ഇത് ശായന് ജമാല്, നാലു വയസില് സ്കൂള് ടീമില് കളിയ്ക്കാന് ഇടം നേടിയ സച്ചിന്റെ പിന്ഗാമി
ക്രിക്കറ്റിന്റെ ദൈവം എന്നറിയപ്പെടുന്ന സച്ചിന് ടെണ്ടുല്ക്കറുടെ പാതയിലേക്ക് ശായന് ജമാല് തന്റെ എല് കെ ജി പ്രായത്തില് തന്നെ സ്കൂള് ക്രിക്കറ്റ് ടീമില് ഇടം നേടിയിരിക്കുകയാണ് ശായന് ജമാല് എന്ന അത്ഭുത ബാലന്. നാലു വയസുകാരന് ക്രിക്കറ്റ് ടീമിലെന്നു കേള്ക്കുമ്പോള് അതിശയം തോന്നുന്നവര് ശായന് കളിക്കുന്ന ഓരോ ഷോട്ടുകള് കണ്ടാല് അത്ഭുതപ്പെടുമെന്നുള്ള കാര്യം ഉറപ്പ്. പ്രതിഭ ഉണ്ടാവുകയെന്നതും രാജ്യത്തിന്റെ ടീമിന് വേണ്ടി കളിക്കാനാവുക എന്നതും രണ്ടും രണ്ടാണ്. എന്നാല് ക്രിക്കറ്റിന്റെ ഭാവി ചരിത്രത്തില് ശായന് എവിടംവരെ എത്തിച്ചേരുമെന്ന് പറയുന്നത് ബുദ്ധിമുട്ടാണ്.
പ്രാക്ടീസ് ചെയ്യുന്ന ശായന് ജമാലിന്റെ വീഡിയോ ഇതിനോടകം ദേശീയ മാധ്യമങ്ങള് എല്ലാം തന്നെ റിപ്പോര്ട്ട് ചെയ്തിട്ടുണ്ട്. സാധാരണ ഇതേ പ്രായത്തിലുള്ള കുട്ടികള് ബാറ്റു പിടിക്കുന്നത് പോലും പഠിക്കില്ലെന്നുള്ളത് വാസ്തവമാണെന്നിരിക്കെ കുട്ടി ശായന് ക്രിക്കറ്റിന്റെ ഓരോ ശൈലികളിമുള്ള ഷോട്ടുകളും നിഷ്പ്രയാസം ഈ കുഞ്ഞു പ്രായത്തില് വശത്താക്കിയിട്ടുണ്ട്.
എതിരെ വരുന്ന പന്തിനെ ശായന് നേരിടുന്ന ശൈലിയും ശ്രദ്ധേയമാണ്, പന്തിന്റെ വേഗത കൃത്യമായി കണക്കാക്കി ആത്മവിശ്വാസത്തോടെയുള്ള ഒരോ ഷോട്ടുകളും ആരെയും അതിശയിപ്പിക്കുന്നതാണ്. നിലവില് 12 വയസില് താഴെയുള്ളവരുടെ സ്കൂള് ടീമില് കുട്ടിക്രിക്കറ്ററെ എടുത്തു കഴിഞ്ഞു. ഡല്ഹി സംഗം വിഹാറിലെ ഹംദര്ദ് പബ്ലിക് സ്കൂളിലെ സ്കൂള് തലങ്ങളിലുള്ള മാച്ചുകളില് ശായന് ഇപ്പോള് ടീമിനായി ഇറങ്ങുന്നു.
ഇന്ത്യന് ടീമില് കളിക്കണമെന്ന് ഇപ്പോഴേ ആഗ്രഹമുള്ള ശായന് യുവതാരം വിരാട് കോഹ്ലിയുടെ വലിയ ഫാന് ആണ്. വിരാട് കൊഹ്ലിയെ തന്റെ മാതൃക പുരുഷനാണെന്നും ശായന് പറയുന്നു. സ്കൂള് തലങ്ങളിലെ പല മത്സരങ്ങളും നടക്കുമ്പോള് ശായന് കളിക്കുന്നത് കാണാന് നിരവധിപേര് ഉണ്ടാകുന്നതും പതിവാണ്.
കുട്ടി ശായന് കളിക്കുന്നത് കണ്ട കോച്ച് പറയുന്നത് ഭാവിയില് തീര്ച്ചയായും ക്രിക്കറ്റിന്റെ ചരിത്രത്തില് ശായന് ഇടം നേടുമെന്ന് തന്നെയാണ്. ഇത്ര ചെറുപ്രായത്തില് ക്രിക്കറ്റിനോടുള്ള ശായന്റെ മനോഭാവം തന്നെ അത്ഭുതപ്പെടുത്തിയെന്നു കോച്ച് ഉത്തം പറയുന്നു. ഈ പ്രായത്തില് ശായന്റെ ഫിറ്റ്നസ് ലെവല് അതിശയിപ്പിക്കുന്നതാണ്, ശായന്റെ കണ്ണുകളില് ക്രിക്കറ്റിനെ കാണാന് കഴിയുന്നുണ്ടെന്നും ശായന്റെ കോച്ചായ പഴയ രഞ്ജി താരം ഉത്തം മജുന്ദാര് പറയുന്നു.
ക്രിക്കന്റിന്റെ ഭാവിയില് സച്ചിന്റെ പകരക്കാരാണെന്നു അറിയപ്പെടുന്നതിനപ്പുറം ഭാവി ഇന്ത്യന് ക്രിക്കറ്റ് ശായന് ജമാലിന്റെ പേരില് അറിയപ്പെടുമോ എന്നുള്ള കാര്യം ഭാവിയില് കണ്ടറിയാം.
https://www.facebook.com/Malayalivartha
