മെഡിക്കല് കോഴ കേസ് ചീഫ് ജസ്റ്റിസ് പരിഗണിച്ചതില് സംശയമുണ്ട്, അതിനാല് ഹര്ജി അദ്ദേഹത്തിനെതിരെ വിമത ശബ്ദം ഉയര്ത്തിയ ജഡ്ജിമാരോ, മുതിര്ന്ന ജഡ്ജിമാരുടെ കൊളീജിയമോ പരിഗണിക്കണമെന്ന് പ്രശാന്ത് ഭൂഷണ്
ചീഫ് ജസ്റ്റിസ് ദീപക്മിശ്രയുടെ വിശ്വാസ്യത കരിനിഴലില്. ലക്നൗ മെഡിക്കല് കോഴ കേസില് ചീഫ് ജസ്റ്റിസിനെതിരെ മുതിര്ന്ന അഭിഭാഷകന് പ്രശാന്ത് ഭൂഷണാണ് പരാതി നല്കിയത്. കോടതി നടപടികളില് വീഴ്ചവരുത്തിയെന്നാണ് പരാതിയില് പറയുന്നത്. പരാതിയുടെ പകര്പ്പ് വിമത ജഡ്ജിമാരായ ജെ. ചലമേശ്വര്, രഞ്ജന് ഗോഗോയി, കുര്യന് ജോസഫ്, മദന് ബി. ലോക്കൂര് എന്നിവര്ക്ക് അയച്ച് കൊടുത്തെന്നും പ്രശാന്ത്ഭൂഷണ് അറിയിച്ചു. ജുഡീഷ്യറിയുടെ നവീകരണത്തിനായി പ്രചാരണം നടത്തുന്ന സംഘടനയുടെ കണ്വീനറാണ് പ്രശാന്ത് ഭൂഷണ്.
ലക്നൗവിലെ പ്രസാജ് മെഡിക്കല് ട്രസ്റ്റിനെതിരെയുള്ള കോഴ കേസ് പരിഗണിക്കുന്ന സുപ്രീംകോടതി ജഡ്ജിമാരെ സ്വീധീനിക്കാനും കൈക്കൂലി നല്കാനും ഗൂഢാലോചനയും ആസൂത്രണവും നടന്നെന്ന് കേസ് അന്വേഷിച്ച സി.ബി.ഐയുടെ എഫ്.ഐ.ആറില് വ്യക്തമായി പറയുന്നുണ്ടെന്നും പ്രശാന്ത് ഭൂഷണ് നല്കിയ പരാതിയില് പറയുന്നു. മെഡിക്കല് കോഴ കേസ് കേട്ട ബെഞ്ചിന്റെ തലവന് ചീഫ് ജസ്റ്റിസ് ദീപക് മിശ്രയായിരുന്നു. മറ്റ് ബെഞ്ചുകളെ ചുമതലപ്പെടുത്താതെ ചീഫ് ജസ്റ്റിസ് തന്നെ ഈ കേസ് കേട്ടതിനാല് അദ്ദേഹത്തിന് ഇക്കാര്യത്തില് പ്രത്യേക താല്പര്യമുണ്ടെന്നാണ് മനസിലാക്കാന് കഴിഞ്ഞതെന്നും പരാതിയില് ആരോപിക്കുന്നു.
ഗൂഢാലോചനയിലും ഇടപെടലിലും ചീഫ് ജസ്റ്റിസ് ദീപക് മിശ്രയ്ക്കെതിരെ വ്യക്തമായ തെളിവില്ലെങ്കിലും വ്യക്തമായ അന്വേഷണം നടത്തണമായിരുന്നു. ജുഡീഷ്യറിയുടെ വിശ്വാസ്യതയെ ചോദ്യം ചെയ്യുന്നതാണ് സി.ബി.ഐയുടെ കണ്ടെത്തല്. അതിനാല് എത്രയും വേഗം പ്രശ്നത്തില് ഇടപെടണമെന്നും പരാതിയില് ആവശ്യപ്പെടുന്നു. ചീഫ് ജസ്റ്റിസിന് തൊട്ട് താഴെയുള്ള ജഡ്ജിമാരോ അല്ലെങ്കില് സീനിയര് ജഡ്ജിമാരുടെ കൊളിജിയമോ കേസ് പരിഗണിക്കണമെന്നും പ്രശാന്ത് ഭൂഷണ് ഹര്ജിയില് ആവശ്യപ്പെട്ടു.
എന്താണ് മെഡിക്കല് കോഴ കേസ്?
ലക്നൗവിലെ പ്രസാദ് എഡ്യൂക്കേഷന് ട്രസ്റ്റിന്റെ മെഡിക്കല് കോളജിന് മെഡിക്കല് കൗണ്സില് ഓഫ് ഇന്ത്യ അനുമതി നിഷേധിച്ചതിനെ തുടര്ന്ന് കോടതിയില് നിന്നും അനുമതി വാങ്ങിത്തരാമെന്നാണ് ഒരു ഇടനിലക്കാരന് ട്രസ്റ്റ് അധികൃതര്ക്ക് ഉറപ്പ് നല്കി. ഇതോടെ വന്തുക ട്രസ്റ്റ് ഇയാള്ക്ക് കൈമാറി. ഹൈക്കോടതിയില് നിന്നും സുപ്രീംകോടതിയില് നിന്നും അനുകൂല വിധി സമ്പാദിക്കാന് ഇടനിലക്കാരന് ക്രിമിനല് ഗൂഢാലോചന നടത്തിയെന്ന് സി.ബി.ഐ അന്വേഷണത്തില് വ്യക്തമായി. തുടര്ന്ന് മുന് ഒഡീഷ ഹൈക്കോടതി ജഡ്ഡി ഐ.എം ഖുടൂസിയും മറ്റ് നാല് പേരും അറസ്റ്റിലായി. ഖുടൂസിയെ പിന്നീട് ജാമ്യത്തില് വിട്ടു.
https://www.facebook.com/Malayalivartha
