അമിത ഭാരം മൂലം വിഷമിക്കുന്ന ഈജിപ്ഷ്യന്‍ യുവതി ഇമാന്‍ അഹമ്മദിനെ മുംബൈയിലെ സെയ്ഫി ആശുപത്രിയില്‍നിന്നും മാറ്റാന്‍ ശ്രമിക്കുന്നത് അപകടരമാണെന്ന് ഡോക്ടര്‍. ഇമാനെ ചികിത്സിക്കുന്ന ബരിയാട്രിക് സര്‍ജന്‍ മുഫസല്‍ ലഡ്കാവാലെയാണ് ബന്ധുക്കളോട് ഇക്കാര്യം അറിയിച്ചത്.

യുഎഇയിലെ ആശുപത്രിയിലേക്ക് ഇമാനെ മാറ്റാനുള്ള ബന്ധുക്കളുടെ ശ്രമം അപകടരമാണെന്നാണ് ലഡ്കാവാലെ മുന്നറിയിപ്പ് നല്‍കിയത്. നടക്കാന്‍ പ്രാപ്തമാക്കുമെന്ന് ഒരിക്കലും ഇമാന്റെ ബന്ധുക്കള്‍ക്ക് വാക്ക് നല്‍കിയിട്ടില്ല. ആദ്യത്തെ വാര്‍ത്താ സമ്മേളനത്തില്‍ തന്നെ ഇക്കാര്യം വ്യക്തമാക്കിയതാണ്. ഇമാന്റെ ശരീരഭാരം കുറച്ചുകൊണ്ടുവരികയാണ്. അതിശകരമായ രീതിയില്‍ അവരുടെ ശരീരഭാരം കുറഞ്ഞിട്ടുണ്ടെന്നും ഡോക്ടര്‍ മുഫസല്‍ ലഡ്കാവാലെ പറഞ്ഞു.

ഇമാന്റെ ബന്ധുക്കള്‍ക്ക് കൊടുത്ത വാക്ക്, അവളെ കട്ടിലില്‍ ഇങ്ങോണ്ടുകൊണ്ടുവന്നാല്‍ കസേരയില്‍ ഇരുത്തി മടക്കി അയക്കാമെന്നായിരുന്നു. താന്‍ അത് പാലിച്ചെന്നും ലഡ്കാവാലെ പറഞ്ഞു. ഇവിടെനിന്നും കൊണ്ടുപോകാന്‍ തങ്ങള്‍ ആവിശ്യപ്പെടില്ല. മുംബൈയില്‍നിന്നും യുഎഇയിലേക്ക് കൊണ്ടുപോകാനാണ് ബന്ധുക്കളുടെ തീരുമാനമെങ്കില്‍ തങ്ങള്‍ അത് അംഗീകരിക്കും.

യുഎഇയില്‍നിന്നും എത്തിയ ഡോക്ടര്‍മാര്‍ക്ക് ഇമാനെ പരിശോധിക്കാന്‍ അവസരം നല്‍കിയിരുന്നു. അവളുടെ മെഡിക്കല്‍ റിപ്പോര്‍ട്ടുകളും കൈമാറി. എപ്പോഴാണ് അവര്‍ ഇമാനെ ഇവിടെനിന്നും കൊണ്ടുപോകുകയെന്ന് അറിയില്ലെന്നും ലഡ്കാവാലെ പറഞ്ഞു.

നേരത്തെ ഇമാനെ ചികിത്സിക്കുന്ന സെയ്ഫി ആശുപത്രിക്കെതിരെയും ഡോക്ടര്‍മാര്‍ക്കെതിരേയും ആരോപണങ്ങളുമായി ബന്ധുക്കള്‍ രംഗത്തെത്തിയിരുന്നു. ഇമാന്റെ ഭാരം കുറഞ്ഞിട്ടില്ലെന്നും ആശുപത്രി അധികൃതര്‍ കളവ് പറയുകയാണെന്നും ആരോപിച്ച് സഹോദരി ഷെയ്മ സലിം ആണ് രംഗത്തെത്തിയത്.

500 കിലോ ഭാരമുണ്ടായിരുന്ന ഇമാന് ഇപ്പോള്‍ 176.6 കിലോ ഭാരമാണുള്ളത്. അബുദാബിയിലെ ബുര്‍ജീല്‍ ആശുപത്രിയിലേക്ക് മാറ്റാനാണ് ബന്ധുക്കള്‍ ശ്രമിക്കുന്നത്‌