സുപ്രീംകോടതിയിലെ പ്രതിസന്ധി പരിഹരിച്ചെന്ന് എ.ജി, എങ്ങനെ? ഏത് രീതിയിലാണെന്ന് വ്യക്തതയില്ല. കോടതി നടപടികള് ഇന്ന് തടസപ്പെട്ടില്ല
ചീഫ് ജസ്റ്റിസിനെതിരെ സഹജഡ്ജിമാര് തിരിഞ്ഞതിനെ തുടര്ന്ന് സുപ്രീംകോടതിയിലുണ്ടായ പ്രതിസന്ധി പരിഹരിച്ചെന്ന് അറ്റോര്ണി ജനറല് കെ.കെ വേണുഗോപാല് അറിയിച്ചു. ഇന്ന് രാവിലെ കോടതി നടപടികള് ആരംഭിക്കും മുമ്പ് ജഡ്ജിമാര് നടത്തിയ അനൗപചാരികമായ ചര്ച്ചയിലാണ് കാര്യങ്ങള് രമ്യമായി പരിഹരിച്ചത്. എന്നാല് എങ്ങനെയാണ് സമവായത്തിലെത്തിയതെന്ന് എ.ജി പ്രതികരിച്ചില്ല. ചായക്കോപ്പയിലെ കൊടുങ്കാറ്റായിരുന്നെന്നും അത് ആറിത്തണുത്തെന്നുമാണ് എ.ജി മാധ്യമങ്ങളോട് പറഞ്ഞത്. രാവിലെ കോടതി നടപടികള് തുടങ്ങാല് പതിനഞ്ച് മിനിറ്റോളം വൈകിയത് കൂടുതല് ആശങ്കപരത്തിയിരുന്നു. ജഡ്മാരെത്താത്തതിനെ തുടര്ന്ന് രണ്ട് കോടതികള് പ്രവര്ത്തിച്ചുമില്ല.
അതേസമയം ചീഫ് ജസ്റ്റിസിനെതിരെ വാര്ത്താസമ്മേളനം നടത്തിയ ജസ്റ്റിസുമാരായ ജെ. ചലമേശ്വര്, രഞ്ജന് ഗോഗോയ്, മദന് ബി. ലോക്കൂര്, കുര്യന് ജോസഫ് എന്നിവര് രാവിലെ കോടതിയില് എത്തി കേസുകള് കേള്ക്കുന്നുണ്ട്. പ്രശ്നപരിഹാരത്തിന് ചീഫ് ജസ്റ്റിസ് ദീപക് മിശ്ര തയ്യാറായെന്ന് ഇന്നലെ സൂചനകളുണ്ടായിരുന്നു. ചീഫ് ജസ്റ്റിസ് നിലവില് പിന്തുടരുന്ന രീതി അവസാനിപ്പിച്ചാലെ പ്രശ്നം രമ്യതയിലെത്തിയെന്ന് പറയാനാകൂ എന്നാണ് ജഡ്ജിമാര് അറിയിച്ചത്. വിരവിച്ച ജഡ്ജിമാരടക്കം ചീഫ് ജസ്റ്റിസിനെതിരെ രംഗത്തെത്തി എന്നത് ശ്രദ്ധേയമാണ്. പൊതുതാല്പര്യ ഹര്ജികളും പ്രധാനപ്പെട്ട കേസുകളും മുതിര്ന്ന ജഡ്ജിമാരുടെ ബെഞ്ചിന് കൈമാറണമെന്നാണ് ഇവരുടെ അഭിപ്രായം. ജൂനിയറായ ജസ്റ്റിസ് അരുണ് മിശ്രയെ ജസ്റ്റിസ് ലോയയുടെ മരണവുമായി ബന്ധപ്പെട്ട പൊതുതാല്പര്യ ഹര്ജി പരിണിക്കാന് ചുമതലപ്പെടുത്തിയതോടെയാണ് സുപ്രീംകോടതിയില് രണ്ട് മാസമായി നിലനിന്നിരുന്ന അഭിപ്രായഭിന്നത് മറനീക്കി പുറത്ത് വന്നത്.
ചീഫ് ജസ്റ്റിസ് ശൈലി മാറ്റിയാലും ജഡ്ജിമാര് കോടതി നടപടികള് ബഹിഷ്ക്കരിച്ച് വാര്ത്താസമ്മേളനം വിളിച്ചതിനാല് മുഴുവന് ജഡ്ജിമാരെയും വിളിച്ച് ചേര്ക്കണമെന്നാണ് സുപ്രീംകോടതി വൃത്തങ്ങള് നല്കുന്ന സൂചന. ഇടനിലക്കാര് ചര്ച്ച നടത്തുന്നതില് വിമര്ശനം ഉന്നയിച്ച ജഡ്ജിമാര്ക്ക് താല്പര്യമില്ലായിരുന്നു. ഇന്നലെ സുപ്രീംകോടതി ബാര് അസോസിയേഷന്റെയും ബാര് കൗണ്സില് ഓഫ് ഇന്ത്യയുടെയും ഭാരവാഹികള് ഇന്നലെ ചീഫ് ജസ്റ്റിസുമായി ചര്ച്ച നടത്തിയിരുന്നു. പക്ഷെ, താനുമായി അഭിപ്രായവ്യത്യാസമുള്ളവരുമായി എപ്പോള് കൂടിക്കാഴ്ച നടത്താമെന്ന് ചീഫ് ജസ്റ്റിസ് അറിയിച്ചില്ല. അതിന് ശേഷം ഭിന്നാഭിപ്രായമുള്ള ജഡ്ജിമാരുമായും ചര്ച്ച നടത്തി. കോടതി നടപടികള് തടസപ്പെടുത്തില്ലെന്ന് ജസ്റ്റിസ് ചലമേശ്വര് ഇവര്ക്ക് ഉറപ്പ് നല്കിയിരുന്നു.
അതോടെയാണ് ഇന്ന് രാവിലെ ചര്ച്ചകള് നടന്നത്. പക്ഷെ, വാര്ത്താസമ്മേളനത്തില് ഉന്നയിച്ച കാര്യങ്ങള് മുഴുവന് രമ്യതയിലെത്തിയോ എന്ന് ഭിന്നാഭിപ്രായം പ്രകടിപ്പിച്ച നാല് ജഡ്ജിമാരോ എ.ജിയോ വ്യക്തമാക്കിയില്ല.
https://www.facebook.com/Malayalivartha
