പിതാവിന്റെ തലയ്ക്ക് പകരം വീട്ടണമെന്ന് പാക് സൈന്യം കൊലപ്പെടുത്തി മൃതദേഹം വികൃതമാക്കിയ സൈനികന്‍ പ്രേംസാഗറിന്റെ മകള്‍. പിതാവിന്റെ മരണവുമായി ബന്ധപ്പെട്ട് അധികൃതരില്‍ നിന്നും ഇതുവരെ ഒരു വിവരവും കിട്ടിയിട്ടില്ലെന്നും പ്രേംസാഗറിന്റെ പുത്രി സരോജ വ്യക്തമാക്കി. 

പിതാവിന്റെ തലയ്ക്ക് പകരമായി 50 പാക് തലകള്‍ എടുക്കണമെന്നാണ് മകളുടെ ആവശ്യം. ഉത്തര്‍പ്രദേശിലെ ദിയോരിയ ജില്ലക്കാരനായ പ്രേംസാഗറിനെ പാക് സൈന്യം കൊലപ്പെടുത്തിയത് പുഞ്ചിലെ കൃഷ്ണഗാട്ടിയില്‍ വെച്ചായിരുന്നു. കനത്ത മോര്‍ട്ടാര്‍ ആക്രമണം നടത്തി സൈന്യത്തിന്റെ ശ്രദ്ധ തിരിച്ച ശേഷം നിയന്ത്രണ രേഖയിലെ ഇന്ത്യന്‍ പ്രദേശത്തേക്ക് 250 മീറ്ററോളം നുഴഞ്ഞുകയറിയാണ് പാക് സേന ആക്രമിച്ചത്. പ്രേംസാഗര്‍ ഉള്‍പ്പെടെ രണ്ടു സൈനികരെ വലയില്‍ വീഴ്ത്തി വധിച്ച ശേഷം ദേഹത്ത് നിന്നും തലയറുത്തുമാറ്റി വികൃതമാക്കുകയായിരുന്നു.

ശക്തമായി തിരിച്ചടിക്കുമെന്നാണ് ഇതിന് ഇന്ത്യ നല്‍കിയിട്ടുള്ള മറുപടി. കശ്മീരില്‍ പ്രശ്‌നങ്ങള്‍ക്ക് പിന്തുണ നല്‍കുമെന്ന് വാഗ്ദാനം ചെയ്ത് നിയന്ത്രണ രേഖയിലെ ചിലയിടങ്ങള്‍ പാക് സൈനിക തലവന്‍ ജനറല്‍ ഖാമര്‍ ജാവേദ് ബജ്‌വ സന്ദര്‍ശിച്ചതിന് പിന്നാലെയാണ് ഇന്ത്യന്‍ സൈനികര്‍ക്ക് നേരെ ആക്രമണം നടന്നത്. ബിഎസ്എഫ് ന്റെ 200 ബറ്റാലിയന്‍ ഹെഡ് കോണ്‍സ്റ്റബിളാണ് പ്രേം സാഗര്‍. 22 സിഖ് റജിമെന്റിലെ നായ്ബ് സുബേദാര്‍ പരംജീത് സിംഗാണ് കൊല്ലപ്പെട്ട മറ്റേയാള്‍. 

നടപടി അപലപനീയമാണെന്ന് പ്രതിരോധമന്ത്രി അരുണ്‍ ജെയ്റ്റ്‌ലി പ്രതികരിച്ചു. സൈനികരുടെ ജീവത്യാഗം വെറുതേയാകില്ലെന്നും പറഞ്ഞു. ഇതിന് ശക്തമായ തിരിച്ചടി നല്‍കുമെന്നും പാകിസ്താന്‍ സൈന്യത്തിന്റെ നടപടി മനുഷ്യത്വ രഹിതം ആണെന്നും യുദ്ധത്തില്‍ പോലും ഇത്തരം ഒരു ആക്രമണം ആരും നടത്തില്ലെന്നും ജെയ്റ്റ്‌ലി പ്രതികരിച്ചു. അതേസമയം ആക്രമിച്ചെന്നും സൈനികരുടെ മൃതദേഹം വികൃതമാക്കിയെന്നുമുള്ള ആരോപണങ്ങള്‍ പാകിസ്താന്‍ തള്ളിയിട്ടുണ്ട്.