ഡോക് ലാം സംഘര്ഷം അടഞ്ഞ അധ്യായം; പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷീ ജിന് പിങ്ങും തമ്മില് നടത്തിയ കൂടിക്കാഴ്ചയില് ധാരണ
ഇന്ത്യയും ചൈനയും തമ്മിലുണ്ടായ ഡോക് ലാം സംഘര്ഷം അടഞ്ഞ അധ്യായമാണെന്നും ഇത്തരം സംഭവങ്ങള് ആവര്ത്തിക്കാതിരിക്കാന് ഇരു കൂട്ടരും പരിശ്രമിക്കണമെന്നും ധാരണ. പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷീ ജിന് പിങ്ങും തമ്മില് നടത്തിയ കൂടിക്കാഴ്ചയിലാണ് ധാരണയായത്.
അഭിപ്രായ വ്യത്യാസങ്ങള് പരസ്പര ബഹുമാനത്തോടെ പരിഹരിക്കുമെന്നും പിന്നോട്ടല്ല, മുന്നോട്ടാണ് നോക്കേണ്ടതെന്നും ചര്ച്ചയ്ക്ക് ശേഷം വിദേശകാര്യ സെക്രട്ടറി എസ് ജയശങ്കര് അറിയിച്ചു.
ഇരു നേതാക്കളും തമ്മിലുള്ള ചര്ച്ചയ്ക്കിടെ ഭീകരത ചര്ച്ചാ വിഷയമായില്ലെന്നും അക്കാര്യങ്ങള് ബ്രിക്സ് ഉച്ചകോടിയില് ചര്ച്ച ചെയ്തതാണെന്നും ജയശങ്കര് പറഞ്ഞു. മസൂദ് അസറിനെ ആഗോള ഭീകരരനാക്കി പ്രഖ്യാപിക്കുന്ന കാര്യം ഇരു നേതാക്കളും ചര്ച്ച ചെയ്തേക്കുമെന്ന് സൂചനയുണ്ടായിരുന്നു.
ഇന്ത്യയുമായുള്ള ബന്ധം പഞ്ചശീല തത്വങ്ങള് പ്രകാരം തന്നെ മുന്നോട്ട് കൊണ്ടു പോകുമെന്ന് ചൈനീസ് പ്രസിഡന്റ് ഷീ ജിന് പിങ്ങ് പറഞ്ഞു. ഇരു രാജ്യങ്ങളും തമ്മിലുള്ള ബന്ധം നിലവില് മെച്ചപ്പെട്ടിട്ടുണ്ടെന്നും സമാധാന പുര്ണമായ സഹവര്ത്തിത്വം ഉണ്ടാകുമെന്നും ചൈനീസ് പ്രസിഡന്റ് വ്യക്തമാക്കി.
ദേശീയ സുരക്ഷാ ഉപദേഷ്ടാവ് അജിത് ഡോവല്, വിദേശകാര്യ സെക്രട്ടറി എസ്.ജയശങ്കര് എന്നിവരും പ്രധാനമന്ത്രിയോടൊപ്പമുണ്ടായിരുന്നു. ബ്രിക്സ് ഉച്ചകോടി വിജയകരമായി സംഘടിപ്പിച്ച ചൈനയെ പ്രധാനമന്ത്രി കൂടിക്കാഴ്ചയ്ക്കിടെ അഭിനന്ദിച്ചു.
രണ്ടു മാസത്തിലധികം നീണ്ടു നിന്ന ഡോക്ലാമിലെ സംഘര്ഷത്തിന് ശേഷമുള്ള ഇരുനേതാക്കളുടെയും കൂടിക്കാഴ്ച്ചയെ ആകാംക്ഷയോടെയാണ് ലോകം ഉറ്റനോക്കുന്നത്. ബ്രിക്സ് ഉച്ചകോടിക്ക് തൊട്ടുമുമ്പ്, ഇരുരാജ്യങ്ങളും സേനകളെ പിന്വലിച്ചതോടെയാണ് സംഘര്ഷത്തിന് അയവുവന്നത്.
പാക് ഭീകര സംഘടനകളെ പേരെടുത്ത് പറഞ്ഞുള്ള ബ്രിക്സ് പ്രഖ്യാപനം, ഇന്ത്യക്കും പ്രധാനമന്ത്രിക്കും രാഷ്ട്രീയമായി നേട്ടമാണ്. ഡോക്ലാമില് ഇരുരാജ്യങ്ങളുടെയും സേനകള് പിന്മാറിയതും ഇന്ത്യയുടെ നേട്ടമായി വിലയിരുത്തപ്പെട്ടിരുന്നു.
ബ്രിക്സ് ഉച്ചകോടി ഇന്ന് അവസാനിക്കും. വ്യാപാരം, വ്യവസായം, സുരക്ഷാ എന്നീ മേഖലകളില് നാലു കരാറുകളില് അഞ്ചു രാജ്യങ്ങളും ഒപ്പിട്ടു. ചൈനയുടെ സാംസ്ക്കാരിക പൈതൃകം വിളിച്ചോതിയ സാംസ്ക്കാരിക ഉത്സവത്തിലും ഷീ ജിന് പിങ് ഒരുക്കിയ അത്താഴവിരുന്നിലും മോദി പങ്കെടുത്തു. ചൈന സന്ദര്ശനം പൂര്ത്തിയാക്കി പ്രധാനമന്ത്രി നരേന്ദ്ര മോദി ഇന്ന് മ്യാന്മറിലേക്ക് യാത്രതിരിക്കും.
https://www.facebook.com/Malayalivartha