ഉത്തരേന്ത്യയില്‍ കനത്ത മഴ.... ഡല്‍ഹി യമുന നദിയിലെ ജലനിരപ്പ് വീണ്ടും 206.01 മീറ്ററിന് മുകളിലെത്തി.... അമര്‍നാഥ് യാത്ര താല്‍ക്കാലികമായി നിര്‍ത്തിവച്ചു,ഹിമാചലിലും ഉത്തരാഖണ്ഡിലും റോഡുകള്‍ തകര്‍ന്ന നിലയില്‍.

മധ്യപ്രദേശിലെ ഛത്തര്‍പുരില്‍ 2 പേര്‍ ഇടിമിന്നലേറ്റും ഹിമാചലിലെ ചിര്‍ഗാവില്‍ മൂന്ന് പേര്‍ മിന്നല്‍ പ്രളയത്തിലും മരിച്ചു. ആഭ്യന്തരമന്ത്രി അമിത് ഷാ ഡല്‍ഹി ലഫ് ഗവര്‍ണറെ വിളിച്ച് സാഹചര്യം വിലയിരുത്തി കനത്ത മഴയെ തുടര്‍ന്ന് അമര്‍നാഥ് യാത്ര താല്‍ക്കാലികമായി നിര്‍ത്തിവച്ചിരിക്കുകയാണ്.

ആശങ്ക ഉയര്‍ത്തി യമുനാ നദിയിലെ ജലനിരപ്പ് അതിവേഗം ഉയരുന്നു. 205.33 മീറ്റര്‍ എന്ന അപകട നില കടന്ന് ശക്തമായ ഒഴുക്കോടെയാണ് യമുനാ നദി മുന്നോട്ടുപോകുന്നത്.

ഹിമാചലിലും ഉത്തരാഖണ്ഡിലും മഴ തുടരുന്നതിനാല്‍ ഹരിയാനയിലെ ഹത്‌നി കുണ്ട് ബാരേജില്‍ നിന്ന് 2. 51 ലക്ഷം ക്യുസെക്സ് വെള്ളം തുറന്നുവിട്ടിട്ടുണ്ട്. ഈ വെള്ളം ഡല്‍ഹിയിലെത്താന്‍ 72 മണിക്കൂര്‍ എടുക്കും. സര്‍ക്കാര്‍ ജാഗ്രത നിര്‍ദ്ദേശം നല്‍കിയിട്ടുണ്ട്. ഹിന്‍ഡന്‍ നദി കരകവിഞ്ഞതോടെ നോയിഡയിലെ താഴ്ന്ന സ്ഥലങ്ങളില്‍ താമസിക്കുന്നവരെ മാറ്റിപ്പാര്‍പ്പിച്ചു. ഹിമാചലിലെ 8 ജില്ലകളില്‍ അതിശക്തമായ മഴയ്ക്കും ഉരുള്‍പൊട്ടലിനും സാധ്യതയുണ്ടെന്നാണ് കാലാവസ്ഥ വകുപ്പിന്റെ മുന്നറിയിപ്പ്.

കോട്ഖായില്‍ നിന്ന് 2,500 പേരെ ഒഴിപ്പിച്ചു. കിന്നൗറിലെ മണ്ണിടിച്ചിലിനെ തുടര്‍ന്ന് ദേശീയപാത 5 അടച്ചു. ഹിമാചലിലും ഉത്തരാഖണ്ഡിലും റോഡുകള്‍ തകര്‍ന്നതിനാല്‍ ഗ്രാമങ്ങള്‍ ഒറ്റപ്പെട്ട നിലയിലാണ്.