കളിച്ചുകൊണ്ടിരിക്കെ കൈയില്‍ ചുറ്റിയ മൂര്‍ഖന്‍ പാമ്പിനെ ഒരു വയസുകാരന്‍ കടിച്ചു കൊന്നു. ബീഹാറിലെ ബേട്ടില്‍ ഗ്രാമത്തിലാണ് സംഭവം നടന്നത്. വീടിനടുത്ത് കളിച്ചുകൊണ്ടിരിക്കുകയായിരുന്ന ഗോവിന്ദ എന്ന കുട്ടിയാണ് പാമ്പിനെ കൊന്നത്. കുട്ടി കളിക്കുന്നതിനിടെ പാമ്പ് കൈയില്‍ ചുറ്റുകയായിരുന്നു. പെട്ടെന്നുണ്ടായ പ്രകോപനത്തില്‍ കുട്ടി പാമ്പിന്റെ ശരീരത്തില്‍ കടിക്കുകയായിരുന്നു. തല്‍ക്ഷണം തന്നെ പാമ്പ് ചത്തു.

ഏതാനും മണിക്കൂറുകള്‍ക്ക് ശേഷം ഗോവിന്ദയുടെ നില വഷളാകാന്‍ തുടങ്ങി. കുടുംബം ആദ്യം അടുത്തുള്ള പ്രൈമറി ഹെല്‍ത്ത് സെന്ററില്‍ എത്തിച്ചെങ്കിലും പിന്നീട് മെഡിക്കല്‍ കോളേജ് ആശുപത്രിയിലേക്കും മാറ്റുകയായിരുന്നു. കുട്ടിയുടെ നില നിലവില്‍ തൃപ്തികരമാണെന്നാണ് ഡോക്ടര്‍ന്മാര്‍ പറയുന്നത്. പാമ്പ് വീട്ടിലെത്തിയപ്പോള്‍ ഗോവിന്ദയുടെ അമ്മ അടുത്ത് വിറക് ശേഖരിക്കുകയായിരുന്നുവെന്ന് കുട്ടിയുടെ മുത്തശ്ശി പറഞ്ഞു. അതൊരു മൂര്‍ഖന്‍ പാമ്പ് ആയിരുന്നുവെന്നും മുത്തശ്ശി വ്യക്തമാക്കി.