പാലക്കാട് കണ്ണാടിയില്‍ പുലര്‍ച്ചെയുണ്ടായ അപകടത്തില്‍ പെട്ടത് അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ എസ്റ്റേറ്റിലെ കാവല്‍ക്കാരനെ കൊലപ്പെടുത്തി മോഷണം നടത്തിയ കേസിലെ പ്രതിയും കുടുംബവും. രണ്ടാം പ്രതി കെ.വി. സായനും കുടുംബവും സഞ്ചരിച്ച കാര്‍ ദേശീയപാത കണ്ണാടിയില്‍ നിര്‍ത്തിയിട്ടിരുന്ന ലോറിയില്‍ ഇടിച്ചായിരുന്നു അപകടം.

ഇന്നു രാവിലെ 5.50 ന് ഉണ്ടായ അപകടത്തില്‍ സയന്റെ ഭാര്യ വിനുപ്രിയ (30) മകള്‍ നീതു (അഞ്ച്) എന്നിവരാണ് മരിച്ചത്. ഇടിച്ച കാര്‍ കൊലപാതക ദിവസം എസ്റ്റേറ്റില്‍ പോകാന്‍ ഇവര്‍ ഉപയോഗിച്ചതാണെന്നു പൊലീസ് പറഞ്ഞു. നേരത്തെ കൊടനാട് എസ്റ്റേറ്റിലെ കാവല്‍ക്കാരനെ കൊലപ്പെടുത്തിയ കേസിലെ ഒന്നാം പ്രതി കനകരാജ് സേലത്ത് അപകടത്തില്‍ മരിച്ചിരുന്നു. ഒന്നാം പ്രതിയുടെ മരണം അപകടമാണെന്നും എന്‍കൗണ്ടര്‍ ആണെന്നും സ്ഥിരീകരിക്കാത്ത റിപ്പോര്‍ട്ടുകള്‍ ഉണ്ട്. കണ്ണാടി അപകടം ആത്മഹത്യാശ്രമത്തിന്റെ ഭാഗമായിരുന്നുവെന്നു സംശയിക്കുന്നു. 

കേസുമായി ബന്ധപ്പെട്ട് നാല് മലയാളികളും അറസ്റ്റിലായിരുന്നു. പുതുക്കാടിനടുത്ത് പള്ളം സ്വദേശി സതീശന്‍, മൂന്നുമുറി സ്വദേശി സന്തോഷ്, മാപ്രാണം സ്വദേശി ദീപു, മലപ്പുറം സ്വദേശി ഉദയന്‍ എന്നിവരാണ് അറസ്റ്റിലായത്. കഴിഞ്ഞ തിങ്കളാഴ്ച രാത്രിയാണ് ഇവര്‍ കാവല്‍ക്കാരനായ ഓം ബഹദൂറിനെ (37) കൊലപ്പെടുത്തി മോഷണം നടത്തിയത്. സംഭവസ്ഥലത്ത് വച്ചുതന്നെ ഓം ബഹദൂര്‍ കൊല്ലപ്പെട്ടിരുന്നു. മറ്റൊരു കാവല്‍ക്കാരനായ കിഷന്‍ ബഹദൂറിനും ആക്രമണത്തില്‍ നിസാര പരിക്കേറ്റിരുന്നു. കിഷന്‍ ബഹദൂറിനെ ചോദ്യം ചെയ്തതില്‍ നിന്നാണ് പൊലീസിന് പ്രതികളെ കുറിച്ചുള്ള വിവരങ്ങള്‍ കിട്ടിയത്.