ബിസിനസ് തകര്‍ന്നതില്‍ മനംനൊന്ത് വസ്ത്ര വ്യാപാരി ഭാര്യയെയും മകനെയും കൊലപ്പെടുത്തി ആത്മഹത്യ ചെയ്തു. കര്‍ണാടകയിലെ മാണ്ഡ്യയില്‍ ഇന്നലെയാണ് സംഭവം നടന്നത്. പ്രഭാകര്‍ (65), ഭാര്യ ജ്യോതി (55) മകന്‍ സന്തോഷ് (30) എന്നിവരാണ് മരിച്ചത്.

കര്‍ണാടക സ്‌റ്റേറ്റ് റോഡ് ട്രാന്‍സ്‌പോട്ട് കോര്‍പ്പറേഷന്റെ (കെഎസ്ആര്‍ടിസി) ബസില്‍ സ്ത്രീകള്‍ക്ക് സൗജന്യ യാത്ര അനുവദിച്ചുള്ള ശക്തി യോജന പദ്ധതി നടപ്പാക്കിയതിനുശേഷം തന്റെ ടെക്‌സ്‌റ്റൈല്‍ ബിസിനസ് തകര്‍ന്നുവെന്നാണ് പ്രഭാകറിന്റെ ആത്മഹത്യാക്കുറിപ്പില്‍ പറയുന്നത്. പദ്ധതി നടപ്പിലാക്കിയതിനുശേഷം സ്ത്രീകള്‍ വസ്ത്രങ്ങള്‍ വാങ്ങാനായി വലിയ നഗരങ്ങളിലേയ്ക്ക് പോകുന്നുവെന്നും ഇതിനാല്‍ തന്റെ ബിസിനസില്‍ വലിയ നഷ്ടം നേരിട്ടുവെന്നും കുറിപ്പില്‍ പറയുന്നു.

പ്രഭാകറിനും ജ്യോതിക്കും രണ്ട് മക്കളാണുള്ളത്. മകള്‍ ബംഗളൂരുവിലെ സോഫ്ട്വെയര്‍ കമ്പനിയിലെ ജീവനക്കാരിയാണ്. ഇവര്‍ ബംഗളൂരുവില്‍ തന്നെയാണ് താമസം. മാണ്ഡ്യയില്‍ ഒരു വാടകവീട്ടിലാണ് പ്രഭാകറും ഭാര്യയും മകനും മരുമകളും കഴിഞ്ഞിരുന്നത്.

മുണ്ട് ഉപയോഗിച്ച് കഴുത്തുഞെരിച്ചാണ് പ്രഭാകര്‍ ഭാര്യയെ കൊലപ്പെടുത്തിയത്. മകന്‍ മുറിയിലെത്തിയപ്പോള്‍ മകനെയും കൊലപ്പെടുത്തി. ശേഷം തന്റെ തുണിക്കടയിലെത്തി തൂങ്ങിമരിക്കുകയായിരുന്നു. സംഭവ സമയം മരുമകള്‍ വീട്ടിലുണ്ടായിരുന്നെങ്കിലും മുറിയില്‍ ഉറങ്ങുകയായിരുന്നതിനാല്‍ കൊലപാതക വിവരം അറിഞ്ഞിരുന്നില്ല. ഒരു മാസം മുന്‍പായിരുന്നു പ്രഭാകറിന്റെ മകന്‍ വിവാഹിതനായത്.

ബിസിനസ് നഷ്ടത്തിലായതോടെ ഭവന വായ്പ അടച്ചുതീര്‍ക്കാന്‍ പ്രഭാകറിന് കഴിഞ്ഞിരുന്നില്ല. മൈക്രോ ഫിനാന്‍സ് കമ്പനികളില്‍ നിന്നും സ്വകാര്യ വ്യക്തികളില്‍ നിന്നും അദ്ദേഹം വായ്പയെടുത്തിരുന്നു. വായ്പ നല്‍കുന്നവരുടെ പീഡനം സഹിക്കാന്‍ കഴിയാതെയാണ് കടുത്ത തീരുമാനത്തിലെത്തിയതെന്നും ആത്മഹത്യാക്കുറിപ്പില്‍ വ്യക്തമാക്കുന്നു. സംഭവത്തില്‍ കേസ് രജിസ്റ്റര്‍ ചെയ്ത പൊലീസ് അന്വേഷണം ആരംഭിച്ചു.