ഹാദിയയുടെ വിവാഹം തെറ്റല്ലെന്ന് സുപ്രീംകോടതി. ഒരാളുടെ വിവാഹത്തില്‍ ഇടപെടാന്‍ കോടതിക്ക് അധികാരമില്ലെന്ന് സുപ്രീംകോടതി വ്യക്തമായ പരാമര്‍ശം നടത്തി. ഹേബിയസ് കോര്‍പ്പസ് ഹര്‍ജിയില്‍ വിവാഹം റദ്ദാക്കാന്‍ കോടതിക്ക് കഴിയില്ല. പ്രത്യേകിച്ച് ഹാദിയ വിവാഹത്തെ കുറിച്ച് വ്യക്തമായ നിലപാട് സ്വീകരിച്ച സാഹചര്യത്തില്‍. വിവാഹം നിയമവിരുദ്ധമായി കാണാനാകില്ല. ഒരാളുടെ വിവാഹത്തെ കുറിച്ച് അന്വേഷണം നടത്താനാവില്ല. ഹാദിയയുടെ വിവാഹവും അന്വേഷണവും രണ്ടായി കാണണം. അന്വേഷണം വളരെ വിശദമായി വേണം നടത്താനെന്നും കോടതി നിര്‍ദ്ദേശിച്ചു. കേസില്‍ ഹാജിയയെ കക്ഷി ചേര്‍ക്കാനും കോടതി തീരുമാനിച്ചു. ഫെബ്രുവരി 22ന് കേസ് വീണ്ടും പരിഗണിക്കും. 

മതം മാറിയതും വിവാഹം കഴിച്ചതും സ്വന്തം ഇഷ്ടപ്രകാരമാണെന്നുള്ള ഹാദിയയുടെ മൊഴി കണക്കിലെടുക്കരുതെന്ന് വ്യക്തമാക്കി എന്‍ഐഎ നല്‍കിയ അന്വേഷണ പുരോഗതി റിപ്പോര്‍ട്ട് പരിശോധിച്ചാണ് കോടതി പരാമര്‍ശം നടത്തിയത്. ഹൈക്കോടതിയിലെ കേസില്‍ അനുകൂല ഉത്തരവ് ലഭിക്കുന്നതിനാണ് വിവാഹം തട്ടിക്കൂട്ടി നടത്തിയെന്നാണ് എന്‍ഐഎയുടെ കണ്ടെത്തല്‍. വിവാഹ വെബ്‌സൈറ്റിലൂടെയാണ് ഷെഫിന്‍ ജഹാനെ കണ്ടെത്തിയത് എന്ന ഹാദിയയുടെ അവകാശവാദം തെറ്റാണ്. സത്യസരണിയിലെ സൈനബയുടെ ഡ്രൈവറാണ് ഹാദിയക്ക് വിവാഹം കഴിക്കാനായി ഷെഫിന്‍ ജഹാനെ കണ്ടെത്തിയത്, എന്നീ കാര്യങ്ങള്‍ എന്‍ഐഎ വ്യക്തമാക്കി. മസ്തിഷ്‌ക പ്രക്ഷാളനത്തിന് വിധേയയാക്കിയാണ് ഹാദിയയെ മതം മാറ്റുകയും വിവാഹം കഴിപ്പിക്കുകയും ചെയ്തത്. അതിനാല്‍ രണ്ടും സ്വമേധയാ ആണെന്നുള്ള മൊഴി കണക്കിലെടുക്കാന്‍ ആവില്ലെന്നും എന്‍ഐഎ വാദിച്ചു.

കോടതി നിര്‍ദേശപ്രകാരമുള്ള മേല്‍നോട്ടം ഇല്ലാതെ നടക്കുന്ന എന്‍ഐഎ അന്വേഷണം കോടതി അലക്ഷ്യമാണെന്നാണ് ഷെഫിന്‍ ജഹാന്റെ നിലപാട്. ഇക്കാര്യം ചൂണ്ടിക്കാട്ടിയാണ് എന്‍ഐഎക്കെതിരെ ഷെഫിന്‍ കോടതി അലക്ഷ്യ നടപടി ആവശ്യപ്പെടുക. ഹാദിയ അന്വേഷണ ഉദ്യോഗസ്ഥരോട് പറഞ്ഞത് വേ ടു നിക്കാഹ് എന്ന വിവാഹ വെബ്‌സൈറ്റിലൂടെയാണ് ഷെഫിന്‍ ജഹാനെ കണ്ടെത്തിയത് എന്നായിരുന്നു. എന്നാല്‍ ഈ വെബ്‌സൈറ്റ് പണം നല്‍കുന്നവര്‍ക്ക് മാത്രമേ ഉപയോഗിക്കാന്‍ സാധിക്കുകയുള്ളു. ഹാദിയയുടെയും ഷെഫിന്‍ ജഹാന്റെയും വിവാഹം നടന്ന് പത്ത് ദിവസത്തിന് ശേഷം ആണ് ഷെഫിന്‍ ഈ വെബ്‌സൈറ്റില്‍ അക്കൗണ്ട് എടുത്തതെന്നും എന്‍ഐഎ കണ്ടെത്തിയിരുന്നു.