കര്‍ണാടകയില്‍ ജോലി ചെയ്യുന്ന യുവതിയെ അച്ഛനും അമ്മാവനും ചേര്‍ന്ന് കൊലപ്പെടുത്തി. മധ്യപ്രദേശിലെ ഗ്വാളിയോര്‍ ജില്ലയിലെ ദാബ്ര നിവാസിയായ നന്ദിനി യാദവാണ് (21) കൊല്ലപ്പെട്ടത്. യുവതി അന്യ സംസ്ഥാനത്തു ജോലിക്കു പോയതും തലമുടി മുറിച്ചതും വീട്ടുകാര്‍ക്ക് എതിര്‍പ്പായിരുന്നു. ഒപ്പം ജോലിസ്ഥലത്തുള്ള യുവാവിനെ വീട്ടിലേക്ക് കൂട്ടിക്കൊണ്ടുവന്നതിനെയും കുടുംബം എതിര്‍ത്തു. എന്നാല്‍ യുവാവ് സഹോദര തുല്യനാണെന്നാണ് യുവതി പറഞ്ഞിരുന്നത്. രക്ഷാബന്ധന്‍ ആഘോഷത്തിനാണ് ജോലിസ്ഥലത്തു പരിചയപ്പെട്ട യുവാവിനെ നന്ദിനി നാട്ടിലേക്ക് കൊണ്ടുവന്നത്.

നന്ദിനിയെ പിതാവ് ഭഗവാന്‍ സിങ് യാദവും അമ്മാവന്‍ സന്തോഷ് സിങ് യാദവും ചേര്‍ന്നാണ് കൊലപ്പെടുത്തിയത്. ഈ സമയം യുവതിയുടെ സഹോദരിയേയും അമ്മയെയും മറ്റൊരു മുറിയില്‍ പൂട്ടിയിട്ടു. സംഭവത്തില്‍ പിതാവിനെ പൊലീസ് അറസ്റ്റ് ചെയ്തു. നന്ദിനിക്കൊപ്പം എത്തിയ യുവാവിനെയും പ്രതികള്‍ ആക്രമിച്ചു. തുടര്‍ന്ന് യുവാവ് ഓടി രക്ഷപ്പെട്ടു.

മുടി വെട്ടി ചെറുതാക്കി മറ്റൊരു സംസ്ഥാനത്ത് ജോലിക്കുപോയി മകള്‍ കുടുംബത്തിനു നാണക്കേട് ഉണ്ടാക്കിയെന്ന് ആരോപിച്ചാണ് പ്രതികള്‍ നന്ദിനിയെ ആക്രമിച്ചത്. തുടര്‍ന്ന് നന്ദിനിയുടെ തല ചുമരില്‍ ഇടിക്കുകയും വടികൊണ്ട് അടിക്കുകയും ചെയ്തു. ഒടുവില്‍ യുവതിയുടെ കഴുത്തുഞെരിച്ച് കൊലപ്പെടുത്തിയ ശേഷം പിതാവും അമ്മാവനും ഓടി രക്ഷപ്പെടുകയായിരുന്നു. ബഹളം കേട്ട അയല്‍ക്കാരാണ് പൊലീസില്‍ വിവരം അറിയിച്ചത്.