ദീപാവലിക്ക് മുന്നോടിയായി ഭക്തിയും സാംസ്കാരിക പൈതൃകവും മനോഹരമായി പ്രദർശിപ്പിച്ചുകൊണ്ട് അയോധ്യയിലെ ദീപോത്സവ് ആഘോഷങ്ങൾ ചരിത്രത്തിൽ വീണ്ടും സ്ഥാനം പിടിച്ചു. 26 ലക്ഷത്തിലധികം ദീപങ്ങൾ കൊളുത്തി ആയിരക്കണക്കിന് ആളുകൾ ഒരേസമയം ആരതി അർപ്പിച്ച ആഘോഷങ്ങൾ ലോകമെമ്പാടും സാക്ഷ്യം വഹിച്ചു, അയോധ്യയുടെ സമ്പന്നമായ സാംസ്കാരിക പൈതൃകവും വിശ്വാസവും പ്രകടമാക്കി.

ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ആഘോഷങ്ങളിൽ പങ്കെടുത്തു, രണ്ട് ഗിന്നസ് റെക്കോർഡുകളുടെയും സർട്ടിഫിക്കറ്റുകൾ അദ്ദേഹം ഏറ്റുവാങ്ങി. സരയു നദിയുടെ തീരങ്ങളിൽ 26,17,215 ദീപങ്ങൾ കത്തിച്ചുകൊണ്ട് ഏറ്റവും കൂടുതൽ എണ്ണ വിളക്കുകൾ പ്രദർശിപ്പിച്ചതിന്റെ റെക്കോർഡ് ആദ്യത്തേതാണ്. രണ്ടാമത്തെ റെക്കോർഡ് ഒരേസമയം ഏറ്റവും കൂടുതൽ ആളുകൾ 'ദീപം' പരിക്രമണം നടത്തിയതിന്റെ റെക്കോർഡാണ്.

സരയൂ നദിയുടെ 56 കല്‍പടവുകളില്‍ തെളിയുന്ന ദീപസഞ്ചയം. അയോദ്ധ്യയിൽ ദീപാവലിയോടനുബന്ധിച്ച് ഇക്കൂറി ഈ മഹാആരതിയ്‌ക്ക് പേരിട്ടിരിക്കുന്നത് ‘ഭവ്യ ദിവ്യ നവ്യ ദീപോത്സവ് 2025 എന്നാണ്. 2,100-ലധികം വേദാചാര്യന്മാരും സാധകരും പങ്കെടുത്തു. പതിനായിരക്കണക്കിന് സാധാരണക്കാരും തെളിക്കാന്‍ എത്തി. ഇതോടെ സരയുവിൽ തെളിഞ്ഞ മഹാ ആരതി ഒരു അത്യപൂര്‍വ്വ ദൃശ്യവിരുന്നായി.

ദീപോത്സവ് ആഘോഷങ്ങളിൽ ആവേശത്തോടെ പങ്കെടുത്തതിന് ഉത്തർപ്രദേശിലെ ജനങ്ങൾക്ക് മുഖ്യമന്ത്രി നന്ദി അറിയിച്ചു. "2025 ലെ ദീപോത്സവത്തിന് സംസ്ഥാനത്തെ ജനങ്ങൾക്ക് എന്റെ ആശംസകൾ നേരുന്നു," അദ്ദേഹം പറഞ്ഞു. അയോധ്യ നഗരം ദീപോത്സവം ആഘോഷിച്ച വേളയിൽ, ഉത്തർപ്രദേശ് മുഖ്യമന്ത്രി യോഗി ആദിത്യനാഥ് അഖിലേഷ് യാദവിന്റെ സമാജ്‌വാദി പാർട്ടിക്കെതിരെ രൂക്ഷമായ ആക്രമണം അഴിച്ചുവിട്ടു. രാമക്ഷേത്ര നിർമ്മാണ പ്രസ്ഥാനത്തിനിടെ മുലായം സിംഗ് മുഖ്യമന്ത്രിയായിരിക്കെ ബാബറി മസ്ജിദിലേക്ക് മാർച്ച് ചെയ്ത കർസേവകർക്ക് നേരെ വെടിയുതിർക്കാൻ സമാജ്‌വാദി പാർട്ടി സർക്കാർ ഉത്തരവിട്ടതിനെ കേന്ദ്രീകരിച്ചാണ് മുഖ്യമന്ത്രി യോഗിയുടെ വിമർശനം. സമാജ്‌വാദി പാർട്ടി സർക്കാർ ഭക്തർക്ക് നേരെ വെടിയുതിർക്കണമെന്ന് ഉത്തരവിട്ടപ്പോൾ, ബിജെപി സർക്കാർ സരയു നദിയുടെ തീരത്ത് വിളക്കുകൾ കത്തിച്ചുവെന്ന് മുഖ്യമന്ത്രി അഭിപ്രായപ്പെട്ടു.