അമേരിക്കയിൽ വീണ്ടും ഭൂചലനം. ന്യൂജേഴ്‌സിയിലെ ഹിൽസ്ഡേലിന് സമീപമാണ് റിക്ടർ സ്കെയിലിൽ 2.7 തീവ്രത രേഖപ്പെടുത്തിയ ഭൂചലനം അനുഭവപ്പെട്ടത്. ഭൂചലനത്തിൻ്റെ പ്രകമ്പനം ന്യൂജേഴ്സി നഗരത്തിലും ന്യൂയോർക്കിലും അനുഭവപ്പെട്ടു. ആളപായമോ നാശനഷ്ടങ്ങളോ ഇതുവരെ റിപ്പോർട്ട് ചെയ്തിട്ടില്ല.മാൻഹാട്ടനിൽ നിന്ന് 20 മൈൽ അകലെയാണ് ഭൂചലനത്തിൻ്റെ പ്രഭവകേന്ദ്രം എന്ന് അമേരിക്കയിലെ ജിയോളജിക്കൽ സർവേ വിഭാഗം സ്ഥിരീകരിച്ചു. അമേരിക്കയിൽ പ്രാദേശിക സമയം ഓഗസ്റ്റ് 5 ഉച്ചയോടെയാണ് ഭൂചലനം ഉണ്ടായത്. തീവ്രത കുറഞ്ഞ ഭൂചലനമാണെലെങ്കിലും പ്രകമ്പനം അനുഭവപ്പെട്ട ഇടങ്ങളിൽ പരിശോധനകൾ നടക്കുന്നുണ്ട്.
അമേരിക്കയിൽ വിവിധ ഭാഗങ്ങളിൽ കഴിഞ്ഞദിവസങ്ങളിലും ഭൂചലനം അനുഭവപ്പെട്ടിരുന്നു. കഴിഞ്ഞ ആഴ്ചയും അതിന് മുൻപ് ജൂലൈ 22 നും ന്യൂ ജേഴ്സി നഗരത്തിന് അടുത്തുള്ള ഹസ്ബ്രൂക് ഹൈറ്റ്സിൽ ഭൂചലനം ഉണ്ടായിരുന്നു. ജൂലൈ 22ന് റിക്ടർ സ്കെയിലിൽ 2 ഉം പിന്നീട് റിക്ടർ സ്കെയിലിൽ 3 തീവ്രതയും രേഖപ്പെടുത്തിയ ചലനങ്ങളാണ് അനുഭവപ്പെട്ടത്.    

ചെറു ഭൂകമ്പങ്ങളുടെ ഈ പരമ്പര, ഈ പ്രദേശത്തെ ഭൂകമ്പ ഭീതിയുണർത്തുന്നുണ്ട്. 2024 ഏപ്രിലിൽ, വടക്കൻ ന്യൂജേഴ്സിയിൽ 2.0 നും 4.8 നും ഇടയിൽ തീവ്രത രേഖപ്പെടുത്തിയ 11 ഭൂകമ്പങ്ങൾ ഉണ്ടായിരുന്നു. ഈ ചെറിയ ഭൂകമ്പങ്ങൾ വലിയ അപകടങ്ങൾ ഉണ്ടാക്കുന്നില്ലെങ്കിലും, ആളുകൾ ജാഗ്രത പാലിക്കണം എന്ന് അധികൃതർ അറിയിച്ചു. അടിയന്തര സാഹചര്യങ്ങളിൽ സ്വീകരിക്കേണ്ട മുൻകരുതലുകളെക്കുറിച്ചും അധികൃതർ വിവരങ്ങൾ നൽകി.

പ്രാദേശിക ദുരന്ത നിവാരണ ഉദ്യോഗസ്ഥർ പ്രദേശം നിരീക്ഷിച്ചു കൊണ്ടിരിക്കുകയാണ്. കുറഞ്ഞ തീവ്രതയുള്ള ഭൂകമ്പങ്ങൾ സാധാരണയായി അപകടകാരികളല്ല. അതേസമയം ഭൂകമ്പത്തിൻ്റെ പ്രകമ്പനത്തെ തുടർന്ന് ആളുകൾ അവരുടെ വീടുകളിൽ നിന്നും ഓഫീസുകളിൽ നിന്നും പുറത്തിറങ്ങി. ചിലർക്ക് തലകറങ്ങുന്നതായി തോന്നി. മറ്റു ചിലർക്ക് നേരിയ ചലനം അനുഭവപ്പെട്ടു.