എയര്‍ ഇന്ത്യ ഡ്യൂട്ടി മാനേജരെ ചെരിപ്പൂരി കരണത്തടിച്ചെന്ന ആരോപണം നേരിടുന്ന വിവാദ ശിവസേന എംപി രവീന്ദ്ര ഗായ്ക്‌വാദിന്റെ മണ്ഡലമായ ഉസ്മാനാബാദില്‍ ഇന്ന് ബന്ദ്. എയര്‍ ഇന്ത്യയുടെ നടപടിയോടുള്ള പ്രതിഷേധ സൂചകമായാണ് ഇന്ന് ബന്ദ്. ജീവനക്കാര്‍ തന്നെ അപമാനിച്ചെന്നും എയര്‍ ഇന്ത്യയ്‌ക്കെതിരെ കേസു കൊടുക്കുമെന്നും ഗായ്ക്‌വാദ് പറഞ്ഞതിനു പിന്നാലെയാണ് പ്രതിഷേധം. മണ്ഡലത്തില്‍ പലയിടത്തും ശിവസേന പ്രവര്‍ത്തകര്‍ നിര്‍ബന്ധിച്ച് കടകള്‍ അടപ്പിച്ചു. ഗായ്ക്‌വാദിനു പിന്തുണയുമായി തുറോറി ഗ്രാമത്തിലെ സേന പ്രവര്‍ത്തകര്‍ എയര്‍ ഇന്ത്യ ജീവനക്കാരുടെ കോലം കത്തിച്ചിരുന്നു. ഇക്കോണമി ക്ലാസ് മാത്രമുള്ള വിമാനത്തില്‍ ബിസിനസ് ക്ലാസില്‍ യാത്ര ചെയ്യണമെന്ന് ആവശ്യപ്പെട്ടുകൊണ്ടായിരുന്നു എംപി ആദ്യം ഇടഞ്ഞത്.
പുണെയില്‍നിന്ന് ഡല്‍ഹിയില്‍ വിമാനം എത്തിയിട്ടും പ്രതിഷേധിച്ച് ഇറങ്ങാതിരുന്ന ഗായ്ക്‌വാദിനോട്, താന്‍ മേലധികാരികളെ അറിയിക്കുമെന്നു പറഞ്ഞതാണ് 62 വയസ്സുള്ള സുകുമാറിനെ ചെരുപ്പൂരി അടിക്കാന്‍ കാരണം. 25 തവണ അയാളെ ചെരിപ്പുകൊണ്ട് അടിച്ചുവെന്നു ഗായ്ക്‌വാദ് തന്നെ അവകാശപ്പെടുകയും ചെയ്തു. ഇതേതുടര്‍ന്ന്, പല വിമാനക്കമ്പനികളും രവീന്ദ്ര ഗായ്ക്‌വാദിന് വിമാന യാത്ര നിഷേധിച്ചിരുന്നു.

വിവാദസംഭവത്തെപ്പറ്റി മാധ്യമങ്ങളോടു സംസാരിക്കുന്നതിനെ പാര്‍ട്ടിയിലെ മുതിര്‍ന്ന നേതാവ് വിലക്കിയിട്ടുണ്ടെന്നും അദ്ദേഹം അവകാശപ്പെട്ടു. ചെരുപ്പൂരി കരണത്തടിച്ച സംഭവവുമായി ബന്ധപ്പെട്ടു പ്രചരിക്കുന്ന വിഡിയോയെക്കുറിച്ച് അന്വേഷണം നടത്തണമെന്നും എംപി ആവശ്യപ്പെട്ടിരുന്നു.