ഗോവയുടെ മുഖ്യമന്ത്രിയായി മനോഹര്‍ പരീക്കര്‍ അധികാരമേറ്റു. നാലാം തവണയാണ് പരീക്കര്‍ മുഖ്യമന്ത്രിയായി അധികാരമേറ്റത്. 16ന് സഭയില്‍ ഭൂരിപക്ഷം തെളിയിക്കണം. 40 അംഗ നിയമസഭയില്‍ 17 സീറ്റുള്ള കോണ്‍ഗ്രസാണ് ഏറ്റവും വലിയ ഒറ്റക്കക്ഷി. എന്നാല്‍ 13 സീറ്റേ ഉള്ളൂവെങ്കിലും ചെറുകക്ഷികളുടെ പിന്തുണയോടെ ബിജെപി കേവലഭൂരിപക്ഷം ഉറപ്പിക്കുകയായിരുന്നു.

തന്റെ സത്യപ്രതിജ്ഞ തടയണമെന്ന കോണ്‍ഗ്രസിന്റെ ആവശ്യം തള്ളിയതിലൂടെ സുപ്രീം കോടതി ശക്തമായ താക്കീതാണ് നല്‍കിയതെന്ന് പരീക്കര്‍ പറഞ്ഞു. 17 സീറ്റ് ലഭിച്ചിട്ടും കോണ്‍ഗ്രസ് തമ്മിലടിക്കുകയായിരുന്നു. ആരും അവരെ പിന്തുണയ്ക്കുന്ന അവസ്ഥയില്‍ ആയിരുന്നില്ലെന്ന് പരീക്കര്‍ കുറ്റപ്പെടുത്തി.

ദേശീയ മാധ്യമത്തോട് സംസാരിക്കുകയായിരുന്നു അദ്ദേഹം.'കോണ്‍ഗ്രസ് എംഎല്‍എമാര്‍ ബസിലാണ് എത്തിയത്. അവര്‍ കാറിലാണ് വന്നിരുന്നതെങ്കില്‍ ഒന്നോ രണ്ടോ കാറുകള്‍ കാണാതായേനെ' പരീക്കര്‍ പരിഹസിച്ചു. സര്‍ക്കാര്‍ രൂപീകരിക്കാനുള്ള അംഗബലം ഉണ്ടായിരുന്നുവെങ്കില്‍ എന്തു കൊണ്ട് കോണ്‍ഗ്രസ് ഗവര്‍ണറെ സമീപിച്ചില്ലെന്ന് പരീക്കര്‍ ചോദിച്ചു.