മാനന്തവാടിയില് യുവതിയുടെ മരണത്തില് ഭര്ത്താവിനെതിരെ കുടുംബം
മാനന്തവാടി എടവക പള്ളിക്കലില് യുവതി ആത്മഹത്യ ചെയ്ത സംഭവത്തില് ഭര്ത്താവിനെതിരെ പരാതിയുമായി യുവതിയുടെ കുടുംബം. കുപ്പാടിത്തറ തെറ്റത്ത് അഫ്സില (27) എന്ന യുവതിയെ ആണ് തിങ്കളാഴ്ച ഉച്ചയോടെ താമസിക്കുന്ന ക്വാര്ട്ടേഴ്സിനുള്ളില് തൂങ്ങിമരിച്ച നിലയില് കണ്ടെത്തിയത്. അഫ്സിലയുടെ ഭര്ത്താവ് എടവക പള്ളിക്കല് വടക്കേ പുത്തന്പുരയില് ജാബിറിനെതിരേയാണ് കുടുംബം ആരോപണമുന്നയിക്കുന്നത്. മരണത്തെപ്പറ്റി അന്വേഷിച്ച് കുറ്റക്കാരുടെ പേരില് മാതൃകാപരമായ നടപടി സ്വീകരിക്കണമെന്ന് അഫ്സിലയുടെ സഹോദരങ്ങള് ആവശ്യപ്പെട്ടു.
സഹോദരിയുടെ മകളുടെ മരണത്തെപ്പറ്റി അന്വേഷിക്കണമെന്നാവശ്യപ്പെട്ട് കേളോത്ത് സുലൈമാന് മാനന്തവാടി പൊലീസില് പരാതി നല്കി. അഫ്സിലയെ ഭര്ത്താവ് ജാബിറും അദ്ദേഹത്തിന്റെ വീട്ടുകാരും നിരന്തരമായി ശാരീരികമായും മാനസികമായും പീഡിപ്പിച്ചിരുന്നതായാണ് സുലൈമാന് നല്കിയ പരാതിയിലുള്ളത്. മുന്പ് ഒട്ടേറെത്തവണ പ്രശ്നങ്ങള് ഉണ്ടായിരുന്നെങ്കിലും മഹല്ല് കമ്മിറ്റിയുള്പ്പെടെ ചര്ച്ചചെയ്താണ് പ്രശ്നം പരിഹരിച്ചത്.
പടിഞ്ഞാറത്തറ കുപ്പാടിത്തറയിലെ പരേതനായ തെറ്റത്ത് കുഞ്ഞാലിയുടെയും കേളോത്ത് നബീസയുടെയും മകളാണ് അഫ്സില. മക്കള്: അയ്സിന് ആദം, അയിന് ഹമദ്, അസിന് ഖൈസ്. വയനാട് ഗവ. മെഡിക്കല് കോളജ് മോര്ച്ചറിയിലെ പോസ്റ്റ്മോര്ട്ടത്തിനുശേഷം അഫ്സിലയുടെ മൃതദേഹം ചൊവ്വാഴ്ച വൈകീട്ടോടെ കുപ്പാടിത്തറ നടമ്മല് ജുമാ മസ്ജിദ് കബര്സ്ഥാനില് കബറടക്കി.
https://www.facebook.com/Malayalivartha
