ബിഗ് ബോസിലേക്ക് പ്രവേശനം വാഗ്ദാനം ചെയ്ത് പത്ത് ലക്ഷം രൂപ തട്ടിയെടുത്തതായി പരാതി. ഭോപ്പാലിലെ ഒരു ഡോക്ടറാണ് പരാതിക്കാരന്‍. ഒരു ക്ലിനിക്ക് നടത്തുകയാണ് അഭിനിത് ഗുപ്തയെന്ന ഡോക്ടര്‍. ബിഗ് ബോസില്‍ പങ്കെടുക്കാന്‍ അവസരം വാഗ്ദാനം ചെയ്ത് കരണ്‍ സിംഗ് എന്നയാള്‍ 2022ലാണ് ഡോക്ടറെ സമീപിച്ചത്. ഇവന്റ് ഡയറക്ടറാണെന്നും ടെലിവിഷന്‍ മേഖലയില്‍ വലിയ സ്വാധീനമുണ്ടെന്നുമായിരുന്നു ഇയാള്‍ ഡോക്ടറോട് പറഞ്ഞു. കരണ്‍ സിംഗിന്റെ വാക്ക് വിശ്വസിച്ച് ഡോക്ടര്‍ അയാള്‍ക്ക് 10 ലക്ഷം രൂപ നല്‍കുകയും ചെയ്‌തെന്നാണ് പറയുന്നത്.

എന്നാല്‍ പിന്നീട് ബിഗ് ബോസ് മത്സരാര്‍ത്ഥികളുടെ പേര് ഔദ്യോഗികമായി പ്രഖ്യാപിച്ചപ്പോള്‍ തന്റെ പേര് ഉണ്ടായിരുന്നില്ലെന്നും അപ്പോഴാണ് കബളിപ്പിക്കപ്പെട്ടെന്ന് മനസിലായതെന്നും ഡോക്ടര്‍ പറയുന്നു. തുടര്‍ന്ന് ഡോക്ടര്‍ കരണിനെ ബന്ധപ്പെട്ടു. കുറച്ചുകൂടി കാത്തിരിക്കൂ, പിന്‍വാതിലിലൂടെ ബിഗ് ബോസ് ഹൗസിലേക്ക് കയറ്റാനുള്ള പ്രക്രിയ നടക്കുകയാണെന്നുമായിരുന്നു ഇയാള്‍ പറഞ്ഞിട്ടും. എന്നാല്‍ കാത്തിരുന്നിട്ടും ഫലമില്ലാതായതോടെ ഡോക്ടര്‍ പണം തിരികെ തരണമെന്ന് ആവശ്യപ്പെട്ടു. എന്നാല്‍ പിന്നീട് വിളിച്ചപ്പോള്‍ ഇയാളുടെ ഫോണ്‍ സ്വിച്ച് ഓഫായിരുന്നു. ഇതോടെ ഡോക്ടര്‍ പരാതിയുമായി പൊലീസിനെ സമീപിക്കുകയായിരുന്നു. സംഭവത്തെക്കുറിച്ച് വിശദമായി അന്വേഷിച്ചുവരികയാണെന്ന് പൊലീസ് അറിയിച്ചു.