മറീന ബീച്ചില് പ്രതിഷേധ സമരം നടത്തിയതിന് സ്റ്റാലിനെതിരെ കേസെടുത്തു
മറീന ബീച്ചില് പ്രതിഷേധ സമരം നടത്തിയതിന് ഡി.എം.കെ വര്ക്കിങ് പ്രസിഡന്റ് എം.കെ സ്റ്റാലിനെതിരെ കേസെടുത്തു. കഴിഞ്ഞ ദിവസം നിയമസഭയില് നടന്ന സംഭവങ്ങളില് പ്രതിഷേധിച്ചാണ് സ്റ്റാലിന് മറീനാബിച്ചില് സമരം നടത്തിയത്. മുഖ്യമന്ത്രി എടപ്പാടി പളനിസാമിയുടെ ഭൂരിപക്ഷം തെളിയിക്കാനായി നിയമസഭയില് വിശ്വാസവോട്ട് നടക്കുന്നതിനിടെ അരങ്ങേറിയ സംഭവങ്ങളുടെ തുടര്ച്ചയായാണ് പ്രതിഷേധ സമരം നടന്നത്.
വിശ്വാസ വോട്ടെടുപ്പിന് രഹസ്യ ബാലറ്റ് അനുവദിക്കണമെന്നാവശ്യപ്പെട്ട് സ്റ്റാലിനും മറ്റംഗങ്ങളും പ്രതിഷേധിച്ചെങ്കിലും സ്പീക്കര് അനുവദിച്ചില്ല. തുടര്ന്ന് അക്രമാസക്തരായ ഡി.എം.കെ എം.എല്.എമാരെ സ്പീക്കര് പി. ധനപാല് പുറത്താക്കിയാണ് വേട്ടെടുപ്പ് നടത്തിയത്. വസ്ത്രം വലിച്ചുകീറിയ നിലയില് പുറത്തു വന്ന സ്റ്റാലിന് സ്പീക്കറുടെ നടപടിക്കെതിരെ മറീന ബീച്ചില് നിരാഹാര സമരം നടത്തിയിരുന്നു. അതേതുടര്ന്ന് സംഘര്ഷമുണ്ടാവുകയും പൊലീസ് കേസെടുക്കുകയുമായിരുന്നു.
89 എം.എല്.എമാരുള്ള പ്രതിപക്ഷത്തെ പുറത്താക്കിയതിനാല് പന്നീര്ശെല്വം പക്ഷത്തെ 11 പേരുടെ എതിര്പ്പോടെ 122 എം.എല്.എമാരുടെ പിന്തുണയാണ് വോട്ടെടുപ്പില് പളനിസാമിക്ക് ലഭിച്ചത്. നിയമസഭയില് ഭൂരിപക്ഷം തെളിയിച്ച് സര്ക്കാറുണ്ടാക്കാന് ക്ഷണിച്ചതില് എടപ്പാടി പളനിസാമി ഗവര്ണറെ കണ്ട് നന്ദി അറിയിച്ചു. അതേസമയം, നിയമസഭയിലെ സംഭവങ്ങളെ തുടര്ന്ന് സ്പീക്കര്ക്കെതിരെ സ്റ്റാലിനും ഗവര്ണര്ക്ക് പരാതി നല്കും.
https://www.facebook.com/Malayalivartha
