വനിതാ ഡോക്ടറെ പീഡിപ്പിച്ച് കൊലപ്പെടുത്തിയ കേസ്; പ്രതിക്ക് ജീവപര്യന്തം ശിക്ഷ വിധിച്ച് കോടതി
ആര്ജി കര് മെഡിക്കല് കോളേജ് ആശുപത്രിയില് ജൂനിയര് ഡോക്ടറെ പീഡിപ്പിച്ച് കൊലപ്പെടുത്തിയ കേസിലെ ഏക പ്രതി സഞ്ജയ് റോയ്ക്ക് (34) മരണം വരെ ജീവപര്യന്തം. അരലക്ഷം രൂപ പിഴയും വിധിച്ചു. കൊല്ക്കത്ത സീല്ദാ അഡീഷണല് ജില്ലാ സെഷന്സ് കോടതിയാണ് ശിക്ഷ വിധിച്ചത്. ജീവിതാവസാനം വരെ പ്രതി ജയിലില് കഴിയണമെന്നും കോടതി പറഞ്ഞു.
വിധി കേള്ക്കാന് ഡോക്ടറുടെ മാതാപിതാക്കള് കോടതിയില് എത്തിയിരുന്നു. കുറ്റം ചെയ്തിട്ടില്ലെന്ന് ഇന്നും പ്രതി കോടതിയില് ആവര്ത്തിച്ചു. എന്നാല് സഞ്ജയ് കുറ്റം ചെയ്തതായി തെളിഞ്ഞുവെന്ന് കോടതി പറഞ്ഞു. ഇത് അപൂര്വങ്ങളില് അപൂര്വമായിട്ടുള്ള ഒരു കേസല്ലെന്നാണ് കോടതി വ്യക്തമാക്കിയത്.
17 ലക്ഷം രൂപ സര്ക്കാര് നഷ്ടപരിഹാരമായി ഡോക്ടറുടെ കുടുംബത്തിന് നല്കണമെന്നും കോടതി പറഞ്ഞു. എന്നാല് നഷ്ടപരിഹാരം വേണ്ടെന്നാണ് ഡോക്ടറുടെ കുടുംബം പ്രതികരിച്ചത്. പെണ്കുട്ടികളുടെ സുരക്ഷ സംസ്ഥാനത്തിന്റെ ഉത്തരവാദിത്തമാണെന്നും കോടതി വ്യക്തമാക്കി. പ്രതിക്കെതിരെ കുറ്റം സംശയാതീതമായി തെളിയിക്കപ്പെട്ടെന്ന് പറഞ്ഞ കോടതി പ്രതിക്ക് വധശിക്ഷ നല്കണമെന്ന വാദം തള്ളി.
2024 ഓഗസ്റ്റ് ഒന്പതിനാണ് ആശുപത്രിയിലെ സെമിനാര് ഹാളില് 31കാരിയായ പി ജി ഡോക്ടറുടെ അര്ദ്ധനഗ്നമായ മൃതദേഹം കണ്ടെത്തിയത്. ഡോക്ടര് ക്രൂരമാനഭംഗത്തിനിരയായി കൊല്ലപ്പെടുകയായിരുന്നു. തുടര്ന്ന് രാജ്യവ്യാപകമായി വന് പ്രതിഷേധമുയര്ന്നു. ഓഗസ്റ്റ് പത്തിനാണ് കേസിലെ പ്രതിയും കൊല്ക്കത്ത പോലീസിന്റെ സിവിക് വോളന്റിയറുമായ സഞ്ജയ് റോയിയെ പോലീസ് അറസ്റ്റ് ചെയ്തത്.
ഡോക്ടറുടെ മൃദേഹത്തിന് സമീപത്തുനിന്ന് കിട്ടിയ ബ്ലൂടൂത്ത് ഇയര്ഫോണിന്റെ ഭാഗവും സി സി ടി വി ദൃശ്യങ്ങളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ പിടികൂടിയത്. ജീവനക്കാരനല്ലാതിരുന്നിട്ടും ഡോക്ടര് ജോലി ചെയ്തിരുന്ന ആശുപത്രി ക്യാമ്പസില് ഇയാള് പതിവായി എത്തിയിരുന്നു.
2019ലാണ് കൊല്ക്കത്ത പൊലീസിന്റെ ഡിസാസ്റ്റര് മാനേജ്മെന്റ് ഗ്രൂപ്പില് സന്നദ്ധപ്രവര്ത്തകനായി റോയി ജോലിയില് പ്രവേശിച്ചത്. പിന്നീട് പൊലീസ് വെല്ഫെയര് സെല്ലിലേയ്ക്ക് മാറി. തുടര്ന്നാണ് ആര്ജി കര് മെഡിക്കല് കോളജ് ആശുപത്രിയിലെ പൊലീസ് ഔട്ട്പോസ്റ്റിലേയ്ക്ക് മാറിയത്. ആശുപത്രിയില് പ്രവേശനം ലഭിക്കാന് പണം ഈടാക്കുന്ന ജോലിയാണ് ഇയാള് ചെയ്തിരുന്നത്.
ഡോക്ടറുടെ കഴുത്ത് ഞെരിച്ച് കൊലപ്പെടുത്തുകയായിരുന്നുവെന്നാണ് പോസ്റ്റുമോര്ട്ടം റിപ്പോര്ട്ടില് വ്യക്തമാക്കുന്നത്. ശക്തിയായി കഴുത്ത് ഞെരിച്ചതിനാല് തൈറോയ്ഡ് തരുണാസ്ഥി (തൈറോയ്ഡ് കാര്ട്ടിലേജ്) തകര്ന്നു. പ്രതിയുടെ വികൃതമായ ലൈംഗിക ആസക്തി, ജനനേന്ദ്രിയത്തിലെ അതിക്രൂരമായ പീഡനം എന്നിവമൂലം യുവതിയുടെ സ്വകാര്യ ഭാഗങ്ങളില് ആഴത്തിലുള്ള മുറിവുകള് ഉണ്ടായിരുന്നതായും നാല് പേജുള്ള റിപ്പോര്ട്ടില് പറഞ്ഞിരുന്നു.
https://www.facebook.com/Malayalivartha
