സംസ്ഥാനത്തെ പോളിംഗ് സ്റ്റേഷനുകളുടെ പുനഃക്രമീകരണത്തിന് അംഗീകാരം നൽകി കേന്ദ്ര തെരഞ്ഞെടുപ്പ് കമ്മീഷൻ . വോട്ടർമാർക്ക് കൂടുതൽ സൗകര്യങ്ങൾ ഉറപ്പാക്കുന്നതിന്റെ ഭാഗമായാണ് കേരളം സമർപ്പിച്ച പുനഃക്രമീകരണ നിർദേശങ്ങൾക്ക് കമ്മീഷൻ അംഗീകാരം നൽകിയത്.പുനഃക്രമീകരണത്തിന് മുമ്പ് സംസ്ഥാനത്ത് 30,471 പോളിംഗ് സ്റ്റേഷനുകളാണുണ്ടായിരുന്നത്. ഇതിൽ 216 പുതിയ പോളിംഗ് സ്റ്റേഷനുകൾ അനുവദിച്ചു.

അഞ്ച് പോളിംഗ് സ്റ്റേഷനുകൾ സംയോജിപ്പിക്കുകയും 178 സ്റ്റേഷനുകൾ മാറ്റിസ്ഥാപിക്കുകയും ചെയ്തു. ഇതോടെ സംസ്ഥാനത്തെ ആകെ പോളിംഗ് സ്റ്റേഷനുകളുടെ എണ്ണം 30,682 ആയി ഉയർന്നു.

അതേസമയം, എസ്ഐആർ നടപടികളുടെ ഭാഗമായി വോട്ടർപട്ടികയിൽ നിന്ന് ഒഴിവാക്കപ്പെട്ടവർക്ക് വീണ്ടും പേര് ചേർക്കാൻ അവസരം നൽകണമെന്ന് കേന്ദ്ര തെരഞ്ഞെടുപ്പ് കമ്മീഷൻ നിർദേശിച്ചു. മഹാരാഷ്ട്ര, ഹരിയാന, ആന്ധ്രപ്രദേശ്, ജാർഖണ്ഡ്, തെലങ്കാന, നാഗാലാൻഡ് എന്നീ സംസ്ഥാനങ്ങളിലെയും ഡൽഹിയിലെയും ചീഫ് ഇലക്ടറൽ ഓഫീസർമാർക്കാണ് നിർദേശം നൽകിയത്.