ഗോവയില് ബിജെപി അധികാരത്തിലേക്ക്; മനോഹര് പരീക്കര് നാളെ മുഖ്യമന്ത്രിയായി സത്യപ്രതിജ്ഞ ചെയ്യും
ഗോവ മുഖ്യമന്ത്രിയായി മനോഹര് പരീക്കര് നാളെ സത്യപ്രതിജ്ഞ ചെയ്യും. സത്യപ്രതിജ്ഞ വൈകരുതെന്ന് കേന്ദ്ര സര്ക്കാര് നിലപാടെടുത്തതിനെ തുടര്ന്നാണ് നടപടി. ചൊവ്വാഴ്ച വൈകിട്ട് അഞ്ചുമണിക്കാണ് ചടങ്ങ്. നിലവില് കേന്ദ്ര പ്രതിരോധമന്ത്രിയായ പരീക്കര്, കേന്ദ്രമന്ത്രിസ്ഥാനം എപ്പോള് രാജിവയ്ക്കുമെന്ന് വ്യക്തമല്ല. പരീക്കര് മുഖ്യമന്ത്രിയാകണമെന്നു ഗോവയില് ബിജെപി എംഎല്എമാര് പ്രമേയം പാസാക്കിയിരുന്നു.
ബിജെപിക്കു സര്ക്കാരുണ്ടാക്കാന് പിന്തുണ വാഗ്ദാനം ചെയ്ത മഹാരാഷ്ട്രവാദി ഗോമന്തക് പാര്ട്ടിയും (എംജിപി) ഗോവ ഫോര്വേഡ് പാര്ട്ടിയും (ജിഎഫ്പി) പരീക്കര് മുഖ്യമന്ത്രിയാകണമെന്ന് ആവശ്യമുന്നയിച്ചു. ഇതിനു പിന്നാലെയാണ് ഗോവയിലേക്ക് പരീക്കറിന്റെ തിരിച്ചുവരവ്. ഗോവ മുഖ്യമന്ത്രി സ്ഥാനം രാജിവച്ചാണു പരീക്കര് 2014 നവംബറില് കേന്ദ്ര മന്ത്രിസഭയില് അംഗമായത്.
പിന്നാലെ യുപിയില്നിന്ന് രാജ്യസഭാംഗവുമായി. പരീക്കറിന്റെ പിന്ഗാമിയായി ഗോവ മുഖ്യമന്ത്രി സ്ഥാനം ഏറ്റെടുത്ത ലക്ഷ്മികാന്ത് പര്സേക്കര് ഇത്തവണ തിരഞ്ഞെടുപ്പില് പരാജയപ്പെട്ടിരുന്നു. മുഖ്യമന്ത്രിയാകുന്നതോടെ ആറു മാസത്തിനുള്ളില് പരീക്കറിന് ഗോവയിലെ ഏതെങ്കിലും മണ്ഡലത്തില്നിന്ന് തിരഞ്ഞെടുപ്പില് മല്സരിച്ചു ജയിക്കണം.
കേവലഭൂരിപക്ഷത്തിന് ആവശ്യമായ 21 എംഎല്എമാരുടെ പിന്തുണ വ്യക്തമാക്കുന്ന കത്ത് പരീക്കര് സംസ്ഥാന ഗവര്ണര് മൃദുല സിന്ഹയ്ക്കു ഇന്നലെ കൈമാറിയിരുന്നു. നാല്പതംഗ നിയമസഭയിലേക്കു ബിജെപിയുടെ 13 പേരാണു ജയിച്ചത്. കോണ്ഗ്രസ് 17 സീറ്റും നേടി. മൂന്നു സീറ്റുകള് വീതമുള്ള എംജിപിക്കും ജിഎഫ്പിക്കും പുറമെ രണ്ടു സ്വതന്ത്ര എംഎല്എമാരും പിന്തുണ വ്യക്തമാക്കിയതോടെ ബിജെപിക്കു സര്ക്കാരുണ്ടാക്കാന് സാഹചര്യമായി.
https://www.facebook.com/Malayalivartha
