വെള്ളം കൂടുതലുപയോഗിച്ചെന്ന് ആരോപിച്ച് ബംഗലൂരുവില് വീണ്ടും കടുത്ത വംശീയപീഡനം; വീട്ടുടമ വിദ്യാര്ത്ഥിയെക്കൊണ്ട് ചെരുപ്പ് നക്കിച്ചു
അരുണാചല് പ്രദേശുകാരനായ വിദ്യാര്ത്ഥിക്ക് ബംഗളൂരുവില് വാടകവീടുടമയുടെ ക്രൂര പീഡനം. െ്രെകസ്റ്റ് യൂണിവേഴ്സിറ്റിയിലെ നാലാം സെമസ്റ്റര് വിദ്യാര്ത്ഥിയാണ് വംശീയ പീഡനത്തിനിരയായത്. വെള്ളം കൂടുതല് ഉപയോഗിച്ചു എന്നാരോപിച്ച് ഇയാളെ തല്ലിച്ചതച്ച ശേഷം ഷൂസില് നക്കിക്കുകയും, ഷൂസില് ഉമ്മ വെപ്പിക്കുകയും ചെയ്യുകയായിരുന്നു.
വീട്ടുടമ ഹേമന്ത് കുമാറിനെതിരെ കേസ് രജിസ്റ്റര് ചെയ്തിട്ടുണ്ട്. സംഭവം നടക്കുമ്പോള് ഹേമന്ത് മദ്യപിച്ചിട്ടുണ്ടായിരുന്നു. മകന് പീഡിപ്പിക്കപ്പെട്ടതറിഞ്ഞയുടന് ഹിഗിയോയുടെ അമ്മ യേം ഹിഗിയോ ബംഗളൂരുവിലേക്ക് യാത്രതിരിച്ചിട്ടുണ്ട്. മകന് കൂട്ടുകാരുടെ കൂടെ ബംഗളൂരുവില് താമസിക്കുന്നു എന്നു മാത്രമേ തനിക്കറിയൂ എന്നും അമ്മ യേം പോലീസിനോട് പറഞ്ഞു.
എന്നെ തല്ലിച്ചതച്ച ശേഷവും അയാള് നിര്ത്തിയില്ല. അയാളുടെ ഷൂസ് നക്കി വൃത്തിയാക്കാനും ഉമ്മ വെക്കാനും നിര്ബന്ധിച്ചു. അത്രയും നേരം അയാള് എന്നെ തല്ലിക്കൊണ്ടിരിക്കുകയായിരുന്നു. കൂടുതല് അടി വാങ്ങാന് കഴിയാതായപ്പോള് വേറെ വഴിയില്ലാതെ എനിക്കത് ചെയ്യേണ്ടി വന്നു. ഇതൊക്കെ കഴിഞ്ഞ് എന്നെ വീട്ടില് നിന്നും ഇറക്കിവിട്ടു. മൂന്നാം നിലയില് നിന്നും എന്റെ ട്രോളി താഴേക്ക് എറിയുകപോലും ചെയ്തു. അത് തീര്ത്തും അപമാനകരമായിരുന്നു, ഹിഗിയോ ഗണ്ടേ പറയുന്നു.
വടക്കുകിഴക്കന് സംസ്ഥാനങ്ങളില് നിന്നുള്ള വിദ്യാര്ത്ഥികള്ക്കെതിരെ കടുത്ത വംശീയവികാരമാണ് കര്ണാടകയടക്കമുള്ള സംസ്ഥാനങ്ങളില് നിലനില്ക്കുന്നത്. ഇതിനെതിരെയുള്ള നടപടികള് സര്ക്കാര് സ്വീകരിക്കുമെന്ന് പറയുമ്പോഴും, അതിക്രമങ്ങള് നിര്ബാധം തുടരുകയാണ്.
https://www.facebook.com/Malayalivartha
