സംസ്ഥാനത്തെ മുഴുവന് വിദ്യാര്ത്ഥികള്ക്കും സൗജന്യ യാത്രയെന്ന് മുഖ്യമന്ത്രി ഡി കെ ശിവകുമാര്
കര്ണാടകയില് മുഴുവന് വിദ്യാര്ത്ഥികള്ക്കും സൗജന്യ ബസ് പാസ് അനുവദിക്കാന് മുഖ്യമന്ത്രി ഡി.കെ.ശിവകുമാറിന്റെ അദ്ധ്യക്ഷതയില് ചേര്ന്ന ആദ്യമന്ത്രിസഭാ യോഗം തീരുമാനിച്ചു. ഇതോടെ കര്ണാടകയില് സ്കൂള്, കോളേജ് വിദ്യാര്ത്ഥികള്ക്ക് ബസ് യാത്ര സൗജന്യമാകും.
എല്ലാ വിദ്യാര്ത്ഥികള്ക്കും യാതൊരു നിരക്കും ഈടാക്കാതെ ബസ് പാസ് നല്കും. എല്ലാ സ്കൂള്, കോളേജ് വിദ്യാര്ത്ഥികള്ക്കും ബസ് പാസ് സൗജന്യമായിരിക്കും. മന്ത്രിസഭയുടെ ആദ്യ തീരുമാനമാണിത്. ഇതിനായി വിദ്യാര്ത്ഥികള് പ്രത്യേകം അപേക്ഷിക്കണം. ഗതാഗത വകുപ്പുമായി ഇക്കാര്യം ചര്ച്ച ചെയ്യുമെന്നും ഡി.കെ.ശിവകുമാര് വാര്ത്താ സമ്മേളനത്തില് പറഞ്ഞു.
കര്ണാടകത്തിന്റെ 24ാമത് മുഖ്യമന്ത്രിയായി ബംഗളുരുവിലെ ലോക്ഭവനില് നടന്ന ചടങ്ങിലാണ് ഡി.കെ.ശിവകുമാര് സത്യപ്രതിജ്ഞ ചെയ്തത്. ശിവകുമാറിനൊപ്പം 13 മന്ത്രിമാരും സത്യപ്രതിജ്ഞ ചെയ്ത് അധികാരമേറ്റു. സിദ്ധരാമയ്യ മന്ത്രിസഭയിലെ ആഭ്യന്തരമന്ത്രി ആയിരുന്ന ജി. പരമേശ്വരയാണ് ഉപമുഖ്യമന്ത്രി.സിദ്ധരാമയ്യയുടെ മകന് യതീന്ദ്ര സിദ്ധരാമയ്യ, മല്ലികാര്ജ്ജുന് ഖാര്ഗെയുടെ മകന് പ്രിയങ്ക് ഖാര്ഗെ, മലയാളികളായ യു.ടി. ഖാദര്,കെ.ജെ. ജോര്ജ് എന്നിവരും മന്ത്രിസഭയില് ഇടം നേടി. രാജ്യസഭ തിരഞ്ഞെടുപ്പിനു ശേഷം മന്ത്രിസഭ വിപുലീകരണമുണ്ടാകുമെന്നാണ് വിവരം.
ചടങ്ങില് കേരളത്തില് നിന്ന് മുഖ്യമന്ത്രി വി.ഡി. സതീശനും ആഭ്യന്തര മന്ത്രി രമേശ് ചെന്നിത്തലയും പങ്കെടുത്തു. കോണ്ഗ്രസ് അദ്ധ്യക്ഷന് മല്ലികാര്ജ്ജുന് ഖാര്ഗെ, ലോക്സഭ പ്രതിപക്ഷ നേതാവ് രാഹുല് ഗാന്ധി, സിദ്ധരാമയ്യ, തെലങ്കാന മുഖ്യമന്ത്രി രേവന്ത് റെഡ്ഡി, ഹിമാചല് പ്രദേശ് മുഖ്യമന്ത്രി സുഖ്വീന്ദര് സിംഗ് സുഖു, എ.ഐ.സി.സി ജനറല് സെക്രട്ടറി കെ.സി വേണുഗോപാല് എന്നിവരുള്പ്പെടെ പ്രമുഖരും സന്നിഹിതരായിരുന്നു.
https://www.facebook.com/Malayalivartha
