മതാപിതാക്കളെ നഷ്ടപ്പെട്ട പ്രായപൂര്‍ത്തിയാകാത്ത സഹോദരങ്ങള്‍ കഴിയുന്നത് കോട്ടയിലെ അനാഥാലയത്തില്‍. സ്വന്തം വീട്ടില്‍ പഴയ നോട്ടുകള്‍ ഉണ്ടെന്ന് സഹോദരങ്ങള്‍ അറിഞ്ഞിരുന്നില്ല. നിരോധിച്ച 96,500 രൂപയുടെ പഴയ നോട്ടുകളാണ് ഇവരുടെ വീട്ടില്‍ ഉണ്ടായിരുന്നത്.

ദിവസ ജോലിക്കാരിയായിരുന്ന അമ്മ കൊല്ലപ്പെട്ടതിനെ തുടര്‍ന്നാണ് ഇവര്‍ കോട്ടയിലെ ചൈല്‍ഡ് വെല്‍ഫെയര്‍ കമ്മിറ്റിയുടെ സംരക്ഷണത്തില്‍ അനാഥാലയത്തില്‍ എത്തിയത്. ഇവിടെ കഴിയുന്നതിനിടയില്‍ നടത്തിയ കൗണ്‍സിലിംഗിലാണ് ആര്‍ കെ പുരത്ത് കുട്ടികള്‍ക്കൊരു വീടുണ്ടെന്ന് പറഞ്ഞത്. ഇതിനെ തുടര്‍ന്ന് ഈ മാസം ആദ്യം പോലീസ് നടത്തിയ പരിശോധനയില്‍ 96,500 രൂപ കണ്ടെത്തിയിരുന്നു.

ദിവസ ജോലിക്കാരിയായിരുന്ന അമ്മയുടെ സമ്പാദ്യമായിരുന്നു ഇതെന്ന് കുട്ടികള്‍ പറഞ്ഞു. പഴയ നോട്ടായതിനാല്‍ ആകെ വിഷമത്തിലായ കുട്ടികള്‍ നോട്ടുമാറ്റി നല്‍കുന്നതിനായി ആദ്യം ആര്‍ ബി ഐക്ക് കത്തയച്ചെങ്കിലും മാറ്റി തരാന്‍ കഴിയില്ലെന്ന മറുപടിയാണ് ലഭിച്ചത്. തുടര്‍ന്നാണ് പതിനാറും പന്ത്രണ്ടും വയസ്സുള്ള സഹോദരങ്ങള്‍ ചൈല്‍ഡ് വെല്‍ഫെയര്‍ ചെയര്‍മാന്‍ ഗുരുബക്‌സണിയുടെ നേതൃത്വത്തില്‍ പ്രധാനമന്ത്രിക്ക് കത്തയച്ചത്.

ഈ പണം മാറി കിട്ടിയാല്‍ അനിയത്തിയുടെ പേരില്‍ ഫിക്‌സഡ് ഡെപ്പോസിറ്റായി നിക്ഷേപിക്കണമെന്നാണ് 16 കാരനായ ആണ്‍കുട്ടി പറയുന്നത്. 500 ന്റേയും ആയിരത്തിന്റേയും 171 നോട്ടുകളാണ് ആകെ ഉള്ളത്. 2013 ലായിരുന്നു ഇവരുടെ മാതാവ് മരണപ്പെട്ടത്. ജോലിക്ക് പോയി തിരിച്ച് വരുന്ന ഇവരെ ആരോ കൊലപ്പെടുത്തുകയായിരുന്നു.