വ്യാപാര ബന്ധങ്ങള്‍ രൂപപ്പെടേണ്ടത് സൗഹൃദം കൊണ്ടാവണമെന്ന് ട്രംപിന്റെ ഭീഷണിക്കെതിരെ തരൂര്‍
വ്യാപാര രംഗത്തെ ഇന്ത്യന്‍ താല്‍പര്യങ്ങള്‍ അമേരിക്കയ്ക്കു മുന്നില്‍ അടിയറ വയ്ക്കാന്‍ കഴിയില്ലെന്നും അമേരിക്കയുടെ താരിഫ് ഭീഷണിയില്‍ പ്രതികരിച്ച് ഡോ. ശശി തരൂര്‍ എം.പി. വ്യാപാര ബന്ധങ്ങള്‍ രൂപപ്പെടേണ്ടത് സൗഹൃദം കൊണ്ടാവണം, ഭീഷണി കൊണ്ടാവരുത് എന്ന് തരൂര്‍ പറഞ്ഞു. അമേരിക്കയുടെ നിലപാട് കടുത്ത സമ്മര്‍ദ്ദതന്ത്രത്തിന്റെ ഭാഗമാണെന്ന് തരൂര്‍ ചൂണ്ടിക്കാട്ടി, എന്നാല്‍ അതിനെതിരെ ഇന്ത്യ ജാഗ്രത പാലിച്ച് എന്തു നടപടികള്‍ കൈക്കൊള്ളാനും തയ്യാറായിരിക്കണം എന്നും അദ്ദേഹം മുന്നറിയിപ്പ് നല്‍കി.
വ്യാപാര രംഗത്തെ ഇന്ത്യന്‍ താല്‍പര്യങ്ങള്‍ അമേരിക്കയ്ക്കു മുന്നില്‍ അടിയറ വയ്ക്കാന്‍ കഴിയില്ല. നമ്മുടെ ജനതയുടെ ഭാവി നിര്‍ണയിക്കുന്ന രാഷ്ട്രീയ തീരുമാനങ്ങള്‍ വഴിതിരിച്ച് വിടാന്‍ മറ്റുള്ളവര്‍ ശ്രമിക്കരുത്, എന്നും തരൂര്‍ കൂട്ടിച്ചേര്‍ത്തു. ഇന്ത്യ ഒരു ആഗോള വിപണി രാജ്യമാണ്, യു.എസ് മാത്രമല്ല പ്രാധാന്യമുള്ള വ്യാപാര പങ്കാളിയെന്ന് തരൂര്‍ വ്യക്തമാക്കി. യൂറോപ്യന്‍ യൂണിയനുമായും യു.കെയുമായും കരാറുകള്‍ പൂര്‍ത്തിയാക്കി, ലാറ്റിന്‍ അമേരിക്ക മുതല്‍ ആഫ്രിക്ക വരെ വിപണികള്‍ തേടുന്നുണ്ട്. ഇന്ത്യയുടെ വിപണി വൈവിധ്യമാര്‍ന്നതാണ്. അമേരിക്കയുടെ ഭാഗത്തു നിന്ന് കടുത്തതും ഏകപക്ഷീയവുമായ നടപടികള്‍ ഉണ്ടായാല്‍ രാജ്യം വ്യത്യസ്ത ദിശകളില്‍ മുന്നോട്ട് പോയി മറ്റു വ്യാപാര മേഖലകള്‍ കണ്ടെത്തും' അദ്ദേഹം പറഞ്ഞു.
ഇന്ത്യയുടെ കയറ്റുമതി നികുതി നിരക്ക് നീതികരിക്കാന്‍ കഴിയാത്തതാണ് എന്ന ആക്ഷേപം ഡോ. ശശി തരൂര്‍ തള്ളിക്കളഞ്ഞു. 'അമേരിക്കന്‍ ഉല്‍പ്പന്നങ്ങള്‍ക്ക് ഇന്ത്യയില്‍ ശരാശരി 17% നികുതിയാണ് നല്കുന്നത്. അത് ആഗോളതലത്തില്‍ അധികമല്ല. ഉയര്‍ന്ന വിലയും മത്സരക്ഷമതയും കുറവായതു കൊണ്ടാണ് പല അമേരിക്കന്‍ ഉത്പന്നങ്ങള്‍ക്കു ഇന്ത്യന്‍ വിപണിയില്‍ ജനപ്രീതി നേടാന്‍ കഴിയാത്തത്.
ആഗോള സാമ്പത്തിക രംഗത്ത് വ്യത്യസ്ത വഴികളിലായി ഇന്ത്യ മുന്നേറുമെന്നും അദ്ദേഹം വ്യക്തമാക്കി. ചൈന പോലെയുള്ള കയറ്റുമതി അധിഷ്ഠിത സാമ്പത്തിക ശൈലി ഇന്ത്യക്കില്ല. നമ്മുടെ ശക്തി നമ്മുടെ ആഭ്യന്തര വിപണിയിലാണ്. നമ്മുക്ക് നമ്മുടെ പാത സ്വയം തേടാന്‍ കഴിയും. സ്വയംപര്യാപ്തതയിലൂടെ മുന്നേറിയ ഒരു ജനതയാണ് ഇന്ത്യ. അതിനാല്‍ ഇന്ത്യയുടെ നയരൂപകര്‍ത്താക്കള്‍ ധൈര്യത്തോടും വ്യക്തതയോടും കൂടിയിരിക്കാന്‍ തയ്യാറാകണം. ഇത്തരം വ്യാപാര അനീതിയുള്ള ഒരു വ്യവസ്ഥ രാജ്യത്തിനു സ്വീകാര്യമല്ല പ്രത്യേക സാഹചര്യത്തില്‍ 'നാം വേറിട്ട വഴികള്‍ തേടുവാന്‍ തയ്യാറായാല്‍ അതൊരു അഹങ്കാരമല്ല; അത് നമ്മുടെ സ്വാഭിമാനമാണ്' എന്നും അദ്ദേഹം പറഞ്ഞു.
https://www.facebook.com/Malayalivartha
