മുല്ലപ്പെരിയാര് അണക്കെട്ടിലെ ജലം ഉപയോഗിച്ച് തമിഴ്നാട്ടില് പുതിയ കുടിവെളള പദ്ധതി
മുല്ലപ്പെരിയാര് അണക്കെട്ടിലെ ജലം ഉപയോഗിച്ച് തമിഴ്നാട്ടില് പുതിയ കുടിവെള്ള പദ്ധതി പൂര്ത്തിയായി. കമ്പത്തെ മുക്കാല്ലക്ഷം കുടുംബങ്ങളുടെ കുടിവെളളക്ഷാമം പരിഹരിക്കുന്നതാണ് പദ്ധതി. 2011ല് ജയലളിത പ്രഖ്യാപിച്ച പദ്ധതി പതിനെട്ട് കോടി രൂപ മുടക്കിയാണ് പൂര്ത്തീകരിച്ചത്.
മുല്ലപ്പെരിയാര് അണക്കെട്ടില് നിന്നുള്ള വെള്ളം നിലവില് തമിഴ്നാട്ടിലെ അഞ്ച് ജില്ലകളില് കുടിവെള്ളം, കൃഷി ആവശ്യങ്ങള്ക്കായി ഉപയോഗിക്കുന്നുണ്ട്. എന്നാല് കമ്പത്ത് ആവശ്യത്തിന് വെള്ളം ലഭിച്ചിരുന്നില്ല. കുടിവെള്ളക്ഷാമം രൂക്ഷമായതോടെ പ്രതിഷേധങ്ങള് ഉയര്ന്നു. കര്ഷകരും രംഗത്തിറങ്ങിയതോടെ അന്നത്തെ മുഖ്യമന്ത്രി ജയലളിത വിഷയത്തില് ഇടപെട്ടു.
2011ല് മുല്ലപ്പെരിയാറില് നിന്ന് കമ്പത്തേയ്ക്ക് പ്രത്യേക കുടിവെള്ള പദ്ധതി സര്ക്കാര് തയ്യാറാക്കി. ആറു വര്ഷം കൊണ്ട് തമിഴ്നാട് സര്ക്കാര് 18 കോടി രൂപ ചിലവില് പദ്ധതി പൂര്ത്തീകരിച്ചു. കമ്പത്തെ മുക്കാല് ലക്ഷം കര്ഷക കുടുംബങ്ങള്ക്ക് പദ്ധതി ആശ്വാസമാകും.
കുടിവെള്ള പദ്ധതിക്കായി 75 എച്ച് പിയുടെ രണ്ട് മോട്ടറുകളാണ് ലോവര് ക്യാമ്പില് സ്ഥാപിച്ചിരിക്കുന്നത്. കമ്പത്ത് വെള്ളം ശേഖരിക്കുന്നതിന് പ്രത്യേക സംഭരണിയും തയ്യാറാക്കി. ഇവിടെ നിന്ന് പൈപ്പിലൂടെ എല്ലാ വീടുകളുടെയും വാതില്ക്കല് വെള്ളമെത്തും.
https://www.facebook.com/Malayalivartha
