അരുണാചലിലെ ബുദ്ധമത അഭയാര്‍ത്ഥികള്‍ക്ക് പൗരത്വം നല്‍കാനൊരുങ്ങി കേന്ദ്രസര്‍ക്കാര്‍
ഇന്ത്യയില്‍ നിന്ന് 40,000 റോഹിങ്ക്യന്‍ മുസ്ലീങ്ങളെ നാടുകടത്താനായി ശ്രമം നടത്തവേ അരുണാചല്‍ പ്രദേശിലെ ബുദ്ധമത അഭയാര്‍ത്ഥികള്‍ക്ക് പൗരത്വം നല്‍കാനൊരുങ്ങി കേന്ദ്രസര്‍ക്കാര്‍. ബുദ്ധമത വിശ്വാസികളായ പതിനായിരക്കണക്കിന് ചക്മ അഭയാര്‍ഥികള്‍ക്ക് ഇന്ത്യന്‍ പൗരത്വം നല്‍കുന്നത് സംബന്ധിച്ച് തീരുമാനമെടുക്കാന്‍ ആഭ്യന്തരമന്ത്രി രാജ്‌നാഥ് സിങ് യോഗം വിളിച്ചു. മുഖ്യമന്ത്രി പെമാ ഖണ്ഡു ഇന്നലെ ഇക്കാര്യം ചര്‍ച്ച ചെയ്യാന്‍ ആഭ്യന്തരമന്ത്രിയെ സന്ദര്‍ശിച്ചിരുന്നു.
1960കളില്‍ കിഴക്കന്‍ പാകിസ്താനില്‍ (ഇപ്പോഴത്തെ ബംഗ്ലാദേശ്) നിന്നും ഇന്ത്യയിലെ വടക്കുകിഴക്കന്‍ സംസ്ഥാനങ്ങളിലേക്ക് അഭയാര്‍ത്ഥികളായി എത്തിയ സംഘമാണ് ചക്മ വിഭാഗം. മതത്തിന്റെ പേരില്‍ ഇവര്‍ ഏറെ പീഡനം അനുഭവിക്കേണ്ടി വന്നിട്ടുണ്ട്. അരുണാചല്‍ പ്രദേശ്, ത്രിപുര, അസം, മിസോറാം, മേഘാലയ, പശ്ചിമബംഗാള്‍ എന്നിവിടങ്ങളിലും ബംഗ്ലാദേശിലെ ചിറ്റഗോങ് മലകളിലും മ്യാന്മറിന്റെ പടിഞ്ഞാറന്‍ ഭാഗങ്ങളിലുമായി ചിതറിക്കിടക്കുകയാണ് ചക്മ വിഭാഗം. അസമിലെ ലുഷായ് ഹില്‍സിലൂടെയാണ് (ഇപ്പോള്‍ മിസോറാം) ഇന്ത്യയിലേക്ക് ഇവര്‍ കടന്നത്. പിന്നീട് അരുണാചലിലെത്തിച്ചേരുകയായിരുന്നു. 196469 വര്‍ഷങ്ങളില്‍ 5,000 ആയിരുന്ന ഈ അഭയാര്‍ത്ഥികളുടെ എണ്ണം 1,00,000 ആയി വര്‍ധിച്ചിട്ടുണ്ട്.
ഇവരില്‍ പലരും ഐക്യരാഷ്ട്രസഭ അഭയാര്‍ഥി ഏജന്‍സിയില്‍ രജിസ്റ്റര്‍ ചെയ്തിട്ടില്ല. തിരിച്ചറിയല്‍ രേഖകള്‍ ഇല്ലാത്തതിനാല്‍ അവര്‍ക്ക് സംസ്ഥാന സര്‍ക്കാറിന്റെയും പിന്തുണ ലഭിക്കുന്നില്ല. മാധ്യമങ്ങളുടെയും സര്‍ക്കാറിന്റെയും സഹായം എത്താത്ത ഒറ്റപ്പെട്ട മേഖലകളിലാണ് ഇവരുടെ താമസം. ഇന്ത്യബംഗ്ലാദേശ് ഗവണ്‍മ?െന്റുകളും ചക്മ വിഭാഗത്തെ ഇതുവരെ അംഗീകരിച്ചില്ലാത്തതിനാല്‍ ഇവര്‍ക്ക് ഒരു സഹായവും ലഭിക്കുന്നില്ല' വേള്‍ഡ് വിഷന്‍ ഇന്ത്യ ഡയറക്ടര്‍ കുനാല്‍ ഷാ പറഞ്ഞു.
ചക്മകള്‍ക്ക് പൗരത്വം നല്‍കാന്‍ 2015ല്‍ സുപ്രീംകോടതി സര്‍ക്കാരിനോട് ആവശ്യപ്പെട്ടിരുന്നു. ചക്മ വിഭാഗത്തെ പൗരന്മാരായി അംഗീകരിച്ചാല്‍ സംസ്ഥാനത്തിന്റെ ജനസംഖ്യാപട്ടികയില്‍ വ്യത്യാസം വരുമെന്ന് മുഖ്യമന്ത്രി പെമാ ഖണ്ഡു ആഭ്യന്തരമന്ത്രിയോട് വ്യക്തമാക്കി. ഇവിടുത്തെ മറ്റു ഗോത്രവര്‍ഗ്ഗക്കാര്‍ക്ക് തൊഴിലവസരങ്ങള്‍ നഷ്ടപ്പെടുമെന്ന ഭയവുമുണ്ട്. ചക്മകള്‍ക്ക് രാജ്യത്ത് ഭൂമി സ്വന്തമാക്കാന്‍ അനുവദിക്കില്ലെന്ന് ആഭ്യന്തരമന്ത്രി സൂചിപ്പിക്കുന്നുണ്ട്. എന്നിരുന്നാലും വിദൂരവനമേഖലകളില്‍ താമസിക്കുന്ന അഭയാര്‍ഥികള്‍ക്ക് ഇന്നര്‍ലൈന്‍ പെര്‍മിറ്റ് അനുവദിക്കാനും തീരുമാനമുണ്ട്.
https://www.facebook.com/Malayalivartha
