ശിഷ്യരിലൂടെ കോച്ചിന്റെ മധുരപ്രതികാരം: ആരോടും പരാതിയില്ലാതെ എപ്പോഴും ചിരിക്കുന്ന ഗോപിചന്ദ് എന്ന പയ്യന് രാജ്യത്തിന് എങ്ങനെ രണ്ട് ഒളിമ്പിക് മെഡലുകള് സമ്മാനിച്ചെന്ന്
മികച്ച കളിക്കാരന് അതിലും മികച്ച കോച്ച് അതാണ് ഗോപിചന്ദ്. ഒളിമ്പിക് ചരിത്രത്തില് ഇന്ത്യന് വനിതാ താരത്തിന്റെ ഏറ്റവും വലിയ നേട്ടത്തിനരികില് നില്ക്കുകയാണ് പി.വി സിന്ധു എന്ന ബാഡ്മിന്റണ് താരം. വനിതാ സിംഗിള്സ് ഫൈനലില് ഇന്നു വൈകിട്ട് സിന്ധു കളിക്കാനിറങ്ങുമ്പോള് കോര്ട്ടിനരികില് സൗമ്യ സാന്നിധ്യമായി അദ്ദേഹമുണ്ടാകും. ഇന്ത്യന് ബാഡ്മിന്റണിന്റെ മുഖഛായ മാറ്റിമറിച്ച പുല്ലേല ഗോപിചന്ദ്.
28ാം വയസ്സില് കോര്ട്ടിനോട് വിടപറഞ്ഞ് പരിശീലനക്കുപ്പായം സ്വീകരിച്ചയാളാണ് ഗോപിചന്ദ്.തനിക്ക് നേടാനാകാതെ പോയത് ശിഷ്യരിലൂടെ സാധിക്കണമെന്ന ആഗ്രഹമാണ് ഗോപിചന്ദിന്റെ ആ തീരുമാനത്തിന് പിന്നില്. 1992 ബാഴ്സലോണ ഒളിമ്പിക്സില് പങ്കെടുത്തിട്ടുള്ള അദ്ദേഹം, 2012ല് സൈനയിലൂടെ ഒളിമ്പിക് വെങ്കലമെഡല് ഇന്ത്യയിലെത്തിച്ചു. ഇപ്പോള് സിന്ധുവിലൂടെ കുറഞ്ഞത് വെള്ളിയെങ്കിലും ഉറപ്പാക്കിയിരിക്കുന്നു.
രണ്ടാമത്തെ ഒളിമ്പിക് മെഡലിന് അവകാശിയാകാന് ഒരുങ്ങിനില്ക്കുകയാണ് ഗോപിചന്ദ്. നാലുവര്ഷം മുമ്പ് സൈന നേവാള് ലണ്ടനില് വെങ്കലമെഡല് നേടിയപ്പോള് സൈനയുടെ പരിശീലകനും ഗോപിചന്ദായിരുന്നു. സൈന പിന്നീട് ഗോപിചന്ദ് അക്കാദമിയില്നിന്ന് മാറി പുതിയ പരിശീലകരെത്തേടി.
സൈന നേവാളും പി.വി സിന്ധുവും മുഖ്യധാരയിലേക്ക് എത്തുന്നതിന് മുമ്പ് ഇന്ത്യന് ബാഡ്മിന്റണിന്റെ മുഖമായിരുന്നു പുല്ലേല ഗോപിചന്ദ്. ഓള് ഇംഗ്ലണ്ട് ബാഡ്മിന്റണ് ചാമ്പ്യനായ ഗോപിചന്ദ് കളി നിര്ത്തിയശേഷം പരിശീലകചുമതലയേറ്റെടുക്കുകയായിരുന്നു. ഹൈദരാബാദിലെ ഗച്ചിബൗളിയില് ആംരംഭിച്ച ഗോപിചന്ദ് അക്കാദമിയില്നിന്നാണ് സൈന തുടങ്ങിയത്.
സിന്ധുവും റിയോ ഒളിമ്പിക്സില് ക്വാര്ട്ടര് വരെ മുന്നേറിയ കെ.ശ്രീകാന്തും ഗോപിചന്ദ് അക്കാദമിയില്നിന്ന് വരുന്നവരാണ്. ഇവിടെ ഇവരുടെ പിന്ഗാമികളാകാന് ഒട്ടേറെ താരങ്ങള് തയ്യാറെടുക്കുന്നു. ലോകത്തെ മുന്നിര താരങ്ങളെ പരാജയപ്പെടുത്താനുള്ള ശേഷി ഇന്ത്യന് താരങ്ങള്ക്കുണ്ടെന്ന് തെളിയിച്ച പരിശീലകനാണ് ഗോപിചന്ദ്.
ഇന്ത്യയിലെ മറ്റ് പരിശീലകരില്നിന്നെല്ലാം വ്യത്യസ്തനാണ് ഗോപിചന്ദ്. അക്കാദമിയുട പേരില് കാശടിച്ചുമാറ്റുന്ന പരിശീലകര്ക്കൊപ്പം ഗോപിചന്ദിനെ കാണില്ല. പരാതിപറഞ്ഞ് അധികൃതര്ക്കുമുന്നില് കൈനീട്ടിനില്ക്കുന്നവര്ക്കൊപ്പവും അദ്ദേഹമുണ്ടാകില്ല. തന്റെ ശിഷ്യര് വിജയങ്ങളിലേക്ക് കുതിക്കുമ്പോള്, കോര്ട്ടിനരികില് പുഞ്ചിരിയോടെ അദ്ദേഹമുണ്ടാകും. ആ സൗമ്യ സാന്നിധ്യമാണ് സിന്ധുവിനെ ഒളിമ്പിക് സ്വര്ണത്തിനരികില് എത്തിച്ചതും. സിന്ധു തന്റെ നേട്ടത്തിന്റെ മുഴുവന് ക്രെഡിറ്റ് നല്കുന്നതും ഈ കൊച്ചു കോച്ചിനാണ്.
https://www.facebook.com/Malayalivartha