടുന്നത്. മിതമായ നരിക്കില്‍ ഭക്ഷണ ഓപ്ഷനുകള്‍ നല്‍കുന്നതിലൂടെ, യാത്രക്കാര്‍ക്ക് എളുപ്പത്തില്‍ ഭക്ഷണം വാങ്ങാന്‍ സാധിക്കും. ട്രെയിനില്‍ കയറുമ്പോഴും ഇറങ്ങുമ്പോഴും ഉണ്ടായേക്കാവുന്ന തിരക്കും അപകടങ്ങളും കുറയ്ക്കാനും കഴിയുമെന്ന് റെയില്‍വേ പ്രതീക്ഷിക്കുന്നു.