ഉത്തരാഖണ്ഡിലുണ്ടായ മേഘവിസ്‌ഫോടനത്തിലും മിന്നല്‍ പ്രളയത്തിലും കാണാതായവര്‍ക്ക് വേണ്ടിയുള്ള തിരച്ചില്‍ തുടരുന്നു. മണ്ണിനടിയില്‍ കുടുങ്ങിയവരെ കണ്ടെത്താനായി കെടാവര്‍ നായകളെ എത്തിക്കാനാണ് നീക്കമുള്ളത്.

60 ലധികം പേര്‍ അവശിഷ്ടങ്ങള്‍ക്കിടയില്‍ കുടുങ്ങിയതായാണ് നിഗമനമുള്ളത് . മലയാളികളായ 28 പേര്‍ സ്ഥലത്ത് കുടുങ്ങിയിരിക്കുകയാണ്. ഇവരെ എയര്‍ ലിഫ്റ്റ് ചെയ്യാനുള്ള ശ്രമങ്ങള്‍ നടത്തുന്നതാണ്. 28 പേരും ഗംഗോത്രിയിലെ ക്യാമ്പിലാണുള്ളത്. ഉത്തരകാശിയിലെ 12 ഗ്രാമങ്ങളാണ് നിലവില്‍ ഒറ്റപ്പെട്ടിരിക്കുന്നത്.

കാലാവസ്ഥ മോശമായതും ദുരന്ത ബാധിത പ്രദേശത്തേക്ക് എത്തിപ്പെടുന്നതിലെ ബുദ്ധിമുട്ടും രക്ഷാപ്രവര്‍ത്തനത്തിന് വലിയ തടസ്സമായിരിക്കുകയാണ് . കൂടുതല്‍ രക്ഷാപ്രവര്‍ത്തകരെ വ്യോമമാര്‍ഗം ഇവിടേക്ക് എത്തിക്കാനായുള്ള ശ്രമത്തിലാണ് സര്‍ക്കാര്‍.

ഉത്തരകാശിയില്‍ നിന്നും ഗംഗോത്രിയിലേക്കുള്ള ദേശീയപാത പലയിടത്തും തകര്‍ന്നിരിക്കുകയാണ്. ഇവിടെ തെരച്ചില്‍ നടത്താനായി കൂടുതല്‍ യന്ത്രസാമഗ്രികള്‍ ഇവിടേക്ക് കൊണ്ടുവരണം.

ഗ്രാമത്തില്‍ നിന്ന് കണ്ടെത്തിയവരെ സുരക്ഷിതയിടങ്ങളിലേക്ക് മാറ്റി. കുടുങ്ങിയ പോയ ഹര്‍ഷില്‍ പൊലീസ് സ്റ്റേഷനിലെ പൊലീസുകാരെ കണ്ടെത്തി. ഹര്‍ഷില്‍ ആര്‍മി ക്യാമ്പിലും വലിയ നാശനഷ്ടങ്ങള്‍ ഉണ്ടായിട്ടുണ്ട്. കാണാതായ 9 സൈനികരെ കണ്ടെത്താനായി ശ്രമം തുടരുന്നു. ദുരന്തസ്ഥലത്തെ മൊബൈല്‍ ഇന്റര്‍നെറ്റ് സേവനങ്ങള്‍ പൂര്‍ണ്ണമായി താറുമാറിലാണ്. ഇതിനാല്‍ രക്ഷപ്രവര്‍ത്തകര്‍ക്ക് ആശയവിനിമയത്തിന് സാറ്റ്‌ലൈറ്റ് ഫോണ്‍ നല്‍കുകയും ചെയ്തു.