യുവതിയെ ബലാത്സംഗം ചെയ്യുകയും സുഹൃത്തിനെ കൊലപ്പെടുത്തുകയും ചെയ്ത കേസില്‍ രണ്ടു ബിഎസ്എഫ് ജവാന്‍മാരെ മിസോറാം പൊലീസ് അറസ്റ്റ് ചെയ്തു. ബലാത്സംഗത്തിന് ഇരയായ യുവതിയുടെ മുഖത്ത് ജവാന്‍മാര്‍ ആസിഡ് ഒഴിച്ചിരുന്നു. 

ത്രിപുര - ബംഗ്ലാദേശ് അതിര്‍ത്തിയില്‍ സില്‍സുരി ഗ്രാമത്തിലെ ബിഎസ്എഫ് പോസ്റ്റില്‍ നിന്നാണ് ഇരുവരെയും പൊലീസ് അറസ്റ്റ് ചെയ്തത്. മാമിത് സൂപ്രണ്ട് ഓഫ് പൊലീസ് നാരായണ്‍ താപയാണ് ഇക്കാര്യം അറിയിച്ചത്. ബിഎസ്എഫിന്റെ 181 ബാറ്റാലിയനില്‍ ഉള്‍പ്പെട്ട ജവാന്‍മാരാണ് പിടിയിലായത്. നേരത്തെ ഇവരെ അറസ്റ്റ് ചെയ്യാന്‍ ബിഎസ്എഫ് സമ്മതം നല്‍കിയിരുന്നില്ല. ഇതേത്തുടര്‍ന്ന് ഇരുവര്‍ക്കുമെതിരെ ജില്ലാ കോടതി ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചതോടെയാണ് ബിഎസ്എഫ് ഇവരെ പൊലീസിന് കൈമാറാന്‍ തയാറായത്. ഇക്കഴിഞ്ഞ ജൂലൈ 16 നാണ് ചക്മാ സമുദായത്തില്‍പെട്ട യുവതിയെ രണ്ടു ബിഎസ്എഫ് ജവാന്‍മാര്‍ ചേര്‍ന്ന് ക്രൂരമായി ബലാത്സംഗം ചെയ്തത്. യുവതിക്കൊപ്പമുണ്ടായിരുന്ന സുഹൃത്ത് ഇതിനിടെ ഓടി രക്ഷപെട്ടിരുന്നു. മുള ശേഖരിക്കാന്‍ വനത്തിനുള്ളില്‍ പോയതായിരുന്നു ഇവര്‍. ബലാത്സംഗത്തിന് ശേഷം യുവതിയുടെ മുഖത്ത് ഇവര്‍ ആസിഡ് ഒഴിച്ചിരുന്നു. പിന്നീടാണ് വനത്തിന്റെ മറ്റൊരു ഭാഗത്തു നിന്നു രക്ഷപെട്ട് ഓടിയ സുഹൃത്തിന്റെ മൃതദേഹം കണ്ടെത്തിയത്.