മിനിമം ബാലന്‍സില്ലെന്ന് പറഞ്ഞ് ഉപഭോക്താവിന്റെ അക്കൗണ്ടില്‍ നിന്ന് പിഴയീടാക്കിയ എസ്.ബി.ഐക്കെതിരെ ബാങ്കിംഗ് ഓംബുഡ്‌സ്മാന്‍ നടപടി. മിനിമം ബാലന്‍സില്ലാത്ത കാരണം പറഞ്ഞ് അക്കൗണ്ടില്‍ നിന്നും പിന്‍വലിച്ച തുക പിഴ സഹിതം തിരിച്ചടക്കാന്‍ ഓംബുഡ്‌സ്മാന്‍ ഉത്തരവിട്ടു. വെഞ്ഞാറമൂട്ടിലെ പൂരം ടെക്സ്റ്റയില്‍സ് ഉടമ ഷാജഹാന്‍ നല്‍കിയ പരാതിയുടെ അടിസ്ഥാനത്തിലാണ് നടപടിയുണ്ടായത്. ഇദ്ദേഹത്തിന്റെ സ്ഥാപനത്തിന്റെ പേരില്‍ ബാങ്കിലുള്ള സീറോ ബാലന്‍സ് കറന്റ് അക്കൗണ്ടില്‍ നിന്നും 10,000 രൂപ മിനിമം ബാലന്‍സില്ലാത്ത കാരണം കാട്ടി 885 രൂപ പിന്‍വലിച്ചിരുന്നു. 

ഗ്രാമീണ മേഖലയില്‍ പ്രവര്‍ത്തിക്കുന്ന ബാങ്കുകളില്‍ മിനിമം ബാലന്‍സ് 5,000 രൂപയായി നിശ്ചയിച്ചിരിക്കെ 5,694 രൂപ ബാങ്കിലുണ്ടായിരുന്നിട്ടും അക്കൗണ്ടില്‍ നിന്നും പണം പിന്‍വലിച്ചത് ചോദ്യം ചെയ്ത് ഷാജഹാന്‍ ഓംബുഡ്‌സ്മാനില്‍ പരാതി നല്‍കി. തുടര്‍ന്ന് നഷ്ടപരിഹാരമായി 2,000 രൂപയും മറ്റിനത്തില്‍ പിന്‍വലിച്ചതും പിഴയും ചേര്‍ത്ത് 3,711 രൂപ കടയുടമയുടെ അക്കൗണ്ടില്‍ നിക്ഷേപിക്കാന്‍ ഉത്തരവിടുകയായിരുന്നു. ഷാജഹാന്റെ അക്കൗണ്ടില്‍ കൂടുതല്‍ ഇടപാടുകള്‍ നടത്തുന്നെന്ന് ആരോപിച്ചാണ് പിഴ ഈടാക്കിയത്. പിഴ ഈടാക്കിയതിനെതിരെ ബാങ്കില്‍ പരാതി നല്‍കിയെങ്കിലും മറുപടി തന്നില്ല. തുടര്‍ന്നാണ് ഓംബുഡ്‌സ്മാന് പരാതി നല്‍കിയത്.

മിനിമം ബാലന്‍സില്ലാത്തതിന്റെ പേരില്‍ രാജ്യത്താകമാനമുള്ള ഉപഭോക്താക്കളില്‍ നിന്ന് കോടിക്കണക്കിന് രൂപയാണ് എസ്.ബി.ഐ ദിവസവും പിഴയായി ഈടാക്കുന്നത്. ഇതിനെതിരെ പാര്‍ലമെന്റില്‍ വരെ രൂക്ഷമായ വിമര്‍ശനങ്ങളും ചര്‍ച്ചകളും നടക്കുകയാണ്. മെട്രോനഗരങ്ങളിലെയും നഗരങ്ങളിലെയും ഗ്രാമങ്ങളിലെയും മിനിമം ബാലന്‍സ് തുക കുറയ്ക്കണമെന്നാണ് ഉപഭോക്താക്കളുടെ ആവശ്യം. ന്യൂനപക്ഷവിദ്യാര്‍ത്ഥിയുടെ സ്‌കോളര്‍ഷിപ്പ് തുക ഉള്‍പ്പെടെ മിനിമം ബാലന്‍സിന്റെ പേരില്‍ എസ്.ബി.ഐ ഈടാക്കിയത് വിവാദമായിരുന്നു.