ഇസ്രായേല് പ്രധാനമന്ത്രിയുടെ സന്ദര്ശനത്തിനൊപ്പം സഹകരണം വര്ധിപ്പിക്കാന് ഇന്ത്യയുമായി ഒമ്പതു കരാറുകള്
ഇസ്രായേല് പ്രധാനമന്ത്രി ബിന്യമിന് നെതന്യാഹുവിന്റെ സന്ദര്ശനത്തിനൊപ്പം സഹകരണം വര്ധിപ്പിക്കാന് ഇന്ത്യയുമായി ഒമ്പതു കരാറുകള്. പ്രതിരോധസാമഗ്രികള് ഇന്ത്യയില് സംയുക്തമായി നിര്മ്മിക്കുന്നതിന് സംരംഭങ്ങള് കൂടുതലായി തുടങ്ങും. പങ്കാളിത്തപദ്ധതിയും ഗവേഷണവും പ്രോത്സാഹിപ്പിക്കും. സാങ്കേതികവിദ്യ കൈമാറും. പൊതു, സ്വകാര്യമേഖലകളുടെ പങ്കാളിത്തത്തോടെ പ്രതിരോധവ്യവസായത്തില് ദീര്ഘകാലസഹകരണം കൊണ്ടുവരും.
പ്രതിരോധത്തിനുപുറമെ ഭീകരവേട്ട, സൈബര്സുരക്ഷ എന്നീ വിഷയങ്ങളില് ബന്ധം ശക്തിപ്പെടുത്താന് പ്രധാനമന്ത്രി നരേന്ദ്ര മോദിയുമായി നടത്തിയ ചര്ച്ചയില് ധാരണയായി. പ്രതിരോധസാമഗ്രികള് ഇന്ത്യയില് സംയുക്തമായി നിര്മിക്കുന്നതിന് ഇസ്രായേലിലെ പടക്കോപ്പ് നിര്മാണകമ്പനികളെ നരേന്ദ്ര മോദി ക്ഷണിച്ചു.
പ്രത്യക്ഷ വിദേശനിക്ഷേപവ്യവസ്ഥ ഉദാരമാക്കിയത് പ്രയോജനപ്പെടുത്താന് ഇസ്രായേല് കമ്പനികളോട് മോദി ആവശ്യപ്പെട്ടു. കൃഷി, സാങ്കേതികവിദ്യ, സുരക്ഷ തുടങ്ങിയ മേഖലകളിലെ സഹകരണം വികസിപ്പിക്കുമെന്ന് മോദിനെതന്യാഹു ചര്ച്ചക്കുശേഷം പുറത്തിറക്കിയ സംയുക്തപ്രസ്താവന വ്യക്തമാക്കി. സൈബര്സുരക്ഷ, എണ്ണപ്രകൃതിവാതകം, ചലച്ചിത്ര സഹനിര്മാണം എന്നീ മേഖലകളില് സഹകരിക്കാനുള്ള കരാറുകള്ക്കുപുറമെ വ്യോമ ഗതാഗത ഉടമ്പടി ഭേദഗതി ചെയ്യാനും തീരുമാനിച്ചു.
ഇസ്രായേലിന്റെ ടാങ്ക്വേധ സ്പൈക് മിസൈല് ഇടപാടിനെക്കുറിച്ച് ചര്ച്ച നടന്നുവോ എന്ന കാര്യം അധികൃതര് വിശദീകരിക്കുന്നില്ല. വിലക്കൂടുതല്, ഗുണമേന്മ എന്നിവയില് പൊരുത്തപ്പെടാനാകാതെ സഹസ്രകോടികളുടെ ഈ കരാര് ഇന്ത്യ നേരത്തേ വേണ്ടെന്നുവെച്ചിരുന്നു. രണ്ടുരാജ്യങ്ങളിലെയും മുതിര്ന്ന കാബിനറ്റ് മന്ത്രിമാരുടെ സാന്നിധ്യത്തില് നടന്ന പ്രതിനിധിതലചര്ച്ചയില് മേഖല, അന്താരാഷ്ട്രവിഷയങ്ങള് ഉയര്ന്നു വന്നു.
ജറൂസലം വിഷയത്തില് ഇസ്രായേലിനെതിരെ ഇന്ത്യ യു.എന്നില് വോട്ടുചെയ്ത വിഷയവും ചര്ച്ചയായി. എന്നാല്, പരസ്പരബന്ധം ഏതെങ്കിലും ഒറ്റവിഷയത്തെമാത്രം ആശ്രയിച്ചല്ലെന്ന കാഴ്ചപ്പാടാണ് രണ്ടു നേതാക്കളും പ്രകടിപ്പിച്ചത്. സമാധാനത്തിനും സുരക്ഷക്കും ഭീകരത ഉയര്ത്തുന്ന കടുത്ത വെല്ലുവിളികള് സംഭാഷണവിഷയമായി. ഭീകരതയെ ഏതുവിധത്തില് പ്രോത്സാഹിപ്പിച്ചാലും കര്ക്കശനടപടികള് വേണമെന്ന് സംയുക്തപ്രസ്താവന ആഹ്വാനം ചെയ്തു.
https://www.facebook.com/Malayalivartha
