തീവണ്ടി യാത്രയ്ക്കിടെ അബോധാവസ്ഥയിലായ പത്തുവയസ്സുകാരി മരിച്ചു
അമ്മയോടൊപ്പം തീവണ്ടി യാത്രയ്ക്കിടെ അബോധാവസ്ഥയിലായ കുട്ടി മരിച്ചു. ഉശിലാംപെട്ടി മെയ്ക്കിലാംപ്പെട്ടി സ്വദേശി സാറാ ചെല്ലനാണ് (10) മരിച്ചത്. ദാദര്‍തിരുനെല്‍വേലി എക്‌സ്പ്രസില്‍ ജനറല്‍ കംപാര്‍ട്ട്‌മെന്റില്‍ അമ്മ മായാവനം ചെല്ലനൊപ്പം മുംബൈ രോഹയില്‍നിന്ന് മധുരയിലേക്ക് യാത്രചെയ്യുന്നതിനിടെ കാഞ്ഞാങ്ങാട് റെയില്‍വേ സ്‌റ്റേഷനില്‍വെച്ചാണ് സംഭവം.
വേറൊരു വണ്ടിക്ക് കടന്നുപോകാനായി കാഞ്ഞാങ്ങാട് സ്‌റ്റേഷനില്‍ തീവണ്ടി നിര്‍ത്തിയിട്ട സമയത്താണ് മറ്റ് യാത്രക്കാര്‍ ഇടപെട്ട് അബോധാവസ്ഥയിലായ കുട്ടിയെ സ്‌റ്റേഷനില്‍ ഇറക്കിയത്. വായിലൂടെ രക്തം വന്ന കുട്ടിയെ ഉടന്‍ അടുത്തുള്ള സ്വകാര്യ ആശുപത്രിയില്‍ എത്തിച്ചെങ്കിലും മരണം സ്ഥിരീകരിച്ചു.
റെയില്‍വേ ഉദ്യേഗസ്ഥരും ഹൊസ്ദുര്‍ഗ് പോലീസും ആശുപത്രിയിലെത്തി അമ്മയില്‍നിന്ന് വിവരങ്ങള്‍ ശേഖരിച്ചു. മുംബൈയില്‍ താമസിച്ചുവരുന്ന ഇവര്‍ കുട്ടിയുടെ ചികിത്സാര്‍ത്ഥം നാട്ടിലേക്ക് വരികയായിരുന്നെന്ന് അമ്മ വെളിപ്പെടുത്തി. മുംബൈയിലെ ആശുപത്രിയില്‍ കുട്ടിയെ പ്രമേഹരോഗത്തിന് ചികിത്സിച്ചതിന്റെ രേഖകള്‍ അമ്മ പോലീസിനെ കാണിച്ചു. മുംബൈയില്‍ ജോലിചെയ്യുന്ന ചെല്ലനാണ് കുട്ടിയുടെ പിതാവ്.
https://www.facebook.com/Malayalivartha
