കോടനാട് എസ്റ്റേറ്റിന് പിന്നിലെ പതിനൊന്നുപേരടങ്ങിയ സംഘത്തിലെ ഒമ്പതുപേരും മലയാളികള്
തമിഴ്നാട് മുന്മുഖ്യമന്ത്രി ജയലളിതയുടെ കോടനാട് എസ്റ്റേറ്റില് കവര്ച്ചയും കൊലപാതകവും നടത്താന് പദ്ധതി ആസൂത്രണം ചെയ്തത് തൃശൂരിലെന്ന് സൂചന. പതിനൊന്നുപേരടങ്ങിയ സംഘത്തിലെ ഒമ്പതുപേരും മലയാളികളാണ്. ഇതില് നാലുപേര് തമിഴ്നാട് പോലീസിന്റെ കസ്റ്റഡിയിലുണ്ട്. രണ്ടുപേരെ മഞ്ചേരി സി.ഐ. കെ.എം. ബിജുവിന്റെ നേതൃത്വത്തില് അറസ്റ്റ് ചെയ്തു. സംഭവത്തിനു പിന്നില് പ്രവര്ത്തിച്ചത് കുഴല്പ്പണം തട്ടിയെടുക്കുന്ന മലയാളി ക്വട്ടേഷന് സംഘമാണെന്ന് വ്യക്തമായി.
കേസില് തമിഴ്നാട് സ്വദേശിയായ പ്രതി കനകരാജ് വെള്ളിയാഴ്ച രാത്രി സേലത്തിനടുത്ത് അപകടത്തില് മരിച്ചു. മറ്റൊരു പ്രതി കെ.വി. സയന് പാലക്കാട്ടെ അപകടത്തില് പരുക്കേറ്റ് ചികിത്സയിലാണ്. മലപ്പുറം സ്വദേശി ജിതിനും വയനാട് സ്വദേശി ജംഷീറുമാണ് കേരള പോലീസിന്റെ പിടിയിലായത്. ഇവര് പിടിയിലായതോടെയാണ് കോടനാട് കേസിന് തുമ്പായത്. ശേഷിക്കുന്ന പ്രതികളില് ഭൂരിഭാഗവും തൃശൂര് സ്വദേശികളാണ്.
കഴിഞ്ഞ തിങ്കളാഴ്ചയാണ് കോടനാട് എസ്റ്റേറ്റില് കവര്ച്ചയും കൊലപാതവും നടന്നത്. അന്നുതന്നെ പ്രതികളില് മൂന്നുപേര് ഗൂഡല്ലൂരില് തമിഴ്നാട് പോലീസിന്റെ പിടിയിലായെങ്കിലും അന്വേഷണം നടത്താതെ വിട്ടയച്ചിരുന്നു. പ്രതികള് സഞ്ചരിച്ചിരുന്ന രണ്ടുവാഹനവും അന്ന് പോലീസ് പരിശോധിച്ചെന്നാണ് വിവരം. അന്വേഷണത്തിന്റെ ആദ്യഘട്ടത്തില് തമിഴ്നാട് പോലീസിന് സംഭവിച്ച വലിയ വീഴ്ചയായിരുന്നു അത്.
ജയിലില് വച്ചുള്ള പരിചയത്തെ തുടര്ന്ന് തൃശൂര് സ്വദേശി ദീപുവും വയനാട് സ്വദേശി ജംഷീറും തമ്മില് സംസാരിച്ചാണ് പദ്ധതി ആസൂത്രണം ചെയ്തത്. പണവും സ്വര്ണവുമായി നൂറു കോടിയിലേറെ സ്വത്തുക്കള് ജയലളിതയുടെ ഊട്ടിയിലെ ബംഗ്ലാവിലുണ്ടെന്ന അനുമാനമാണ് കവര്ച്ചയ്ക്ക് പ്രേരിപ്പിച്ചത്.
കവര്ച്ച നടത്താന് മലപ്പുറത്തുനിന്നു 22ന് ഒരു എന്ഡേവറും 23 ന് രാവിലെ ഒരു ഇന്നോവ കാറും വാടകയ്ക്കെടുത്തു. തമിഴ്നാട്ടില് നിന്നുള്ള വിവരങ്ങളുടെ അടിസ്ഥാനത്തിലാണ് പദ്ധതി ആസൂത്രണം ചെയ്തത്. ഈ രണ്ടു വാഹനങ്ങളിലായി ഏഴുപേരും തമിഴ്നാട്ടില് നിന്നുള്ള സാന്ട്രോ കാറില് നാലുപേരുമാണ് എസ്റ്റേറ്റിലെത്തിയത്. ബംഗ്ലാവിലുണ്ടായിരുന്ന രണ്ടുകാവല്ക്കാരെയും ബലംപ്രയോഗിച്ച് കെട്ടിയിട്ടതായി പ്രതികള് സമ്മതിച്ചിട്ടുണ്ട്.
വായ് പൊത്തിപ്പിടിച്ചതായും പറഞ്ഞു. എന്നാല്, കാവല്ക്കാരന് മരിച്ച വിവരം പിറ്റേന്ന് അറിഞ്ഞതായാണ് മൊഴി. 23 ന് പുലര്ച്ചെ കൃത്യത്തിനുശേഷം മടങ്ങുമ്പോഴാണ് തമിഴ്നാട് പോലീസ് പിടിച്ചത്. എന്ഡേവറില് ഉണ്ടായിരുന്ന വാച്ചുകളും പ്രതിമകളും കണ്ടാണ് പിടിച്ചത്. ഇന്നോവയും പരിശോധിച്ചെങ്കിലും വിട്ടയച്ചു. പിടിച്ചവണ്ടിയും രാവിലെ വിട്ടുനല്കി. ദീപുവിനെ തൃശൂരില് നിന്നാണ് തമിഴ്നാട് പോലീസ് പിടിച്ചത്. ഇയാള് കൈവശം വച്ചിരുന്ന ഇന്നോവയും പിടിച്ചെടുത്തു. എന്ഡേവര് കേരള പോലീസിന്റെ കസ്റ്റഡിയിലാണ്.
https://www.facebook.com/Malayalivartha
