തമിഴക രാഷ്ട്രീയം ശശികലയുടെ കൈപ്പിടിയില്‍ നിന്നും വഴുതി മാറുമ്പോള്‍ നീലഗിരിയിലുള്ള കോടനാട് എസ്‌റ്റേറ്റില്‍ നിന്നും ജയലളിതയുടെ ഉടമസ്ഥതയില്‍ രാജ്യത്തിനകത്തും പുറത്തുമുള്ള കോടിക്കണക്കിനു രൂപയുടെ സ്വത്തിന്റെ പ്രമാണങ്ങള്‍ മോഷണം പോയതായി സംശയം. സംഭവത്തിന് പിന്നില്‍ ശശികലയുണ്ടോ എന്നാണ് പോലീസ് സംശയം.

എസ്‌റ്റേറ്റിലെ കാവല്‍ക്കാരനായിരുന്ന നേപ്പാള്‍ സ്വദേശി ഓം ബഹദൂറിനെ കൊലപ്പെടുത്തിയവരെന്ന് സംശയിക്കുന്ന രണ്ടു പേരുടെ വാഹനങ്ങളാണ് അപകടത്തില്‍ പെട്ടത്. ഒന്നാം പ്രതി കനകരാജ് ശനിയാഴ്ച രാവിലെ സേലത്ത് നടന്ന അപകടത്തില്‍ മരിച്ചു. രണ്ടാം പ്രതി കെ.വി.സയന്റെ വാഹനം ശനിയാഴ്ച പുലര്‍ച്ചെ പാലക്കാട്ട് അപകടത്തില്‍ പെട്ടു. ഇയാളുടെ ഭാര്യയും മകളും മരിച്ചു. സയന്‍ കോയമ്പത്തൂര്‍ ആശുപത്രിയില്‍ ഗുരുതരാവസ്ഥയിലാണ്. കനകരാജിനെയും സയന്റെ കുടുംബത്തെയും കൊന്നിരിക്കാമെന്നാണ് പോലീസ് കുരുതുന്നത്.

ജയലളിതയുടെ വസ്തുവകകളുടെ ഒറിജിനല്‍ പ്രമാണങ്ങള്‍ കൈക്കലാക്കിയ ശേഷം അവ എടുത്തു കൊടുത്ത കനകരാജിനെ കൊന്നു. സയനെ കൊല്ലാന്‍ ശ്രമിച്ചു. സംഭവത്തില്‍ ശശികലയുടെ ക്വട്ടേഷനാണ് എന്ന് പോലീസ് സംശയിക്കുന്നത്.

ഇക്കഴിഞ്ഞ തിങ്കളാഴ്ച പുലര്‍ച്ചെയാണ് ഓം ബഹദുര്‍ കൊല ചെയ്യപ്പെട്ടത്. പാലക്കാട്ട് ഉണ്ടായ അപകടം ബോധപൂര്‍വം സംഭവിച്ചതാണെന്നാണ് പോലീസ് നിഗമനം. നിര്‍ത്തിയിട്ടിരുന്ന വാഹനത്തിനു പിന്നിലാണ് സയന്റെ കാര്‍ ഇടിച്ചത്. ഭാര്യയുടെയും മകളുടെയും കഴുത്തിലെ മുറിവാണ് വഴിത്തിരിവായത് .

ജയലളിതയുടെ ഉടമസ്ഥതയിലുള്ള പല കൊട്ടാരങ്ങളും ആരോരുമറിയാതെ ശശികലയുടെ പേരിലേക്ക് മാറ്റിയിരുന്നു. സെക്കന്തരാബാദിലെ കൊട്ടാരമാണ് ഒടുവില്‍ മാറ്റിയത്. മോഷണം നടന്ന കോടനാട് കൊട്ടാരം വേനല്‍ക്കാലത്ത് ജയലളിത താമസിക്കാന്‍ ഉപയോഗിക്കുന്നതായിരുന്നു. അന്വേഷണവും റെയ്ഡും ഭയന്ന് ജയലളിതയുടെ ഒറിജിനല്‍ പ്രമാണങ്ങള്‍ കോടനാട് സൂക്ഷിച്ചിരുന്നു എന്നാണ് വിവരം.