വിദ്യാഭ്യാസ സമ്പ്രദായത്തില്‍ പരിഷ്‌കാരങ്ങള്‍ ആവശ്യപ്പെട്ട് വിദ്യാര്‍ത്ഥി പ്രക്ഷോഭം ശക്തമാകുന്നതിനിടെ കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ രാജിവച്ചു. ഇതുസംബന്ധിച്ച് പ്രധാനമന്ത്രി നരേന്ദ്ര മോദിക്ക് പ്രധാന്‍ രാജിക്കത്തയച്ചു. കോക്രോച്ച് ജനതാ പാര്‍ട്ടിയും (സിജെപി) കേന്ദ്രവുമായുള്ള മൂന്നാം റൗണ്ട് ചര്‍ച്ചയ്ക്ക് മുന്നോടിയായി രാജി വിവരം കേന്ദ്രമന്ത്രി സ്വന്തം എക്‌സ് അക്കൗണ്ടിലൂടെ അറിയിക്കുകയായിരുന്നു. ചോദ്യപ്പേപ്പര്‍ ചോര്‍ച്ചയില്‍ പ്രധാന്റെ രാജിയില്ലാതെ പിന്നോട്ടില്ലെന്ന് സിജെപി സ്ഥാപകന്‍ അഭിജീത് ദീപ്‌കെ വ്യക്തമാക്കിയിരുന്നു.

ധര്‍മേന്ദ്ര പ്രധാന്റെ രാജി യുവാക്കളുടെയും ജെന്‍ സിയുടെയും വിജയമാണെന്ന് കോണ്‍ഗ്രസ് സമൂഹമാദ്ധ്യമ പോസ്റ്റില്‍ വ്യക്തമാക്കി. 'വിദ്യാഭ്യാസ സമ്പ്രദായത്തില്‍ പരിഷ്‌കാരങ്ങള്‍ ആവശ്യപ്പെട്ട് രാജ്യത്തുടനീളം ശബ്ദമുയര്‍ത്തിയ കോടിക്കണക്കിന് യുവാക്കളുടെ വിജയമാണിത്. യുവാക്കളുടെ സത്യത്തിലൂടെ പ്രധാനമന്ത്രി നരേന്ദ്ര മോദിയുടെ അഹങ്കാരം പരാജയപ്പെട്ടു. അദ്ദേഹത്തിന്റെ നുണകള്‍ തുറന്നുകാട്ടി. യുവ പ്രതിഷേധക്കാര്‍ കഴിവില്ലാത്തവനും അഴിമതിക്കാരനുമായ വിദ്യാഭ്യാസ മന്ത്രിയെ രാജിവയ്ക്കാന്‍ നിര്‍ബന്ധിതനാക്കി.

നീറ്റ് പേപ്പര്‍ ചോര്‍ച്ചയുടെ ആദ്യ ദിവസം മുതല്‍ പ്രതിപക്ഷ നേതാവ് രാഹുല്‍ ഗാന്ധിയും കോണ്‍ഗ്രസും യുവാക്കള്‍ക്ക് നീതി ലഭിക്കുന്നതിനായി തെരുവുകളില്‍ നിന്ന് പാര്‍ലമെന്റ് വരെ പോരാടുകയായിരുന്നു. വിദ്യാഭ്യാസ സമ്പ്രദായം പരിഷ്‌കരിക്കുന്നതുവരെ പോരാട്ടം തുടരും. പ്രതിഷേധിക്കുന്ന യുവാക്കള്‍ക്കെതിരെ ലാത്തി ചാര്‍ജും പെല്ലറ്റ് തോക്കുകളും ഉപയോഗിച്ചതിന് മോദി മാപ്പ് പറയണം' കോണ്‍ഗ്രസ് ആവശ്യപ്പെട്ടു.