"ഈ രാജ്യത്തിന്റെ യഥാര്ത്ഥ സന്തതികള് എന്നതിനാല് ഞങ്ങളെ കൊന്നൊടുക്കുന്നതോടെ ഈ രാജ്യം തന്നെ ഇല്ലാതാവും"
'തുല്യത നിഷേധിക്കുന്നത് എല്ലാം നിഷേധിക്കുന്നു' ഏതാനം മണിക്കൂറുകള്ക്ക് മുന്പ് ആത്മഹത്യ ചെയ്ത ജെഎന് യുവിലെ ദളിത് വിദ്യാര്ഥി കൃഷ് രജനിയുടെ അവസാന ഫേസ്ബുക്ക് പോസ്റ്റ് തുടങ്ങുന്നതും അവസാനിക്കുന്നതും ഈ വരികളിലാണ്.
എംഫില് പിഎച്ച്ഡി പ്രവേശനത്തില് തുല്യതയില്ല. വൈവവോസിയില് തുല്യതയില്ല, ആകെയുള്ളത് തുല്യതയുടെ നിഷേധം മാത്രം. പ്രൊഫ. തൊറാട്ടിന്റെ ശുപാര്ശകള് അട്ടിമറിച്ചു. വിദ്യാര്ഥി പ്രതിഷേധങ്ങള്ക്ക് അഡ്മിനിസ്ട്രേറ്റീവ് ബ്ലോക്കില് പോലും ഇടം നിഷേധിച്ചു. പാര്ശ്വവല്ക്കരിക്കപ്പെട്ടവര്ക്ക് വിദ്യാഭ്യാസം നിഷേധിക്കുന്നു. തുല്യത നിഷേധിക്കപ്പെടുമ്പോള് എല്ലാം നിഷേധിക്കപ്പെടുന്നു.'' കൃഷ് രജനി തന്റെ അവസാന ഫേസ്ബുക്ക് പോസ്റ്റില് പറയുന്നു.
ഹൈദരാബാദ് സര്വകലാശാലയില് അധികൃതരുടെ പീഡനത്തെ തുടര്ന്ന് ആത്മഹത്യ ചെയ്ത രോഹിത് വെമുലയുടെ മരണം രാജ്യത്തെ പിടിച്ചുകുലുക്കിയതിനു പിന്നാലെയാണ് ഒരു ആത്മഹത്യ കൂടി ഉണ്ടായിരിക്കുന്നത്. രോഹിത് വെമുലയ്ക്ക് നീതിവേണം എന്ന മുദ്രാവാക്യം ഉയര്ത്തിയ പ്രതിഷേധ പേരാട്ടങ്ങളില് ശക്തമായി ഇടപെട്ട വിദ്യാര്ഥികൂടിയാണ് ഇന്ന് ആത്മഹത്യ ചെയ്ത കൃഷ്. നിലപാടുകള് വാക്കുകളിലേക്ക് പകര്ത്താന് കഴിവുള്ള എഴുത്തുകാരനുമായിരുന്നു കൃഷ് എന്ന് സുഹൃത്തുക്കള് അനുസ്മരിക്കുന്നു.
രോഹിത് വെമുലയുമായി അടുത്ത സൗഹൃദമുണ്ടായിരുന്ന ക്രിഷ്, അദ്ദേഹത്തിന്റെ മരണത്തിനു ശേഷം രോഹിതിന്റെ അമ്മ രാധിക വെമൂലയെക്കുറിച്ച് എഴുതിയ ബ്ളോഗ് ഏറെ ശ്രദ്ധേ നേടിയിരുന്നു. രോഹിതിന്റെ മരണത്തിന് മുന്പ് ഇരുവര്ക്കുമിടയില് നടന്ന ആറ് കൂടിക്കാഴ്ചകള് കൃഷ് ബ്ളോഗില് കുറിച്ചിരുന്നു.
'ഭാവനയില് നിന്ന് സൃഷ്ടിച്ച കഥാപാത്രങ്ങളെ പരിഹസിച്ചാല് പോലും പാര്ശ്വവല്ക്കരിക്കപ്പെട്ട സമൂഹങ്ങളില് നിന്നുള്ള ബുദ്ധിജീവികള് അറസ്റ്റ് ചെയ്യപ്പെടും. അതേ സമയം, എല്ലാ നാഷണല് ഇന്സ്റ്റിറ്റിയൂട്ടുകളുടെ തലപ്പത്തേക്ക് പത്താം ക്ളാസ് പോലും പാസാകാത്തവര് എത്തിക്കൊണ്ടിരിക്കും. ഇക്കൂട്ടര് ഭിന്നാഭിപ്രായങ്ങള് പ്രകടിപ്പിക്കുന്നവരെ രാജ്യദ്രോഹികളെന്ന് മുദ്രകുത്തും. ഇവര് ഇനിയും നമ്മളെപ്പോലുള്ള രോഹിതുമാരെ കൊല്ലും. ബീഫ് തിന്നുന്നതിന്റെ പേരില് യുക്തി വച്ചുപുലര്ത്തുന്നതിന്റെ പേരില് രാജ്യത്തിന് ഉന്നതിയുണ്ടാക്കുന്ന ബൌദ്ധിക ചിന്തയുടെപേരില് അവര് കൊല്ലും. എന്നാല് ഞങ്ങളാണ് ഈ രാജ്യത്തിന്റെ യഥാര്ത്ഥ സന്തതികള് എന്നതിനാല് ഞങ്ങളെ കൊന്നൊടുക്കുന്നതോടെ ഈ രാജ്യം തന്നെ ഇല്ലാതാവും.' (എ യൂണിവേഴ്സല് മദര് വിത്തൌട്ട് എ നേഷന് എന്ന കൃഷിന്റെ ബോഗില് നിന്ന്)
https://www.facebook.com/Malayalivartha
