ഭര്‍ത്താവില്‍ നിന്നും ക്രൂര പീഡനത്തിന് ഇരയായ യുവതി പ്രായപൂര്‍ത്തിയാകാത്ത മൂന്ന് പെണ്‍മക്കളെ വിഷം കൊടുത്തു കൊലപ്പെടുത്തി. ജൂലായ് 20ന് മഹാരാഷ്ട്രയിലെ താനെയിലാണ് സംഭവം നടന്നത്. ജില്ലയിലെ ഷഹാപൂര്‍ മേഖലയിലെ അസ്‌നോലി ഗ്രാമത്തില്‍ താമസിക്കുന്ന 27കാരിയായ സന്ധ്യ സന്ദീപ് ബെരെയെപൊലീസ് പിടികൂടിയത്. അഞ്ചും എട്ടും പത്തും പ്രായമുള്ള പെണ്‍കുട്ടികള്‍ക്കാണ് യുവതി ഭക്ഷണത്തില്‍ കീടനാശിനി നല്‍കി കൊലപ്പെടുത്തിയത്.

കുട്ടികള്‍ക്ക് ഛര്‍ദ്ദിയും തലകറക്കവും അനുഭവപ്പെട്ടതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. നില വഷളായപ്പോള്‍ രണ്ടുപേരെ മുംബയിലുള്ള ഒരു ആശുപത്രിയില്‍ പ്രവേശിപ്പിച്ചെങ്കിലും ജൂലായ് 24നും ജൂലായ് 25നും ഇരുവരും മരണപ്പെട്ടു. മറ്റൊരു കുട്ടിയെ നാസിക്കിലെ ആശുപത്രിയിലേക്ക് മാറ്റിയെങ്കിലും ജൂലായ് 24ന് ആ കുട്ടിയും മരണത്തിന് കീഴടങ്ങുകയായിരുന്നു.

ആദ്യം പൊലീസ് അപകട മരണത്തിനാണ് കേസെടുത്തത്. ശനിയാഴ്ച രാത്രിയോടെ വന്ന പോസ്റ്റ്‌മോര്‍ട്ടം റിപ്പോര്‍ട്ടില്‍ കുട്ടികളുടെ ശരീരത്തില്‍ വിഷത്തിന്റെ അംശം കണ്ടെത്തിയതോടെ കൊലക്കുറ്റത്തിന് പൊലീസ് കേസെടുക്കുകയായിരുന്നു. പിന്നീട് തെളിവുകളുടെ അടിസ്ഥാനത്തില്‍ അമ്മയ്‌ക്കെതിരെ കൊലപാതകക്കുറ്റം ചുമത്തുകയും ഞായറാഴ്ച പുലര്‍ച്ചെ രണ്ട് മണിയോടെ യുവതിയെ ഉദ്യോഗസ്ഥര്‍ അറസ്റ്റ് ചെയ്യുകയും ചെയ്തു.

ഭര്‍ത്താവിന്റെ മദ്യപാനവും നിരന്തരമായ പീഡനവും പ്രതി നേരിടുകയായിരുന്നുവെന്ന് പൊലീസ് പറഞ്ഞു. ഭര്‍ത്താവില്‍ നിന്ന് അകന്നു കഴിയുന്ന യുവതി മൂന്ന് പെണ്‍മക്കളെയും പോറ്റാന്‍ കഴിയാത്തതില്‍ മനം നൊന്താണ് കൊലപാതകം നടത്തിയതെന്ന് യുവതി തന്നെ പൊലീസിനോട് കുറ്റം സമ്മതിച്ചു. കുട്ടികളുടെ മരണത്തില്‍ യുവതിയുടെ ഭര്‍തൃവീട്ടുകാര്‍ സംശയം ഉന്നയിച്ചിരുന്നു. ചോദ്യം ചെയ്യുന്നതിനായി ആദ്യം യുവതിയെ കസ്റ്റഡിയിലെടുത്തെന്നും പിന്നീട് പോസ്റ്റ്‌മോര്‍ട്ടം റിപ്പോര്‍ട്ട് വന്ന ശേഷം അറസ്റ്റ് രേഖപ്പെടുത്തിയെന്നും പൊലീസ് വ്യക്തമാക്കി.