ദക്ഷിണ ഡല്‍ഹിയിലെ മാളവ്യ നഗറിലെ ഹോട്ടലിലുണ്ടായ തീപിടിത്തത്തില്‍ 21 പേര്‍ മരിച്ച സംഭവത്തില്‍ ഹോട്ടല്‍ ഉടമ അറസ്റ്റില്‍. ലോകേഷ് ബജാജ് ആണ് പിടിയിലായത്. ഇയാള്‍ക്കെതിരെ ലുക്കൗട്ട് സര്‍ക്കുലര്‍ പുറത്തിറക്കിയിരുന്നു. ഇയാളുടെ വീടുകളടക്കം ഒന്നിലധികം സ്ഥലങ്ങളില്‍ പൊലീസ് റെയ്ഡ് നടത്തിയിരുന്നു. ഹോട്ടലിന് ഫയര്‍ സേഫ്റ്റി ക്ലിയറന്‍സ് ഉണ്ടായിരുന്നില്ലെന്നും ബന്ധപ്പെട്ട അധികൃതരെ അറിയിക്കാതെ കൂടുതല്‍ നിലകള്‍ നിര്‍മിച്ചാണ് ഹോട്ടല്‍ പ്രവര്‍ത്തിച്ചിരുന്നതെന്നും ഉദ്യോഗസ്ഥര്‍ പറഞ്ഞു.

ഫ്‌ലറിഷ് സ്‌റ്റേ ഹോട്ടല്‍ പ്രവര്‍ത്തിച്ചിരുന്നത് നിയമം ലംഘിച്ചാണെന്ന വിവരം നേരത്തേ പുറത്തുവന്നിരുന്നു. ഹോട്ടലിന് ഡല്‍ഹി സര്‍ക്കാര്‍ ബെഡ് ആന്‍ഡ് ബ്രേക്ക്ഫാസ്റ്റ് പദ്ധതി പ്രകാരമാണ് അനുമതി നല്‍കിയിരുന്നത്. ഈ പദ്ധതിയില്‍ ആറു മുറികള്‍ പ്രവര്‍ത്തിപ്പിക്കാന്‍ മാത്രമായിരുന്നു അനുമതിയുണ്ടായിരുന്നത്. എന്നാല്‍ ഫ്‌ലറിഷ് സ്‌റ്റേയില്‍ 25 മുറികളുണ്ടായിരുന്നു എന്നാണ് വിവരം. ബേസ്‌മെന്റിലും ചില മുറികളുണ്ടായിരുന്നു.

തീപിടിത്തത്തിന്റെ കൂടുതല്‍ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുകയാണ്. രക്ഷപ്പെടാന്‍ ഒരു യുവതി, കുഞ്ഞുമായി മൂന്നാം നിലയില്‍ നിന്നും താഴേക്കു ചാടുന്നതിന്റെ ദൃശ്യങ്ങള്‍ പുറത്തുവന്നു. വീഴ്ചയില്‍ ഇരുവര്‍ക്കും പരുക്കേറ്റതായും നിലവില്‍ ആശുപത്രിയില്‍ ചികിത്സയിലാണെന്നും ദൃക്‌സാക്ഷികള്‍ പറഞ്ഞു. ഹോട്ടലിന്റെ 5ാം നിലയില്‍ നിന്നും തൂണ്‍ വഴിയായി വിദേശ പൗരന്‍ താഴേക്ക് ഇറങ്ങാന്‍ ശ്രമിക്കുന്നതിന്റെ ദൃശ്യങ്ങളും പുറത്തുവന്നിട്ടുണ്ട്.