ആശങ്കകള്ക്കൊടുവില് കോണ്ഗ്രസിന്റെ സ്വപ്ന പദ്ധതിയായ ഭക്ഷ്യ സുരക്ഷാബില് നിയമമായി, പട്ടിണിപ്പാവങ്ങള്ക്ക് ഇതൊരു അനുഗ്രഹമാകുമോ?
കോണ്ഗ്രസിന്റെ സ്വപ്നപദ്ധതിയായ ഭക്ഷ്യ സുരക്ഷാബില് നിയമമായി. ലോക്സഭയും രാജ്യസഭയും പാസാക്കിയ ബില് രാഷ്ട്രപതി ഒപ്പുവെച്ചതോടെയാണ് നിയമമായത്. ലോക്സഭയില് കഴിഞ്ഞ മാസം 26നു ബില് പാസാക്കിയിരുന്നു. ഈ മാസം ആദ്യം രാജ്യസഭയിലും ബില് പാസായി. അടുത്ത പൊതുതെരഞ്ഞെടുപ്പില് കോണ്ഗ്രസിന്റെ മുഖ്യ പ്രചരണായുധങ്ങളിലൊന്നായി കണക്കാക്കപ്പെടുന്ന ഭക്ഷ്യസുരക്ഷാ പദ്ധതി പാര്ട്ടി അധ്യക്ഷ സോണിയാ ഗാന്ധിയുടെ മുന്കൈയിലാണു നിയമമായി വരുന്നത്.
ബില് നിയമമാകുന്നതോടെ ഭക്ഷണം രാജ്യത്തെ ജനങ്ങളുടെ അവകാശമായി മാറും. ബില് പാസാക്കാന് സാധിച്ചത് വന് നേട്ടമാണെന്ന് കേന്ദ്രമന്ത്രി കെ.വി തോമസ് പറഞ്ഞു. സംസ്ഥാനങ്ങളുടെ ആശങ്ക ഒഴിവാക്കാന് സാധിച്ചെന്നും അദ്ദേഹം പറഞ്ഞു. രാജ്യത്തെ 75 ശതമാനം ഗ്രാമീണര്ക്ക് ഭക്ഷണം ലഭിക്കും. രാജ്യത്തെ എല്ലാ പൗരന്മാര്ക്കും ഭക്ഷണം നല്കുമെന്ന് വാഗ്ദാനം നിറവേറ്റുകയാണ് യു.പി.എ സര്ക്കാര്. ബില് പ്രകാരം ഗര്ഭിണികള്ക്ക് വര്ഷം ആറായിരം രൂപയ്ക്ക് നിയമപരമായി അവകാശമുണ്ടായിരിക്കും.
ജനസംഖ്യയിലെ 70 ശതമാനം പേര്ക്കും കുറഞ്ഞ നിരക്കില് ഭക്ഷണം ഉറപ്പുവരുത്തുകയാണ് ഭക്ഷ്യസുരക്ഷാ ബില്ലിന്റെ ലക്ഷ്യം. ആറിനും 18 നും ഇടയ്ക്ക് പ്രായമുള്ള എല്ലാ കുട്ടികള്ക്കും ഉച്ചഭക്ഷണവും ബില് ഉറപ്പു നല്കുന്നു.
തെരഞ്ഞെടുപ്പ് മുമ്പില് കണ്ടുള്ള നീക്കമാണ് ഭക്ഷ്യസുരക്ഷാബില്ലെന്നും ഇത് വോട്ട് സുരക്ഷാ ബില്ലാണെന്നും ബി.ജെ.പി ആരോപിച്ചിരുന്നു.
https://www.facebook.com/Malayalivartha
