അടുത്ത ലോക്സഭാ തെരഞ്ഞെടുപ്പിലും മോഡി സര്ക്കാര് മികച്ച വിജയം നേടി ഭരണം നിലനിര്ത്തുമെന്ന് യു.എസ്സിലെ വിദഗ്ധര്
ഇക്കഴിഞ്ഞ ദിവസങ്ങളില് അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പ് ഫലം പുറത്തുവരികയും ഉത്തര്പ്രദേശ്,ഉത്തരാഖണ്ഡ് എന്നീ പ്രമുഖ സംസ്ഥാനങ്ങളില് ബി.ജെ.പി വിജയക്കൊടി നാട്ടുകയും ചെയ്തിരുന്നു. അതിനുപുറകെയായി ഇതാ ബി.ജെ.പിക്കൊരു സന്തോഷവാര്ത്ത അങ്ങകലെയുള്ള അമേരിക്കയില് നിന്നും. 2019ല് നടക്കുന്ന ലോക്സഭാ തെരഞ്ഞെടുപ്പില് മികച്ച വിജയത്തോടെ മോഡി സര്ക്കാര് ഭരണം നിലനിര്ത്തുമെന്നാണ് യു.എസ്സിലെ പ്രമുഖ വിദഗ്ധരുടെ വിലയിരുത്തല്.
2014-ലെ തിരഞ്ഞെടുപ്പില് നരേന്ദ്ര മോദിയുടെ നേതൃത്വത്തില് ബി.ജെ.പി നേടിയ വിജയം വെറുമൊരു 'മാര്ഗ ഭ്രംശം' മാത്രമായിരുന്നില്ലെന്നും അവര് അഭിപ്രായപ്പെട്ടു. ഇപ്പോള് പുറത്തുവന്നിരിക്കുന്ന നിയമസഭാ തിരഞ്ഞെടുപ്പു ഫലങ്ങള് എന്തെങ്കിലും മാറ്റത്തിന്റെ സൂചനകള് നല്കുന്നില്ല. അതേസമയം, 2014-ല് ബിജെപി നേടിയ വിജയം അബദ്ധത്തില് സംഭവിച്ചതല്ലെന്ന സൂചനയും ഉത്തര്പ്രദേശ് നിയമസഭാ തിരഞ്ഞെടുപ്പ് ഫലം നല്കുന്നു-ജോര്ജ് വാഷിങ്ടന് സര്വകലാശാലയിലെ അസിസ്റ്റന്റ് പ്രഫസറായ ആദം സീഗ്ഫെല്ഡ് ചൂണ്ടിക്കാട്ടുന്നു.
ബിജെപിയെ സംബന്ധിച്ചിടത്തോളം വളരെ വലിയ വിജയമാണിത്. ഇതേ സംസ്ഥാനത്ത് മുന്പ് ബഹുജന് സമാജ്വാദി പാര്ട്ടിയും സമാജ്വാദി പാര്ട്ടിയും നേടിയ വിജയങ്ങളുമായി താരതമ്യം ചെയ്യുമ്പോള്, വളരെ വലിയ മാര്ജിനിലുള്ള വിജയമാണ് ബിജെപി സ്വന്തമാക്കിയിരിക്കുന്നതെന്ന് വ്യക്തമാകുമെന്നും അദ്ദേഹം ചൂണ്ടിക്കാട്ടി.
2019-ലെ പൊതുതിരഞ്ഞെടുപ്പിലും ഏറ്റവും സാധ്യത കല്പ്പിക്കപ്പെടുന്ന നേതാവായി മോദി മാറിക്കഴിഞ്ഞു. അടുത്ത തവണയും അദ്ദേഹത്തിന് തന്നെ സാധ്യത-അമേരിക്കന് എന്റര്െ്രെപസ് ഇന്സ്റ്റിസ്റ്റ്യൂട്ടിലെ റെസിഡന്റ് ഫെല്ലോ, സദാനന്ദ് ദൂം ചൂണ്ടിക്കാട്ടി. അതേസമയം, അടുത്ത തിരഞ്ഞെടുപ്പില് മോദിയുടെ നേതൃത്വത്തില് ബി.ജെ.പി വിജയിച്ചാലും സഖ്യകക്ഷി സര്ക്കാരിനാണ് കൂടുതല് സാധ്യതയെന്ന് ജോര്ജ്ടൗണ് സര്വകലാശാലയിലെ വാല്ഷ് സ്കൂള് ഓഫ് ഫോറിന് സര്വീസില് പ്രഫസറായ ഇര്ഫാന് നൂറുദ്ദീന് അഭിപ്രായപ്പെട്ടു.
അടുക്കും ചിട്ടയുമുള്ള തിരഞ്ഞെടുപ്പു പ്രചാരണങ്ങളിലൂടെയാണ് ബി.ജെ.പി നേട്ടം കൊയ്യുന്നത്. പ്രതിപക്ഷം പരാജയപ്പെടുന്നതും ഈ മേഖലയില്ത്തന്നെ. ബി.ജെ.പിയ്ക്ക് നേര്ക്കുനേര് നില്ക്കുന്ന എതിരാളികളുള്ള സംസ്ഥാനങ്ങളില് അവരുടെ പ്രകടനം താരതമ്യേന മോശമാണ്. അതുകൊണ്ടുതന്നെ പ്രതിപക്ഷം ഒരുമിച്ചാല് ബി.ജെ.പിയുടെ തേരോട്ടത്തിന് തടയിടാമെന്നും നൂറുദ്ദീന് ചൂണ്ടിക്കാട്ടി.
'ജാതിക്കാര്ഡ്' ഇറക്കിയാണ് ബി.ജെ.പി ഉത്തര്പ്രദേശില് നേട്ടം കൊയ്തതെന്ന് തിരഞ്ഞെടുപ്പ് സമയത്ത് ഇവിടെയുണ്ടായിരുന്ന സദാനന്ദ് ദൂം അഭിപ്രായപ്പെട്ടു. നോട്ട് അസാധുവാക്കലിന് വലിയ പിന്തുണയാണ് ഇവിടെ ലഭിച്ചത്. ഈ നടപടിയുടെ തിക്തഫലങ്ങള് അനുഭവിച്ചവര് തന്നെ അതിന്റെ ആരാധകരായി. അഴിമതിക്കാര്ക്കും ധനികര്ക്കുമെതിരെ നീതിയുടെ വാളെടുത്ത സത്യസന്ധനായ നേതാവിനെയാണ് ആളുകള് മോദിയില് ദര്ശിച്ചതെന്നും അദ്ദേഹം ചൂണ്ടിക്കാട്ടി.
https://www.facebook.com/Malayalivartha
