മഹാരാഷ്ട്രയിലെ റായിഗഡ് ജില്ലയില്‍ കനത്ത മഴയെത്തുടര്‍ന്നുണ്ടായ ഉരുള്‍പൊട്ടലില്‍ നാലുമരണം. നിരവധി കുടുംബങ്ങള്‍ മണ്ണിനടിയില്‍ കുടുങ്ങിക്കിടക്കുന്നതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. രക്ഷാപ്രവര്‍ത്തനത്തില്‍ ഇതുവരെ 21 പേരെ രക്ഷപെടുത്തി.

ദേശീയ ദുരന്ത നിവാരണ സേനയുടെ രണ്ട് സംഘമാണ് രക്ഷാപ്രവര്‍ത്തനത്തിനു നേതൃത്വം നല്‍കുന്നത്. മുംബൈയില്‍നിന്നു മറ്റു രണ്ട് സംഘങ്ങള്‍കൂടി ഇവിടേക്കു പുറപ്പെട്ടിട്ടുണ്ട്. കുന്നിന്‍ പ്രദേശമായ ഇര്‍സല്‍വാഡി ഗ്രാമത്തില്‍ ബുധനാഴ്ച രാത്രിയാണ് ഉരുള്‍പൊട്ടലുണ്ടായത്. സംഭവത്തെത്തുടര്‍ന്ന് റായിഗഡ് പൊലീസ് കണ്‍ട്രോള്‍ റൂം ആരംഭിച്ചു.

കഴിഞ്ഞ രണ്ട് ദിവസമായി ഓറഞ്ച് അലേര്‍ട്ട് പുറപ്പെടുവിച്ച ജില്ലയില്‍ കനത്ത മഴ തുടരുന്നു. നിരവധി ഗ്രാമങ്ങള്‍ വെള്ളത്തിനടിയിലായി.
നേരം പുലര്‍ന്നതോടെയാണ് കാര്യങ്ങള്‍ കൃത്യമായി മനസ്സിലാക്കാനായതെന്ന് പൊലീസ് . നിലവില്‍ നൂറിലേറെപ്പേര്‍ രക്ഷാപ്രവര്‍ത്തനത്തില്‍ ഏര്‍പ്പെടുന്നുണ്ട്. ജില്ലയില്‍ വ്യാഴാഴ്ച റെഡ് അലര്‍ട്ട് പുറപ്പെടുവിച്ച സാഹചര്യത്തില്‍ സ്‌കൂളുകള്‍ക്ക് അവധി പ്രഖ്യാപിച്ചു.