മനോഹര് പരീക്കര് ഗോവ മുഖ്യമന്ത്രി; ഗോവയില് ബിജെപി സഖ്യത്തിന് 21 എംഎല്എമാരുടെ പിന്തുണയുണ്ടെന്നാണു റിപ്പോര്ട്ട്
പ്രതിരോധ മന്ത്രി മനോഹര് പരീക്കര് ഗോവ മുഖ്യമന്ത്രിയാകും. കേന്ദ്രമന്ത്രി സ്ഥാനം രാജിവെപ്പിച്ച് പരീക്കറെ സംസ്ഥാന രാഷ്ട്രീയത്തിലേക്ക് തിരികെ കൊണ്ടുവരാനാണ് ബി.ജെ.പിയുടെ നീക്കം. ഇതിന്റെ ഭാഗമായി പരീക്കര് കേന്ദ്ര പ്രതിരോധ മന്ത്രിസ്ഥാനം രാജിവയ്ക്കുമെന്നാണു സൂചന. ഗോവയില് ബിജെപി സഖ്യത്തിന് 21 എംഎല്എമാരുടെ പിന്തുണയുണ്ടെന്നാണു റിപ്പോര്ട്ടുകള്. 13 സീറ്റാണ് ബിജെപി ഇവിടെ നേടിയത്. കേവല ഭൂരിപക്ഷത്തിന് 21 എംഎല്എമാരുടെ പിന്തുണയാണു വേണ്ടത്. സര്ക്കാര് രൂപീകരണ അവകാശവാദവുമായി പരീക്കര് ഉള്പ്പെടുന്ന സംഘം ഗവര്ണര് മൃദുല സിന്ഹയെ കണ്ടു.
അതേസമയം, താനിതുവരെ രാജിവച്ചിട്ടില്ലെന്നു ഗവര്ണറെ കണ്ടു പുറത്തിറങ്ങിയശേഷം പരീക്കര് വാര്ത്താ ഏജന്സിയായ എഎന്ഐയോട് അറിയിച്ചു. നേരത്തേ പരീക്കര് രാജിവച്ചതായി റിപ്പോര്ട്ടുകളുണ്ടായിരുന്നു. ഭൂരിപക്ഷം നേടാനായില്ലെങ്കിലും ജനങ്ങള് നല്കിയ വിധിയാണിതെന്നു പിന്നീടു നടത്തിയ വാര്ത്താസമ്മേളനത്തില് പരീക്കര് വ്യക്തമാക്കി. സഖ്യകക്ഷികള്ക്കെല്ലാമായി കേവല ഭൂരിപക്ഷമായ 21 എംഎല്എമാരുടെ പിന്തുണ ഞങ്ങള്ക്കുണ്ട്. സര്ക്കാര് രൂപീകരണത്തിന് അവകാശവാദം ഉന്നയിച്ചു ഞങ്ങള് ഗവര്ണറെ കണ്ടു. ഔദ്യോഗിക ക്ഷണം ലഭിച്ചതിനുശേഷം സത്യപ്രതിജ്ഞയുടെ തീയതി നിശ്ചയിക്കും. തന്നില് വിശ്വാസം പ്രകടിപ്പിച്ച ബിജെപി നേതൃത്വത്തോടും എംഎല്എമാരോടുമുള്ള നന്ദി അറിയിക്കുന്നു പരീക്കര് കൂട്ടിച്ചേര്ത്തു.
മനോഹര് പരീക്കറെ മുഖ്യമന്ത്രിയാക്കിയാല് പിന്തുണയ്ക്കാമെന്ന് മഹാരാഷ്ട്രവാദി ഗോമന്തക് പാര്ട്ടിയും (എംജിപി) ഗോവ ഫോര്വേഡ് പാര്ട്ടിയും (ജിഎഫ്പി)യും അറിയിച്ചിരുന്നതായി നിതിന് ഗഡ്കരി വാര്ത്താസമ്മേളനത്തില് വ്യക്തമാക്കി. ഇരു പാര്ട്ടികള്ക്കും മൂന്നു വീതം എംഎല്എമാരുണ്ട്. മാത്രമല്ല, സ്വതന്ത്രരായ മൂന്ന് എംഎല്എമാരുടെ പിന്തുണയും ബിജെപി നേടിയെടുത്തിട്ടുണ്ട്. ഗോവയ്ക്കു തന്നെ ആവശ്യമുണ്ടെങ്കില് പ്രതിരോധമന്ത്രി സ്ഥാനത്തുനിന്നു രാജിവച്ചു മുഖ്യമന്ത്രിയാകാന് തയാറാണെന്നു പരീക്കര് അറിയിച്ചതായും ഗഡ്കരി കൂട്ടിച്ചേര്ത്തു. മുഖ്യമന്ത്രിയാകുന്നതിനു മുന്പ് അദ്ദേഹം രാജിവച്ചേ തീരുകയുള്ളൂ. എന്നാല് ഇതുവരെ രാജിവച്ചിട്ടില്ലെന്നും ഗഡ്കരി വ്യക്തമാക്കി. ഗോവയ്ക്കു സ്ഥിരതയുള്ള സര്ക്കാരിനെ നല്കും ഗഡ്കരി വ്യക്തമാക്കി.
അതേസമയം, ഗോവയിലെ സര്ക്കാര് രൂപീകരണ ചര്ച്ചകളില് ഇടപെട്ട് അനുകൂല തീരുമാനം ഉണ്ടാക്കാന് ബിജെപി അധ്യക്ഷന് അമിത് ഷായാണു നിതിന് ഗഡ്കരിയെ ഗോവയിലേക്ക് അയച്ചത്. അര്ധരാത്രി ഗോവയിലെത്തിയ അദ്ദേഹം പുലര്ച്ചെ മൂന്നുമണിവരെ സ്വതന്ത്ര എംഎല്എമാരുമായി ചര്ച്ച നടത്തി. പിന്നാലെ പ്രധാനമന്ത്രി നരേന്ദ്ര മോദിയും അമിത് ഷായുമായി സംസാരിച്ചതിനെത്തുടര്ന്നാണു പരീക്കറെ സംസ്ഥാന രാഷ്ട്രീയത്തിലേക്കു തിരികെ കൊണ്ടുവരാന് തീരുമാനമായത്.
https://www.facebook.com/Malayalivartha
