ആരോഗ്യരംഗത്തെ ചോദ്യം ചെയ്യുന്ന തരത്തിലുള്ള ഞെട്ടിക്കുന്ന ദൃശ്യങ്ങളാണ് മധ്യപ്രദേശിലെ സത്‌ന ജില്ലാ ആശുപത്രിയില്‍ നിന്ന് പുറത്തുവരുന്നത്. നവജാതശിശുക്കളുടെ ജീവന്‍ രക്ഷാകേന്ദ്രമായ സ്‌പെഷ്യല്‍ ന്യൂബോണ്‍ കെയര്‍ യൂണിറ്റില്‍ (SNCU) എലികള്‍ സൈ്വര്യവിഹാരം നടത്തുന്നതിന്റെ ദൃശ്യങ്ങളാണ് സാമൂഹിക മാധ്യമങ്ങളില്‍ പ്രചരിക്കുന്നത്.

ആരോഗ്യ സംരക്ഷണ സംവിധാനങ്ങളുടെ ഗുരുതരമായ വീഴ്ചയിലേക്കാണ് ഈ സംഭവം വിരല്‍ ചൂണ്ടുന്നത്.ആശുപത്രി അധികൃതര്‍ ഏറ്റവും കൂടുതല്‍ ജാഗ്രത പുലര്‍ത്തേണ്ട SNCU വാര്‍ഡിനുള്ളില്‍ നിന്നാണ് ഈ ദൃശ്യങ്ങള്‍ പകര്‍ത്തിയിട്ടുള്ളത്. അത്യധികം ശ്രദ്ധയും ശുചിത്വവും ആവശ്യമുള്ള ഈ വാര്‍ഡിലെ ഉപകരണങ്ങള്‍ക്കിടയിലൂടെ എലികള്‍ ഓടിനടക്കുന്നത് വീഡിയോയില്‍ വ്യക്തമായി കാണാം.

ഇതില്‍ ഒരു എലി കമ്പ്യൂട്ടര്‍ മോണിറ്ററിന് താഴെ ഇരുന്ന് എന്തോ ഭക്ഷിക്കുന്നതും ദൃശ്യങ്ങളില്‍ ഉള്‍പ്പെടുന്നുണ്ട്.നവജാതശിശുക്കള്‍ക്ക് അണുബാധ ഉണ്ടാകാനുള്ള സാധ്യത ഏറ്റവും കൂടുതലുള്ള ഇടമാണ് SNCU. അവിടെ എലികളുടെ സാന്നിധ്യം ഉണ്ടാകുന്നത് ശിശുക്കളുടെ ജീവന് തന്നെ ഭീഷണിയാണ്. ഇത്രയും അതീവ സുരക്ഷാ മേഖലയില്‍ പോലും വൃത്തിയും ശുചിത്വവും ഉറപ്പാക്കാന്‍ കഴിയുന്നില്ലെങ്കില്‍, സര്‍ക്കാര്‍ ആശുപത്രികളുടെ പ്രവര്‍ത്തന നിലവാരം എത്രത്തോളം പരിതാപകരമാണെന്ന് ഇത് സൂചിപ്പിക്കുന്നു.

സംഭവം വിവാദമായതോടെ, ജില്ലാ ആശുപത്രി ഭരണകൂടത്തിനെതിരെ ശക്തമായ വിമര്‍ശനമാണ് ഉയരുന്നത്. ആശുപത്രിയുടെ ഈ ഗുരുതരമായ വീഴ്ചയില്‍ ഉന്നതതല അന്വേഷണം ആവശ്യപ്പെട്ട് നിരവധി പേര്‍ രംഗത്തെത്തിയിട്ടുണ്ട്. കുട്ടികളുടെ ജീവന് ഭീഷണിയായ ഈ അനാസ്ഥയ്ക്ക് കാരണക്കാരായവര്‍ക്കെതിരെ കര്‍ശന നടപടി സ്വീകരിക്കണമെന്നാണ് പൊതുജനാവശ്യം.